တိုဝ်ကျိုဝ်၊ မာတ်ချ် (၁၀)
ပ္ဍဲဍုၚ်ဂျပါန် စပ်ကဵုအမှု မကဵုလဝ်ယၟု “ပွပကီုပရာပ်သူယှဳ” ဂှ်တုဲ ရပ်လဝ်မၞိဟ် (၃) တၠရ။
ဟိုတ်နူဗဳဒဳယောသ္ကုတ် မဓၟက်လဝ် ဗီုစသုၚ်သူယှဳ ပ္ဍဲကဵုဆေၚ်သူယှဳမွဲဆေၚ် မတက်လဝ်သီုကဵုပြဝဟွံသ္အးဇ္ၚးတံပါဂှ်တုဲ သ္ကဵုရဲသုၚ်စောဲအောန်လာၚ်တံ က္တဵုဒှ်လဝ်ဒေါသအိုတ်ရ။
ကြဴနူဗဳဒဳယောဏံ ပြးထၞာန်အာတုဲဂှ် မၞိဟ်ရာန်စဗွဲမဂၠိုၚ်ဂၠေၚ် က္တဵုဒှ်လဝ် အရာဟွံပြေစိုတ်တံတုဲ ဗၠာဲသၟိၚ်ဂမၠိုၚ် ရပ်စပ်ထောံ နကဵုတၚ်စောဲစပ် ဒဒှ်ရပ္တိတ်ဇြဟတ်ဂ္စါန် သွက်ဂွံပလာပ်ပထုဲ ပရေၚ်ပိုန်ဒြပ် ဆေၚ်စသုၚ်ကူရာသူယှဳဂှ်ရ။
ပ္ဍဲကဵုညးမပါလုပ် မထဍုတ်ဓၟက်လဝ် ပ္ဍဲကဵုဗဳဒဳယောသ္ကုတ် မွဲတၠဂှ် ဍကေတ်သူယှဳမွဲ နူကဵုပ္ၚာန်မွဲမတုဲ သိက်စုတ်ပ္ဍဲပါၚ် အတိုၚ်မွဲရ။ လက္ကရဴဂှ် ပွချဳဒရာၚ် လ္ၚာ်သုၚ်ထ္ၜးဍာ်ကဝ်ခရံက် နူကဵုပလၚ် မစွံလဝ် သွက်ညးဂမၠိုၚ်ဂွံသုၚ်စောဲတံ ပါလုပ်ရ။
ဗဳဒဳယောသ္ကုတ် မတက်လဝ် ညံၚ်ရဴပြဝလအာတုပ်သာ်ဏံဂမၠိုၚ်ဝွံ အပ္ဍဲသတ္တာဟ ပြးထၞာန်အာလဝ် သီုကဵုတွေတ်တာ ကေုာံ တေတ်ထံက်ပါလုပ်ကီု သီုပ္ဍဲကဵုဇာဇၞိက်ပရေၚ်မၞိဟ်နာနာတံရ။
နဒဒှ်ပွထဍုတ်ဓၟက် သ္ဇက်ဒးဇအိုန်ဇရတၞဟ်သ္အာၚ်ဂမၠိုၚ်ဂှ် နကဵုလပုဟ်တဲ မပလေတ်လဝ်ဍာ်ပါၚ်တံဂှ် ကေတ်ဇိုတ်ပ္ဍဲသူယှဳတုဲ ကလေၚ်စွံလ္တူပ္ၚာန်ဂှ်ကီု၊ ဒဵုကဵုကဆံၚ်ခၜေတ်ထောံပါၚ်ခေါ်ဍာ်လက်ဖက် ကၠာဂွိုအ်ကလေၚ်စွံလ္တူဂြန်တံဂှ် ကၠောန်သ္ပလဝ်ရ။
ဟိုတ်နူပြဝထဍုတ်ဓမက်ဏံတုဲ ဒဒှ်ရရပ်ဒက်လဝ် မၞိဟ်(၃) တၠ နူကဵုဒေသအိုၚ်ချဳသ္ကုတ်လဒေါဝ်ဂှ် ပ္ဍဲဂိတုမာတ်ချ် (၉) တေံ ဗၠာဲသၟိၚ်ဒေသဂမၠိုၚ် ဟီုကဵု အေအေဖ်ပဳရ။
ရပ်ဒက်လဝ် ယိုဝ်ဂါရိုဝ်ယှဳနဝ် အာယုက် (၂၁) သၞာံဂှ်ကဵု သၟတ်ဗြဴအာယုက် (၁၅) သၞာံမွဲတၠ ဟွံမိက်ထ္မံက်ယၟုတံ ပ္ဍဲကဵုတ္ၚဲဗုဒ္ဓဝါဂှ်တုဲ ပ္ဍဲကဵုညးတံ မၞိဟ်တြုံအာယုက် ၁၉ သၞာံ မဒှ်ကောန်ဂကောံ မရနုက်ကဵုတတိယဂှ်လေဝ် ဂိတုတုဲကၠုၚ်တေံ ရပ်ထိၚ်လဝ်ဂှ် ညးမၞုံအခေါၚ်ဟီုဂးဒပ်ဗၠာဲသၟိၚ်မွဲတၠ ဟီုရ။
