ဒဳမအ်ဇြော – မာတ်ချ်(၉)
ကြဴနူပေါဲဗတိုက် ပ္ဍဲပွိုၚ်ဍုၚ်ဒဳမအ်ဇြော၊ တွဵုရးကရေၚ်ဍာဲ သ္ကာတ်မြဟ်ကၠုၚ်တုဲ ညးပါဲဘဲပၞာန် နူ(၅)မိုၚ် ကေုာံဒေသၚိုဲတောၚ် ဒးထောံလသာလဝ် ဌာန်ဒၟံၚ်တအ်ဂှ် ညံၚ်ဂွံက္လေၚ်စဴဌာန်ဒၟံၚ် ကံၚ်ဇြဳပၞာန် ကော်ဖျဴဒၟံၚ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ညးဍုၚ်ကွာန် ပါဲဘဲပၞာန်တအ်ဂှ် နူသၞာံ ၂၀၂၁ တုဲကၠုၚ်တေံ ကြဴနူပေါဲဗတိုက် အကြာဒပ်ကံၚ်ဇြဳပၞာန်ကဵု ဒပ်ပရေၚ်စဵုဒၞာဒေသတအ် သ္ကာတ်မြဟ်က္တဵုဒှ်ကၠုၚ်တုဲဂှ် ကံၚ်ဇြဳပၞာန် ဖျေံလဝ်သ္ဇိုၚ် ပ္ဍဲဒၞာဲတအ်ဂှ်ရ။
အခိၚ်လၟုဟ်ဏံမ္ဂး ၜိုန်ရကံၚ်ဇြဳပၞာန် ကဵုကၠုၚ်အခေါၚ်က္လေၚ်စဴဌာန်ဒၟံၚ်ကီုလေဝ် ညးဒေသတအ်သ္အးဇ္ၚးသ္ၚိဌာန်တုဲ ဖျေံသ္ဇိုၚ် က္လေၚ်မံၚ်တန်တဴ ဟၟဲရဂှ် ဥက္ကဋ္ဌ ကဝ်မတဳကံၚ်ဇြဳကဵုကသပ်တွဵုရးကရေၚ်ဍာဲ KSCC ဥူဗညာ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
“မၞိဟ်တအ်ဂှ် ဂွံလဝ်အခေါၚ်စဴ နူကံၚ်ဇြဳပၞာန်တုဲ က္လေၚ်စဴကၠုၚ်ဒၟံၚ်ယျဂှ် ရမျှာၚ်ဟီုဂးဒၟံၚ် ပိုဲဂွံမိၚ်လဝ်ရ။ လ္ၚဵုဂှ်တှ်ေ က္လေၚ်စဴတုဲ ကၠောန်ဒၟံၚ် ပရေၚ်သ္အးဇ္ၚးဂှ် နွံရ။ က္လေၚ်ပ္တိတ်ကေတ်ဏာလဝ် ကပေါတ်ကညောတ်လေဝ် နွံရ။ လက္ချဏ်က္လေၚ်စဴကၠုၚ် မံၚ်ပေၚ်ၚ်ဂှ်တှ်ေ ဟွံဆဵုလဝ်ဏီ။ ဆ္ဂးဂှ် က္လေၚ်စဴဒၟံၚ်ယျ။ က္လေၚ်ကၠောန်ဒၟံၚ် ပရေၚ်သ္အးဇ္ၚးယျ။ ပ္ဍိုက်ဇက်ဒၟံၚ် ကပေါတ်ကညောတ်ရ၊ တုဲတှ်ေ က္လေၚ်စဴကျောဝ်ရံၚ် သ္ၚိတအ်လေဝ်ဏး။ ပရေၚ်မံၚ်စံၚ်ကၠောန်ၜိုတ်စသုၚ် ဗီုအခိၚ်ကၠာတေံဂှ် ဟွံဂွံညာတ်လးလးဏီရ” ဂှ် ညးဟီုသ္ဂးလဝ်ရ။
သ္အာၚ်နူဂှ်ပၠန် ၜိုန်ရကံၚ်ဇြဳပၞာန် ကဵုလဝ်အခေါၚ်က္လေၚ်စဴဌာန်ဒၟံၚ်ကီုလေဝ် ညံၚ်ဟွံဂွံပ္ဍိုက်ဇက်ပ္တိတ်ကေတ်ဏာ ကပေါတ်ကညောတ်ညးဍုၚ်ကွာန် တာဒၞာလဝ်ရဂှ် ဂွံတီကေတ်ရ။
