ဝါယှေန်တာန်၊ မာတ်ချ် (၉)
သေန်တာပရေၚ်စဵုဒၞါ ကေုာံ ပရေၚ်ထိၚ်ဒက်ယဲကၠောံထၞာန်အမေရိကာန်ဂှ်ဝွံ သွက်ရဲအာတရဴ မကၠုၚ်စိုပ်နူကဵုဍုၚ်ကြုက်ဂမၠိုၚ် တၚ်နွံပၟိက် ဟွံဒေါအ်ဟွံဂွံ သွက်ဂွံစၟဳတ်ကဝ်ဝေဒ် ၁၉ ဂှ် ညံၚ်ရဴဍုၚ်တၞဟ်သ္အာၚ်ကီု စနူဂိတုမာတ်ချ် (၁၀) တုဲ ပလီုကဵုအာရောၚ် မဒှ်ရ။
နကဵုကၟိန်ဍုၚ်အမေရိကာန် ၜိုန်ရဖအောန်ဖျေံထောံကဵု သာ်ဏံကီုလေဝ် ဆက်မၚ်ကျောဝ်အာ လၟေၚ်ဒဒှ်ကၠောံထၞာန်ဍုၚ်ကြုက်တံကဵု အလုံဂၠးတိတံရောၚ်ဂှ်လေဝ် တမ်ရိုဟ်ပရိုၚ်မွဲတၠ ဟီုဂးလဝ်ကဵု ဌာန်ပရိုၚ်ရာ်တာရ။
တၚ်သ္ဂုတ်သွာတ် မဖအောန်ဖျေံကဵု ပရေၚ်စၟဳစၟတ်ကဝ်ဝေဒ် ၁၉ တံဂှ် ဝါယှေန်တာန်ပသ်ထ် ထ္မံက်ထ္ၜးလဝ် ကိုပ်ကၠာအိုတ်ရ။ သေန်တာထိၚ်ဒက်ယဲ အမေရိကာန်ဂှ် စပ်ကဵုတၚ်လလောၚ်တြးဏံတုဲ ကလေၚ်ဟီုဂးလဝ်မွဲမွဲဂှ် ဟွံမွဲရ။
အခိၚ်ဗေကျေန် သ္ဂုတ်သွာတ် သွက်ဂွံရုပ်သီ မူဝါဒကဝ်ဝေဒ် ၁၉ မတေၚ်ဂြတ်ဂှ် ပ္ဍဲဂိတုဂျာန္နဝါရဳပြဟ်ဟ်တေံ အမေရိကာန်ဝွံ လအာတုပ်ကဵုဍုၚ်အိန္ဒိယ၊ ကနေဒါ၊ အဳတလဳ၊ ဂျပါန် ကေုာံ ဍုၚ်တၞဟ်သ္အာၚ်တံဂှ်ကီု ပံၚ်တောဲကၠုၚ်လဝ် ပရေၚ်ဖအောန်ဖျေံတၚ်သၞောတ်ဗ္ၜတ်တံရ။
ပ္ဍဲဂိတုဒဳဇြေမ်ဗာ သ္ကုတ်ပြဟ်ဟ်တေံ ဍုၚ်ကြုက်ဝွံ အခိၚ်ရုပ်သီထောံ မူဝါဒကဝ်ဝေဒ် ၁၉ ဍေံ ချိုန်ခဏဓဝ်ဂှ် စၟယဲကလေၚ်ကၠောံထၞာန်ပြးဇးလဝ် ကုလၟိဟ်မၞိဟ် (၁ ဒဿမ ၄) ဗဳလျာန်ဂှ်တုဲ ယဲက္တဵုဒှ် သၠုၚ်တိုန်လဝ်ရ။
စပ်ကဵုလၟေၚ်ဒဒှ်ဏံတုဲ ညးမစိုန်သ္ကီုတံ ၜိုန်ရပ္တိတ်ခန်သၟာန်ကီုလေဝ် ပ္ဍဲဂိတုဖေဖဝ်ဝါရဳဂှ် ဒှ်ကၠုၚ်ဒမြိပ်ချိုတ်ဂၠးတိ အောန်အိုတ်တုဲ က္ဍိုပ်သ္ကိုပ်ကဆံၚ်လ္တူဍုၚ်ကြုက်တံဝွံ စပ်ကဵုကဝ်ဝေဒ် ၁၉ တုဲ လလောၚ်တြးလဝ် နဒဒှ် “ပေါဲအံၚ်ဇၞးဇၞော်ဇၞော်” ရ။
အစဳဇန် Genomic Surveillance Program (TGS) မဒှ်အစဳဇန်ကၟုဲထဳအာတရဴဂမၠိုၚ် မရီုဗၚ်ပါလုပ်မာန် ကုပရေၚ်သ္ဂောံစမ်ၜတ်မဗဳဇပါ်ကဝ်ဝေဒ် မပြဟ်ပြေဟ်မာန်ဂှ် ဆက်ထိၚ်ဒဝ်အာရောၚ် CDC ဟီုလဝ်ကဵု ဌာန်ပရိုၚ်ရာ်တာရ။ အစဳဇန်ဏံဂှ် စလဝ် ပ္ဍဲဂိတုဒဳဇြေမ်ဗာတုဲ ပ္ဍဲကဵု Seattle ကေုာံ Los Angeles တံဂှ်လေဝ် သၠုၚ်ပ္တိုန်ရေၚ်တၠုၚ်လဝ်ရ။
Ref: Reuters