မတ်မလီု – မာတ်ချ်(၉)
ပရေၚ်အမေရိကာန် ကေုာံကၟိန်ဍုၚ်ပလိုတ်တအ် ရီုဗၚ်ထ္ၜလဘာ်ကဵုဒၟံၚ် အလဵုအသဳညဳသၟဟ်ကောန်ဂကူ ပၠန်ဂတးဒၟံၚ် ကုတၠအဝဵုပၞာန်တအ်ဂှ် ပရေၚ်ပေၚ်စိုတ် ဂွံဇြဟတ် ၜိုတ်ထေက်ကြိုက် ၜိုန်နွံဒၟံၚ်ကီုလေဝ် သွက်ဂကောံဇြဟတ်ပၠန်ဂတးဂမၠိုၚ် နွံဒၟံၚ်ပၟိက်ကဵု ပရေၚ်ရီုဗၚ်ထ္ၜလဘာ်စိုပ်တရဴ လတူနူဏံဏီရဂှ် သ္ကိုပ်ဝန်ဇၞော်မာန်ဝေန်ခိုၚ်တာန် ဟီုသ္ဂးလဝ်ရ။
ပ္ဍဲကောံဓရီု ဂကောံအလဵုအသဳ မရနုက်ကဵု (၉)ဝါ မကၠောန်ဗဒှ်လဝ် ပ္ဍဲဂိတုမာတ်ချ် စၟတ်တ္ၚဲ(၇)ဂှ် ဟီုသ္ဂးလဝ် သာ်ဏံရ။
“ပရေၚ်ဆက်ဆောံ ကေုာံကၟိန်ဍုၚ်အဇြဳယာန်ကီု ပါလုပ်သီုကၟိန်ဍုၚ်ဇိုၚ်ဝုတ်ဒိုဟ်တအ်ဂှ်လေဝ် သွက်ဂွံပ္တိတ်ဇြဟတ် ကၠောန်ရေၚ်တၠုၚ်အာ ညံၚ်ဇြဟတ်ဂွံခိုဟ် လတူနူဏံ မိက်ဂွံဗတိုက်ဖ္အောဝ် ဗ္ကန်ဖျန်ဏာကဵု ညးလုပ်ဂကောံအလဵုအသဳတအ်ရ” ဂှ် သ္ကိုပ်ဝန်ဇၞော် ဟီုသ္ဂးလဝ်ရ။
သ္အာၚ်နူဏံပၠန် နဌာနဝန်ဇၞော်ပရေၚ်စဵုဒၞာဂှ် သဳကၠဳချပ်ဂၞန်ကဵု ညးကေတ်လဝ်တာလျိုၚ် ပ္ဍဲလ္ပာ်ဒေသပၞာန်(၂) သၞောတ်စှ်ေစှ်ေတုဲ ၜိုတ်သၟဟ်အစောန်မာန် ဂၠာဲဂၠံၚ်ဍာန်နဲကဲခိုဟ်တုဲ သွက်ဂွံစဵုဒၞာအာ ညးဍုၚ်ကွာန်တအ် ဒးလွဳပရာရောၚ်ဂှ် ဟီုသ္ဂးလဝ်ဏီရ။
ဆေၚ်ရာကဵုပရေၚ်အုပ်ဓုပ် ပ္ဍဲတိဍာ် အလဵုအသဳပရေၚ်ညဳသၟဟ်ကောန်ဂကူ ထိၚ်ဒဝ်လဝ်တအ်ဂှ် ညံၚ်ဂွံဒှ်ကၠုၚ်ဗီုပြၚ် ဇြဟတ်ဂွံခိုဟ်ကၠုၚ်ကီု၊ သွက်ဂွံကၠောန်ရေၚ်တၠုၚ် ညံၚ်ပရေၚ်ဂီုကၠီုသၞောဝ်ဥပဒေ ဂွံစိုပ်ကၠုၚ်တရဴကီု၊ သွက်ဂွံကၠောန်ရေၚ်တၠုၚ် ပရေၚ်သဳကၠဳပ္ညဳပ္ညပ် ဆေၚ်ရာကဵုပရေၚ်ဍုၚ်ကွာန် လၟေၚ်ဟွံဂွံပိုတ်သ္ကုတ်ကီုဂှ်လေဝ် ဗတိုက်ဖ္အောဝ်လဝ်ရ။
ညးတာလျိုၚ် ဌာနဝန်ဇၞော်ပရေၚ်ဍုၚ်သ္အာၚ်တအ်ကီု သီုကဵုဌာနဝန်ဇၞော် အခေါၚ်အရာမၞိဟ်၊ ဌာနဝန်ဇၞော်သၞောဝ်ဓဝ်တအ်လေဝ် စပ်ကဵုကမၠောန် ပြဝကံၚ်ဇြဳပၞာန် ပ္ကီုပရာပ်ပြိုက်ဂစိုတ်ဒၟံၚ်မၞိဟ် အကာဲအရာပရေံပရေံ ဗီုလၟုဟ်ဏံတုဲ သွက်ဂွံလးထ္ၜး ညံၚ်ညးဂၠးကဝ်တအ် ဂွံတီကၠးဂၠိုၚ်တိုန်ကၠုၚ်မာန် ကေုာံသွက်ဂွံကလေၚ်ယိုက်ယဵုကဵု ပရေၚ်ဗဗွဲဓဝ်မာန်ဂှ်လေဝ် ဒးဂိုတ်ဂစာန်အာရောၚ်ဂှ် သ္ကိုပ်ဝန်ဇၞော် NUG သ္ဂးလဝ်ရ။
အခိၚ်လၟုဟ်ဏံဂှ် ဒပ်ကံၚ်ဇြဳပၞာန် ကၠောန်သ္ပဒၟံၚ် ပရေၚ်ရပ်ဒက်ပြိုက်ဂစိုတ် ညးဍုၚ်ကွာန် ပ္ဍဲကဵုဒေသ ဇြဟတ်ပရေၚ်ပၠန်ဂတး တဴဒၟံၚ်တအ်ဂှ်ကီု၊ ပလီုပလာ်ဒၟံၚ်ကောန်သမ္ဘာ လတူညးဗြဴတအ်ကီု က္လိလောန်ဒၟံၚ် ပရေၚ်ဖံက်ပ္ကဝ်အခေါၚ်အရာမၞိဟ် ယုတ်တ်ပရေံပရေံရ။
ကောံဓရီုဂှ် သ္အာၚ်နူသမ္မတယာယဳ အလဵုအသဳပရေၚ်ညဳသၟဟ်ကောန်ဂကူ ဒူဝါလယှဳလ၊ သ္ကိုပ်ဝန်ဇၞော်မာန်ဝေန်ခိုၚ်တာန်တုဲ ညးတာလျိုၚ်ဂမၠိုၚ်ကီု သီုဝန်ဇၞော်ဌာနမဆေၚ်စပ်ဂမၠိုၚ် တိုန်စိုပ်လဝ်ရဂှ် ဂွံတီကေတ်လဝ်ရ။
ပရိုၚ်-သြၚ်လောန်တိုၚ်(မ်)