ဒၟာနူကံၚ်ဇြဳပၞာန် ထ္ပက်ကရောၚ်ပၞာန်တုဲ ဖျေံလဝ်ဗ္ဒပ် ပ္ဍဲကဵုမွဲဒမြိပ် ဒဝ်ပိုဝ်ဇြဳ၊ (၅)မိုၚ်၊ (၆)မိုၚ် မဒှ်ဂၠံၚ်ဇၞော်လွိုၚ်ကဝ်-ဒဳမအ်ဇြော နူကဵုသၞာံ ၂၀၂၁ တုဲကၠုၚ်တေံဂှ်ရ ညးဒေသပါဲဒဴပၞာန်တအ် က္လေၚ်စဴသ္ၚိဌာန်ဟွံမာန် လအ်ကၠုၚ်ပွိုၚ်(၁)သၞာံပြၚ်ရဂှ် ဂွံတီကေတ်ရ။
ဂကောံပၠန်ဂတး ကေုာံဂကောံညးအရာပ် ပ္ဍဲတွဵုရးကရေၚ်ဍာဲတအ်ဂှ် ဟိုတ်နူကံၚ်ဇြဳပၞာန် ညာတ်ကေတ်ဒၟံၚ် ညးဍုၚ်ကွာန်တအ် ညံၚ်ရဴသၞဂှ်ရ ညံၚ်ဟွံဂွံက္လေၚ်စဴဌာန်ဒၟံၚ်ဂှ် ဟီုကဵုလဝ်သတိတုဲ NUG လေဝ် ယဝ်ရကရောၚ်ပၞာန်ကံၚ်ဇြဳ လုပ်စိုပ်ကၠုၚ်ကွာန်ဗက် ညံၚ်ညးဍုၚ်ကွာန်တအ် ဂွံပါဲဓလေတ်ဂှ် ဟီုကဵုလဝ်သတိရ။
နကဵုညးဒေသဂမၠိုၚ် ယဝ်ရက္လေၚ်စဴဌာန်ဒၟံၚ်မ္ဂး ဒးဒုၚ်ဘဲအန္တရာယ် မာၚ်ကံၚ်ဇြဳပၞာန် ပါံစွံလဝ်ကီု သီုကဵုဒးဒုၚ်သ္ပ ဒေၚ်ဒုၚ်ဒၞာမၞိဟ်မာန်ဒၟံၚ်ရဂှ် ဂွံတီကေတ်ရ။
ပ္ဍဲသၞာံ ၂၀၂၃ ပရေၚ်ဒပ်ပၞာန်သီအဝဵု ပ္ဍဲကၟိန်ဍုၚ်ဗၟာလောန်ကၠုၚ်တုဲဂှ် လၟိဟ်မၞိဟ်ကၟိန်ဍုၚ် ၁၇ ဒဿမ ၆ ပြကောဋိကိုတ် ပိဂအုံမွဲဂအုံဂှ် နွံဒၟံၚ်ပၟိက်ကဵု အရီုဗၚ်ထံက်ပၚ်ပရေၚ်မၞိဟ်ရဂှ် ရုၚ်ပ္ညဳပ္ညပ်ဆေၚ်ရာကဵုအရီုဗၚ်ပရေၚ်မၞိဟ် ကုလသမဂ္ဂ UNOCHA
လလောၚ်တြးလဝ် ပ္ဍဲဂိတုမာတ်ချ်စၟတ်တ္ၚဲ(၅)ဂှ်ရ။
ဆ္ဂး ၜိုန်ရတၚ်နွံပၟိက်အရီုဗၚ်ပရေၚ်မၞိဟ် အလုံကၟိန်ဍုၚ် သၠုၚ်တိုန်ဒၟံၚ်ကီုလေဝ် ဟိုတ်နူကံၚ်ဇြဳပၞာန်လလောၚ်တြးလဝ် ပွိုၚ်ဍုၚ် (၄၇) ပွိုၚ်ဍုၚ် ပ္ဍဲရးဒေသဇၞော် ကေုာံတွဵုရးတအ် ပရေၚ်အုပ်ဓုပ်ပၞာန်တုဲ သွက်ဂွံကဵုရီုဗၚ် ဟွံကၠးပ္ဍးချိုတ်ပၠိုတ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး UNOCHAရ။
ပ္ဍဲတွဵုရးကရေၚ်ဍာဲ လၟိဟ်မၞိဟ် မၞုံဗွိုၚ်(၃)ကိုတ်ဟေၚ်ဂှ် ဟိုတ်နူပေါဲဗတိုက် ကံၚ်ဇြဳပၞာန်ကဵု ဒပ်ပရေၚ်စဵုဒၞာတအ်တုဲ ညးဍုၚ်ကွာန်(၂)ကိုတ်ပြၚ် ဒးပါဲဒၟံၚ်ဘဲပၞာန်ရဂှ် ဂကောံဇြဟတ်ညးဍုၚ်ကွာန်ကရေၚ်ဍာဲ PKPF ဟီုသ္ဂးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