သိုဝ်လ် – မာတ်ချ်(၁၀)
ပ္ဍဲကဵုအကြာ ပရေၚ်ပြိုၚ်ပ္ကာန်လွဟ်လက်နက် ပ္ဍဲဒေသသၠုၚ်တိုန်ကၠုၚ် နအသိၚ်ဇၞော်ဇၞော်ဂှ် နကဵုကိုဝ်ရဳယျာသၠုၚ်ကျာ သွက်ဂွံစဵုဒၞာ ပရေၚ်ကိုဝ်ရဳယျာသၟဝ်ကျာဘပဠဒၟံၚ်ဂှ် ဟွံဒးကေတ်လွဟ်လက်နက်နျူကလဳယျာပုဟ်ဂှ် သ္ကိုပ်ဝန်ဇၞော် ဟာန်ဒက်ခ် ဟီုလဝ် ပ္ဍဲအခိၚ်သ္ပအေန်တာဗျူကဵု ဌာန်ပရိုၚ် CNN ရ။
ပ္ဍဲသၞာံတုဲကၠုၚ်တေံဂှ် ကိုဝ်ရဳယျာသၟဝ်ကျာ ကလေၚ်ကၠောန်ရေၚ်တၠုၚ်ကၠုၚ် အစဳဇန်လွဟ်လက်နက်ပၠန်တုဲ ပရေၚ်စမ်ၜတ် ပန်ဗလးကမ်လှောဝ်ထိၚ်သၞေဝ် မပါလုပ် သီုပရေၚ်ပန်ပှော်ကမ်လှောဝ်ထိၚ်သၞေဝ် တတ်ကၠောံအာ လ္တူဍုၚ်ဂျပါန် ကဵုလဝ်သတိ ကုကၟိန်ဍုၚ်နာနာ အလန်ကိုပ်ကၠာအိုတ်ဂှ် ဟိုတ်နူကၠောန်ရေၚ်တၠုၚ်လဝ် သၞောတ်ဗ္ၜတ်လောန်ၜက်ဂှ်ရ ကိုဝ်ရဳယျာသၠုၚ်ကျာကေုာံ သၟဝ်ကျာဂှ် ဒှ်ကၠုၚ် အကာဲအရာ ပရေံအိုတ်ရ။
“နကဵုပိုဲဂှ် သွက်အရၚ်ဇကုဇကု ဓမံက်ထ္ၜးလဝ် ပရေၚ်က္လေၚ်ဗ္ဂပ်လွဟ်လက်နက် ချိုတ်တ်ပၠိုတ်တ်ရ။ ပ္ဍဲကဵုအကံၚ်တၚ်ဂၞၚ် သွဟ်လဝ် ဆေၚ်စပ်ကဵု ဍာ်ဒကေဝ်နျူကလဳယျာဂှ် နကဵုပိုဲဒးကၠောန်သ္ပ မမိက်ကဵုမွဲမွဲဏောၚ်” ဂှ် သ္ကိုပ်ဝန်ဇၞော် ကိုဝ်ရဳယျာသၠုၚ်ကျာ ဟီုသ္ဂးလဝ်ရ။
သွက်သ္ဂောံပါဲဓလေတ် တၚ်ရန်တၟံကိုဝ်ရဳယျာသၟဝ်ကျာမာန်ဂှ် နကဵုကၟိန်ဍုၚ်ဇြဟတ်အမၠံက်ရုံရုံဂပ်ဂပ် နွံဒၟံၚ်ဏံ ဒှ်ဂၠံၚ်တရဴဍာံပြ ဟွံသေၚ်ရဂှ် ဟီုသ္ဂးလဝ်ဏီရ။
