ၜဳကလေၚ်၊ မာတ်ချ် (၁၀)
ပၠံၚ်သၟုဟ်ဓာတ်မွဲ မၞုံလက္ကရဴဘာလကျာ် ဖယျာၚုက်တဝ်၊ ကွာန်ကတဝ်သုက်၊ ဂကောံကွာန်ပံက်တဝ်၊ ပွိုၚ်ဍုၚ်ၜဳကလေၚ်၊ တွဵုရးဍုၚ်မန် ဒးဒုၚ်ဗ္တိုဟ်ထ္ကးဂှ်ရ တူအာပၟတ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပၠံၚ်သၟုဟ်ဓာတ်ဏံဂှ်ဝွံ ပ္ဍဲဂိတုမာတ်ချ် (၉) ၜိုတ်အခိၚ်နူဂယး (၃) နာဍဳဂှ် ဟိုတ်နူဒးဒုၚ်ဗ္တိုဟ်ထ္ကးကဵုမာၚ်ဂှ်ရ ပၠံၚ်သၟုဟ်ဓာတ်ဂှ် ပိုတ်အာ (၃) ပေပြၚ်ရ။
ပၠံၚ်သၟုဟ်ဓာတ် ဒးဒုၚ်ဗ္တိုဟ်ထ္ကးကဵုမာၚ်တုဲ တူလဝ်ပၟတ် ဟွံပိုတ်သ္ကုတ်တုဲ ၜိုတ်နူဂယး (၈) နာဍဳဂှ် ပၟတ်ပၠိုတ်အာဂှ် ညးဒေသမွဲတၠ သ္ဂးရ။
ပၠံၚ်သၟုဟ်ဓာတ် ဒးဒုၚ်ဗ္တိုဟ်ထ္ကးကဵုမာၚ်ဂှ် ပ္ဍဲဂိတုမာတ်ချ် (၉) အခိၚ်လဒေါဝ်တ္ၚဲဂှ် ဒပ်ကံၚ်ဇြဳပၞာန်ကဵု ညးမၞုံတာလျိုၚ် ပၠံၚ်သၟုဟ်ဓာတ်တံ ကၠုၚ်စိုပ်ပလေဝ်ပလေတ်ဒၟံၚ်ဂှ် ဂွံတီကေတ်ရ။
အတိုၚ်ဂလာန်ညးဒေသတံဂှ်မ္ဂး ပၠံၚ်သၟုဟ်ဓာတ်ဏံဂှ်ဝွံ ၜိုန်ရဟီုဂးဒၟံၚ် ဒှ်လာၚ်သၟုဟ်ဓာတ် နူကဵုလ္ဂုၚ် မသွံတြးလဝ် ကုဍုၚ်သေံဏောၚ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာဟွံမာန်ဏီရ။
ကံၚ်ဇြဳပၞာန်ဂှ် ပၠံၚ်သၟုဟ်ဓာတ် မဒးဒုၚ်ဗ္တိုဟ်ထ္ကးထောံဂှ်ဝွံ ဒဒှ်ရဒှ်ပၠံၚ်သၟုဟ်ဓာတ် ဇောတိက−ကာန်ပံက်−မျာၚ်ကလေဝ်−လ္ဂုၚ်ဂှ်ကီု၊ ဟိုတ်နူလၟေၚ်ဒဒှ်ဏံတုဲ နူကဵုစက်ပါ်ပရအ်ဇြဟတ်ဓာတ် မစကာသၟုဟ်ဓာတ်သဘာဝလှဝ်ကာ ဗလးပ္တိတ်သၟုဟ်ဓာတ် အပ္ဍဲသၞောတ်ဇြဟတ်ဓာတ်မာန်ဂှ် ယအ်စှ်ေအာ ဗ္ဒါဲ ၅၅ မဂ္ဂါဝတ်ဂှ် လလောၚ်ပ္တိတ်လဝ်ရ။
ဆ္ဂး ဟိုတ်နူဒှ်အခိၚ်သှ်လိက်တန်လုပ်တက္ကသိုလ်ဂှ်ရ ဇြဟတ်ဓာတ်လလဳ မယအ်စှ်ေအာတံဂှ် သၠုၚ်ပ္တိုန်ကၠောန်ပ္တိတ်ကဵုအာ နူစက်ပါ်ပရအ်ကဵုဇြဟတ်ဓာတ်လလဳ ဇြဟတ်ဍာ်တံဏောၚ်ဂှ် ကဝ်ပဝ်ရေယှေန် ဇြဟတ်ဓာတ်လလဳဍုၚ်လ္ဂုၚ်ကံၚ်ဇြဳပၞာန် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ် -ကဝ်ပဝ်ရေယှေန် ဇြဟတ်ဓာတ်လလဳဍုၚ်လ္ဂုၚ်