နဳပဝ်၊ မာတ်ချ် (၁၁)
ပ္ဍဲဍုၚ်နဳပဝ် က္ၜၚ်ကျာ ဂကူ Dash 8 turboprop (တာဗိုဝ်ပရပ်) နူကဵုလာၚ်တရဴကျာ Shree မွဲဖ္ဍိုက်ဂှ်ဝွံ အခိၚ်မပဝ်ယာန်ဒၟံၚ်ဂှ် ဟိုတ်နူကဵုစက်တူအာ မွဲမဂှ်ရ ဒးစှ်ေလဝ် ကာမံက်တိုန်ရ။
က္ၜၚ်ကျာဝွံ ၜိုန်ရဒးစှ်ေလဝ် ကာမံက်တိုန်ကီုလေဝ် သီုညးဖအိုတ်ဂှ် စှ်ေလဝ် ဗွဲမဂီုကၠီုဗၠးဘဲတုဲ ပ္ဍဲဂိတုဂျာန္နဝါရဳတေံ ကြဴနူ ATR 72 လီုစှ်ေတုဲဂှ် ဒဒှ်ရသၠုၚ်ပ္တိုန်လဝ် တၚ်ကဵုသတိ သွက်အန္တရာယ်တရဴကျာဟွံဂွံမွဲ အလုံကၟိန်ဍုၚ်ဂှ် ညးတာလျိုၚ်တံ ဟီုဂးလဝ်ရ။
က္ၜၚ်ကျာ နူကဵုလာၚ်တရဴကျာ Shree ဂှ်ဝွံ နူကဵုဍုၚ်ခါတ္တမန္ဒူ မၞုံသ္ကုတ်ပလိုတ်သၟဝ်ကျာ ဍုၚ်နဳပဝ် အာလ္ပာ် ဘဟိုၚ်ရာဝါဂှ် မၞိဟ် ၇၈ တၠ သီုကဵုပါလုပ် ညးယိုက်ဝန်က္ၜၚ်ကျာတံ ပါဗက်ကၠုၚ်လဝ်ရ။
“မှာလဳက္ၜၚ်ကျာဂှ် ပလံၚ်လဝ်ပရိုၚ် တၚ်ကဵုသတိ ဒဒှ်မစက်လ္ပာ်ပုၚ်ပၟတ်တူဂှ်တုဲ ပြံၚ်လဝ်ဂၠံၚ်တရဴက္ၜၚ်ကျာဂှ် လ္ပာ်ခါတ္တမန္ဒူ လွာဲဂှ်ရ” သာ်ဝွံ ညးမၞုံအခေါၚ်ဟီုဂး နူကဵုလာၚ်တရဴကျာ Shree ဟီုကဵု ဌာန်ပရိုၚ် Reuters ရ။
ညးမၞုံအခေါၚ်ဟီုဂး နူကဵုဂကောံသၟိၚ်တၠတရဴကျာဍုၚ်နဳပဝ် (CANN) ဂှ် က္ၜၚ်ကျာဝွံ စှ်ေလဝ် ပ္ဍဲခါတ္တမန္ဒူ ဂီုဂီုကၠီုကၠီုတုဲ ဒဒှ်ရညးအာတရဴ ကေုာံ ညးယိုက်ဝန်က္ၜၚ်ကျာတံသီုဖအိုတ် ဗၠးဘဲဂှ် ဟီုဂးလဝ်ရ။
“အခိၚ်က္ၜၚ်ကျာ စှ်ေတိဂှ် အကာဲအရာပၟတ်တူဂှ် ဟွံဂွံဆဵုလဝ်ပုဟ်” သာ်ဝွံ ဟီုဂးလဝ်ဏီရ။
ပ္ဍဲကဵုက္ဍဟ်ဒဵုသၠုၚ်အိုတ် လ္တူဂၠးတိဏံ (၁၅) မ သီုကဵုပါလုပ် ဒဵုဨဝရာတ်ဂှ် ဒဵုရေၚ်နဳပဝ် မပါလုပ် ပ္ဍဲကဵု (၈) မဂှ်ဝွံ စၟတ်သမ္တီက္ၜၚ်ကျာသရိုဟ်စှ်ေ မွဲဏှမွဏှတံ နွံတုဲ လၟေၚ်ဒဒှ်ဗွဲမဂၠိုၚ်ဂၠေၚ်ဂှ်ဝွံ ဒၟါနူကဵုအကာဲအရာဗလးတိ မခက်ခုဲတံဂှ်ကဵု အကာဲအရာရာသဳဥတု ပြံၚ်လှာဲလွာဲလွာဲဂှ်တံဂှ်တုဲ ဒးက္တဵုဒှ်လဝ်ရ။
က္ၜၚ်ကျာ ATR 72 နူကဵုလာၚ်တရဴကျာ Yeti ပိုၚ် မၞိဟ် (၇၂) တၠ မပါဗက်ကၠုၚ် ပ္ဍဲဂိတုဂျာန္နဝါရဳဂှ်ဝွံ အခိၚ်မစှ်ေလဝ် ပ္ဍဲကဵုဍုၚ်အာတရဴ ပိုဝ်ခါရာ မၞုံခြာဇမ္ၚောဲ ၁၂၅ ကဳလောမဳတာ နူကဵုပလိုတ်ဍုၚ်ခါတ္တမန္ဒူဂှ် သရိုဟ်စှ်ေလဝ်ရ။
အပ္ဍဲကဵုလၟေၚ်တရဴဏံဂှ် အပံၚ်မၞိဟ် (၇၁) တၠ ချိုတ်လဝ်တုဲ မၞိဟ်မွဲတၠဂှ် ကၠေံဒၟံၚ်ဖိုဟ်မဒှ်တုဲ ညးဝွံလေဝ် ချိုတ်အာယျဂှ် ချိၚ်ခယျလဝ်အိုတ်ရ။
Ref: CNN