“ပံၚ်တောဲကဵု ကၟိန်ဍုၚ်ပံၚ်ကောံအမေရိကာန် စုက်က်လုက်က်တုဲ ဒက်ပ္တန်ကၠုၚ်လဝ် အစောန်စရာဲပရေၚ်စဵုဒၞာ ရုံဂပ်ၜိုတ်ထေက်ကြိုက် မာန်ကၠုၚ်ဗွဲမဂၠိုၚ်ရ။ သွက်ကိုဝ်ရဳယျာသၟဝ်ကျာ ဂွံပလီုပလာ် လွဟ်လက်နက်နျူကလဳယျာမာန်ဂှ် ဒးဆက်ကဵုအာ ဇြဟတ်ဓရိုဟ် ဗွဲမဂၠိုၚ်ဏီရ။ ဟိုတ်ဂှ်ရ ပိုဲပံၚ်တောဲကဵု တွဳဗွိုၚ်ကၟိန်ဍုၚ်နာနာတုဲ ထေက်ကဵုဒးရေၚ်တၠုၚ်အာဏောၚ်” ဂှ် သ္ကိုပ်ဝန်ဇၞော် ကိုဝ်ရဳယျာသၠုၚ်ကျာ ဟီုသ္ဂးလဝ်ရ။
သွက်ဂွံကလေၚ်ပၠန်တဲကဵု ကိုဝ်ရဳယျာသၟဝ်ကျာမာန်ဂှ် ရေၚ်တၠုၚ်သၠုၚ်ပတိုန် ပရေၚ်ပ္ကတ်ပ္ကေၚ်ပၞာန် အမေရိကာန်၊ ကိုဝ်ရဳယျာသၠုၚ်ကျာ ကေုာံဂျပါန်တအ်တုဲ နကဵုကၟိန်ဍုၚ် ပိုၚ်ပြဳကၠုၚ်နျူကလဳယျာ စှ်ေကိုန်ဗျူဟာမာန်ဒၟံၚ်ရဂးတုဲ တၚ်သမ္မတကိုဝ်ရဳယျာသၠုၚ်ကျာ ယွောန် ဟီုဂးလဝ်လေဝ် ကေၚ်မံၚ်တိတ်လဝ် ပ္ဍဲဂိတုဂျာန္နဝါရဳတေံရ။
နကဵုကိုဝ်ရဳယျာသၠုၚ်ကျာ စွံအာရီုကဵု ပရေၚ်ပရဟ်ဒုၚ်ပလေဝ်ပလေတ် သွက်ဂွံဆေၚ်မုက်ကဵု ကၟိန်ဍုၚ်ဇိုၚ်ဝုတ်ဒိုဟ် ဗ္ဂပ်လဝ်လွဟ်လက်နက်နျူကလဳယျာဂှ်ကီု ပ္ဍဲသၟဝ်အကာဲအရာ ဟွံကၠးပ္ဍးဂှ်လေဝ် ထေက်ကဵုဒးပံက်စွံလဝ် ပရေၚ်ဟီုဂးသဳကၠဳရောၚ်ဂှ် စပ်ကဵု တၚ်သမ္မတဟီုသ္ဂးလဝ်တုဲ သ္ကိုပ်ဝန်ဇၞော်ကလေၚ်ဟီုပလန်လဝ်ရ။
“ပ္ဍဲပရေၚ်သ္ဂောံတာဒၞာ ကိုဝ်ရဳယျာသၟဝ်ကျာမာန်ဂှ် ပိုဲဒးပလှ်လွဟ်/ဖျေံလွဟ်ဟွံသေၚ်။ လုကဴကိုဝ်ရဳယျာသၟဝ်ကျာ ဓလေတ်ပါဲဒၟံၚ် တၚ်ရန်တၟံနျူကလဳယျာ သ္ကာတ်မြဟ်လောန်ဒၟံၚ်ဂှ် ပိုဲဟွံဂွံကၟာတ်လဝ် ဂၠံၚ်တရဴပရေၚ်သဳကၠဳဟီုဂးပုဟ်” ဂှ် သ္ကိုပ်ဝန်ဇၞော် ကိုဝ်ရဳယျာသၠုၚ်ကျာ မာဿတာဟာန် ဟီုသ္ဂးလဝ်ဏီရ။
Ref,CNN