လံၚ်လုၚ်၊ မာတ်ချ် (၉)
ပ္ဍဲဂိတုမာတ်ချ် (၈) အခိၚ်နူဂယးဂှ် ဒပ်ကံၚ်ဇြဳပၞာန် စံၚ်ဏာလဝ် ကွာန်ကယျေန်ကျဳ၊ ပွိုၚ်ဍုၚ်လံၚ်လုၚ်၊ ရးဒေသဇၞော်တၞၚ်သဳဂှ် ညးဒေသတံ ကေုာံ ဂကောံဒပ်စဵုဒၞါညးဍုၚ်ကွာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကရောၚ်ပၞာန်ကံၚ်ဇြဳပၞာန် ဇြဟတ်ဒပ် (၆၀) ပြၚ်ပါဂှ်ဝွံ တုဲကၠုၚ်နူဂိတုမာတ်ချ် (၆) တေံရ ကြဴနူလုပ်စိုပ် ထ္ပက်ကၠုၚ်ကရောၚ်ပၞာန် အပ္ဍဲကွာန်ကယျေန်ကျဳတုဲဂှ် ပ္ဍဲကဵုတ္ၚဲဂှ် အခိၚ်နူဂယးဂှ် စံၚ်ဏာလဝ်ရ။
ဟိုတ်နူဒပ်ကံၚ်ဇြဳပၞာန် စံၚ်လဝ်ကွာန်ဂှ်ရ ပြဟ်ဟ်ဏံ သ္ၚိဒၟံၚ်ညးဒေသ ဟွံအောန်နူကဵု (၅) မ ပၟတ်တူလီုလာ်အာလဝ်တုဲ လၟိဟ်ဂၞန် ချိုတ်တ်ပၠိုတ်တ် ဟွံဂွံတီကေတ်ဏီပုဟ်ဂှ် သ္ဂးရ။
ကွာန်ကယျေန်ကျဳဝွံ ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ရ ဒှ်ကွာန်ညးဒေသဂမၠိုၚ် ဒးပါဲဒလေတ်ဒၟံၚ် အလုံကွာန်မွဲဂှ် ဂွံတီကေတ်ရ။
ကရောၚ်ပၞာန်ပံၚ်တောဲကံၚ်ဇြဳပၞာန် မစံၚ်ပလီုဏာ ကွာန်ကယျေန်ကျဳဂှ်ဝွံ အခိၚ်လၟုဟ်ဂှ် ဆက်နွံဒၟံၚ် ပ္ဍဲလ္ပာ်ဂၠံၚ်မံၚ်မကာန်၊ တေန်ဗဝ်သုက်၊ ကျံက်ဇြေန်၊ ကယျေန်ကျဳတံဂှ်တုဲ အကာဲအရာ သ္ဂောံထ္ပက်ကရောၚ်ပၞာန်တံ နွံဒၟံၚ်ဂှ် ညးတာလျိုၚ် PDF လံၚ်လုၚ်မွဲတၠ သ္ဂးရ။
ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် အပ္ဍဲပွိုၚ်ဍုၚ်လံၚ်လုၚ်ဂှ်ရ ညးဒေသ ဂၠိုၚ်ကဵုလ္ၚီ နူကဵုၜိုတ်ကွာန် ၅ ကွာန် သီုကဵုပါလုပ် ကွာန်ကယျေန်ကျဳ၊ တေန်ဗဝ်သုက်၊ ကျံက်ဇြေန် ကေုာံ ပျေန်ကျဳတံ ဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
အတိုၚ်ဂလာန် ဂကောံသုတေသန Southern Monitor မသ္ဂးလဝ်ဂှ်မ္ဂး ကြဴနူဒပ်ပၞာန်သီအဝဵုတုဲ ပ္ဍဲကဵုရးဒေသဇၞော်တၞၚ်သဳဂှ် သ္ၚိဒၟံၚ်ညးဒေသ (၄၃၅) မ ဒးဒုၚ်စံၚ်ပလီုလဝ်ဂှ် တုဲကၠုၚ်ဂိတုမာတ်ချ် (၄) တေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)