အမှုရာဇဝတ် မက္တဵုဒှ်အာလဝ် ရုရုသံသံၚ် ပ္ဍဲဍုၚ်ဂျပါန် မၞိဟ်တီဂၠိုၚ် နဒဒှ်ဍုၚ်ကဆံၚ်ပရေၚ်သ္အးဇ္ၚး သၠုၚ်ဂှ်ဝွံ ဒှ်ပရေၚ်ရပ်ဒက်ကိုပ်ကၠာအိုတ်ရောၚ်ဂှ် သ္ဂးရ။
ဟိုတ်နူပြဝထဍုတ်ဓၟက်သာ်ဏံတုဲ သၞာဲဒဴမၞုံဆေၚ်သူယှဳဂမၠိုၚ်ဝွံ ဒးကၠောန်သ္ပသ္အးဇ္ၚးလဝ် ကာမံက်တိုန်တုဲ သ္ကဵုက္တဵုဒှ်ပလာပ်ပထုဲ ကုကမၠောန်ဂေတ်ဂြိပ်လၟေၚ်ၚ်တံရောၚ်ဂှ် ညးမၞုံအခေါၚ်ဟီုဂး နူကဵုဂကောံဒပ်ဗၠာဲသၟိၚ်ဂှ် ဟီုရ။
ၜိုန်ရဟွံဂွံစောဲအမှုဏီကီုလေဝ် ပွမကၠောန်သ္ပပလီုပလာ် ကမၠောန်ပရေၚ်ပိုန်ဒြပ် အနိၚ်အပိုၚ်ဂှ်ဝွံ လ္ဂောံကဵုသၞောဝ်ဂျပါန်မ္ဂး ဒးဒုၚ်ဒုဟ်ဒဏ်မသ္ကာတ်မြဟ်တံမာန်တုဲ ဒးဒုၚ်ဖျေံထံၚ် ပိသၞာံမာန်ဏောၚ်ဂှ် သ္ဂးရ။
ကမ္ပဏဳ မကၠောန်ၜိုတ်ဒၟံၚ် ကမၠောန်သူယှဳဏံ ဆေၚ်လစှ်ေဍောတ်တ် ဗ္ဒါဲ ၅၀၀ မၞုံပ္ဍဲဍုၚ်ဂျပါန်ဂှ် ဒဒှ်ရထံက်ဂလာန် ကုပရေၚ်ရပ်ဒက်ဏံဂှ် ထ္မံက်ထ္ၜးလဝ် ပ္ဍဲတၚ်လောၚ်တြးဂှ်ရ။
“ ဒဒှ်မထဍုတ်ဓၟက်သာ်ဏံ မသ္ကဵုဇီုကပိုက်ကၠေံ ကုသၞောတ်ဆေၚ်စသုၚ်ပိုယ်တံ မဒုၚ်သ္ဇိုၚ်ကဵုလ္တူဓဝ်ပတှ်ေ ကေုာံ လ္တူညးရာန်စတံဂှ်ဝွံ ဒှ်ဒုဟ်ရာဇဝတ်တုဲ ဗွဲကြဴ ဒှ်ကၠုၚ်ပွပတုပ်ဗက်တံမာန်ဂှ်ကီု၊ ပွမဒးဒုၚ်ဖျေံဒုဟ်ဒဏ်ဂှ်ဝွံ လညာတ်သမ္တီ အပ္ဍဲဗွိုၚ်မၞိဟ်တံ ပြးထၞာန်ကၠုၚ်ဏောၚ်ဂှ် ပိုယ်တံ စၟဳကေတ် နကဵုစိုတ်အးအးရောၚ်” ဂှ် လ္ပာ်ကမ္ပဏဳ လလောၚ်ပ္တိတ်လဝ်ရ။
ဒၟါနူကဵုပြဝသာ်ဏံတံ က္တဵုဒှ်လဝ် အဆက်က်ဂှ်ရ နဒဒှ်အဆက်အစေန် ပရေၚ်ဇီုကပိုက်နွံမွဲဂှ် ကြဴနူဗဳဒဳယောသ္ကုတ် သၟတ်ပၠိုၚ်ၚ်မွဲတၠ မကၠာန်ဒၟံၚ် က္ဍိုပ်ပဠၚ်ဍာ်ကဝ်ခရံက်မွဲ ပြးထၞာန်အာတုဲဂှ် သထံက်ယှေဝ်ယျာ တဆိပ်ဂှ် ပ္ဍဲဂိတုတုဲကၠုၚ်တေံ ကေၚ်စှ်ေအာလဝ်ရ။
“ညအ်ဂှ် သ္ဇက်ဒးဇအိုန်ဇရရဏောၚ်၊ ပိုယ်တံ အာဆေၚ်သူယှဳဟွံမာန်ရပုဟ်” သာ်ဝွံ ပ္ဍဲအခိၚ်ဂှ် ညးသုၚ်စောဲတွေတ်တော ဂကူဂျပါန်မွဲတၠ ကလေၚ်ချူလဝ်ရ။
Ref: CNA