ရေဝ်၊ မာတ်ချ်(၁၁)
ဗ္ဒပ်ပံၚ်တောဲ ကံၚ်ဇြဳပၞာန်ကဵု ဒပ်စဵုဒၞာၜိုဟ်လလံဂကူမန် မၞုံပ္ဍဲဒဒန်ခါန်တေန် ဗ္ဒာဲကွာန်ဇြုမ်နတာ၊ ဂကောံကွာန်ဒဵုဗျု၊ ပွိုၚ်ဍုၚ်ရေဝ် တွဵုရးဍုၚ်မန်ဂှ် တ္ၚဲဏံ ဂိတုမာတ်ချ် စၟတ်တ္ၚဲ (၁၀) အခိၚ်နူဂယး လုပ်စိုပ်ဗတိုက်လဝ်ရဂှ် ဂကောံလကိုဟ်ဍုၚ်ရေဝ် ဟီုသ္ဂးလဝ်ရ။
ဗ္ဒပ်ပံၚ်တောဲကံၚ်ဇြဳပၞာန် ဖျေံလဝ်ဗ္ဒပ် ဇြဟတ်မၞုံ ဗ္ဒာဲ(၁၅) တၠဂှ် တ္ၚဲဏံအခိၚ်ဂယးၜိုတ် ၇ နာဍဳ ဂကောံလကိုဟ်ဍုၚ်ရေဝ် လုပ်စိုပ် ဗတိုက်လဝ်ရ။
ပ္ဍဲပရေၚ်လုပ်စိုပ်ဗတိုက်လဝ် ဗ္ဒပ်ပံၚ်တောဲကံၚ်ဇြဳပၞာန်ဂှ် လ္ပာ်ကံၚ်ဇြဳပၞာန် (၆)တၠ ဒးချိုတ်လဝ်တုဲ ကောန်ဒပ်သှ်ေနူဂှ် ဟိုတ်နူဂြိပ်တိတ်အာလဝ်ဂှ်ရ သီဂွံလဝ်ဗ္ဒပ်ရဂှ် က္ဍိုပ်သ္ကိုပ်ဂကောံလကိုဟ်ဍုၚ်ရေဝ် ဟီုသ္ဂးရ။
ဆ္ဂးပ္ဍဲပရေၚ်လုပ်ဗတိုက်လဝ်ဂှ် နူကဵုတံဒပ်ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်ရေဝ် ပန်နၚ်လွဟ်ဇၞော်အဆက်က်ဂှ်ရ သွက်ဂွံလပှ်ကေတ်လွဟ် ဟွံပြေပြံၚ်တုဲ ဆုတ်က္လေၚ်တိတ်ကၠုၚ်မာန်လဝ်ရဂှ် သ္ဂးလဝ်ရ။
ဗ္ဒပ်ပံၚ်တောဲကံၚ်ဇြဳပၞာန် မၞုံပ္ဍဲဒဒန်ခါန်တေန်ဂှ် ဒှ်ဗ္ဒပ်ကံက်ကေတ်ဒၟံၚ်သြန် ကွဳစက်အာတရဴညးဍုၚ်ကွာန် ကေုာံကွဳစက်ပ္ဍိုက်ဗၞိက်မွဲဗ္ဒပ်ရဂှ် ဂွံတီကေတ်နူညးဒေသတအ်ရ။
ဒပ်စဵုဒၞာၜိုဟ်လလံဍုၚ်မန် ဖျေံလဝ်လွဟ်ကဵုကံၚ်ဇြဳပၞာန်ဂှ် ဒှ်ဂကောံရပ်လွဟ်ကောန်ဍုၚ်အရၚ်မန် လလောၚ်တြးလဝ် ဒဒှ်ရပြံၚ်သၠာဲဒက်ပ္တန်ကၠုၚ် ဒပ်ပၞာန်ညးဍုၚ်ကွာန် ဒုၚ်ဩဇာကံၚ်ဇြဳပၞာန် ပ္ဍဲဂိတုအံၚ်တဝ်ဗာ စၟတ်တ္ၚဲ ၁၀ တုဲကၠုၚ်တေံ မွဲဂကောံရ။
ဂကောံလကိုဟ်ဍုၚ်ရေဝ်ဂှ် ပ္ဍဲဂိတုမာတ်ချ် တုဲကၠုၚ် စၟတ်တ္ၚဲ (၇)ဂှ်လေဝ် အာစိုပ်ဗတိုက်လဝ် ဗ္ဒပ်ကၚ်ကံၚ်ဇြဳပၞာန် မၞုံပ္ဍဲဒဒန်ဇၞော်ပွိုၚ်ဍုၚ်ရေဝ် နကဵုဒရုမ်တုဲ လ္ပာ်ကံၚ်ဇြဳပၞာန်ဒးချိုတ်လဝ် (၂)တၠရ။
ပရိုၚ်- သြၚ်လောန်တိုၚ်(မ်)
ဗီုရုပ်- ဂကောံလကိုဟ်ဍုၚ်ရေဝ်(ဗီုရုပ်တြေံ)