တၞၚ်သဳ၊ မာတ်ချ်(၁၁)
ရးဒေသဇၞော်တၞၚ်သဳ၊ ပွိုၚ်ဍုၚ်တၞၚ်သဳ၊ ပ္ဍဲကွာန်လေဝ်တေတ်ဂှ် သီုပေါဲဗတိုက်ဟၟဲမွဲသာ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်ကြာန်န်ဂှ်ရ ကောန်ၚာ် (၁)တၠချိုတ်တုဲ ဂွံလဝ်ဘဲဝပ် (၄)တၠရဂှ် ညးတာလျိုၚ်ဒပ်ပံၚ်ကောံ မဟာမိတ်တၞၚ်သဳတအ် ဟီုကဵု ဌာန်ပရိုၚ် သြၚ်လောန်တိုၚ်(မ်)ရ။
ပ္ဍဲဂိတုမာတ်ချ် စၟတ်တ္ၚဲ (၁၀) အခိၚ်နူဂယး ၜိုတ် ၈ နာဍဳဂှ် ဒပ်ကံၚ်ဇြဳပၞာန် ဖျေဴဗ္ဒပ်ပ္ဍဲဘာလကျာ်လတူဒဵု ကွာန်သာန်တေတ်၊ ပွိုၚ်ဍုၚ်တၞၚ်သဳ ပေါဲဗတိုက်ဟၟဲမွဲသာ် ပန်ဖျေံလဝ်လွဟ်ဇၞော် ပ္ဍဲကွာန်လေဝ်တေတ်ဗၟံက် ဟွံအောန်နူ ၁၁ အလန်ရ။
မကမ်လွဟ်ဇၞော် ကံၚ်ဇြဳပၞာန်ပန်ဏာလဝ်ဂှ် ဟိုတ်နူပြဟ်ဒတုံ ပါ်ခတိုဟ်လဝ် ပ္ဍဲကွာန်လေဝ်တေတ်ဗၟံက်ဂှ်ရ ကောန်ၚာ်အာယုက် (၈) သၞာံမွဲတၠ ဒးချိုတ်အာတုဲ မၞိဟ် (၄) တၠ ပါလုပ်သီုမိနော်ဗျုမွဲတၠ ဂွံလဝ်ဘဲဝပ်ရဂှ် သ္ဂးလဝ်ရ။
ဟိုတ်နူလွဟ်ဇၞော်ဒပ်ကံၚ်ဇြဳပၞာန်တုဲ သ္ၚိဒၟံၚ်ဟွံအောန်နူ (၂) မ ဇီုကပိုက်ဒး လီုလာ်လဝ်တုဲ ညးဒေသ ၂၀၀ တၠပြၚ်တအ်လေဝ် ဒးဂြိပ်ပါဲဒၟံၚ် ပ္ဍဲဒၞာဲဗၠးဘဲရဂှ် ဂွံတီကေတ်ရ။
ဂိတုဖေဖဝ်ဝါရဳ တုဲကၠုၚ် ပ္ဍဲစၟတ်တ္ၚဲ (၁၈)ဂှ်လေဝ် ဟိုတ်နူဒပ်ကံၚ်ဇြဳပၞာန် မၞုံပ္ဍဲပြၚ်ဗောဓိ ပန်ပှော်လဝ်လွဟ်ဇၞော်တုဲ ဒၟာနူဒတုံပြဟ် ပါ်ခတိုဟ်လဝ် ပ္ဍဲကွာန်ဗာန်ဠဝ်ဗၟံက်တုဲ သ္ၚိဒၟံၚ် (၅) မ သီုဘာဗ္တောန်လိက် ဒးလီုလာ်လဝ်ရ။
ပွိုၚ်ဍုၚ်တၞၚ်သဳဂှ် ကြဴနူလလောၚ်တြးပရေၚ်အုပ်ဓုပ်ပၞာန်တုဲ ပွဒပ်ကံၚ်ဇြဳပၞာန် ထ္ပက်ကရောၚ်ပၞာန်ကီု၊ ပန်ပှော်ဖျေံလွဟ်ဇၞော် ပ္ဍဲကွာန်ကီု ဟိုတ်နူကၠောန်သ္ပဒၟံၚ် အဆက်က်ဂှ်ရ ညးဒေသ ကဵုလ္ၚီ ဒးဂြိပ်ဒဴပါဲဓလေတ်ဒၟံၚ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- ဒေါၚ်မေန်