နေဗျဳဒဝ်၊ မာတ်ချ် (၁၁)
သွက်ဂွံပံၚ်တောဲလလောၚ်တြး စရၚ်မၞိဟ်မွဲမွဲ၊ ဂကောံသ္ကအ်မွဲမွဲ၊ ဂကောံဗော်သွး ကေုာံ ညးဒုၚ်တာလျိုၚ်ဂမၠိုၚ် မရီုဗၚ်ကဵုဇြဟတ် မကလိလောန်လဝ် ကုပွပကီုပရာပ်တံ ကရောံလိက်ဗီုပြၚ်မွဲစွံတံဂှ် ခၞံပကောံပကေဝ် တၚ်နၚ်မနွံပၟိက်တံတုဲ ကံၚ်ဇြဳပၞာန် လလောၚ်ပ္တိတ်ကၠုၚ် နဲဥပဒပရေၚ်ဗ္တိုက်သ္အးပွပကီုပရာပ် မသ္ဂောံပလံၚ်ကဵု ကုလသမဂ္ဂတံဂှ်ရ။
ဌာနဝန်ဇၞော်ကာအပ္ဍဲဍုၚ် ကံၚ်ဇြဳပၞာန်ဂှ် ရပ်စပ်အခေါၚ်ကၠောန် မပအပ်ကဵုလဝ် လ္ဂောံကဵုၝောံပိုဒ်ပါ် (က) ၊ ၝောံပိုဒ် ၇၂ သၞောဝ်ဗ္တိုက်သ္အးပွပကီုပရာပ်တံဂှ်တုဲ နကဵုတၚ်တုပ်စိုတ် ဂကောံအလဵုအသဳကၟိန်ဍုၚ်ဂှ် လလောၚ်ပ္တိတ်လဝ် နဲဥပဒေဏံဂှ်ရောၚ် ပ္ဍဲဂိတုမာတ်ချ် (၁၀) တေံ ထ္မံက်ထ္ၜးလဝ် ပ္ဍဲလိက်ပရိုၚ်တြးဝါဒတံရ။
လ္ဂောံကဵုတၚ်နၚ်ပရိုၚ် ခိုၚ်ၚ်ကၠိုက်က်ကဵုဒှ်၊ နူကဵုတၚ်ပ္တိုန်ထ္ၜးနၚ်တံကဵုဒှ် ပ္ဍဲကဵုဒေသ မၞုံအခေါၚ်စဳရေၚ် အတိုၚ်ၝောံပိုဒ်ဗ္တိုက်သ္အးပွပကီုပရာပ် (၂) တံဂှ် ပူဂဵု၊ ဂကောံဗော်သွး မပါလုပ်ကလိလောန်လဝ် ပ္ဍဲပရေၚ်ကလိလောန်ဒုဟ်ဒဏ် ဟွံသေၚ်မ္ဂး ပ္ဍဲအရာကလိလောန်၊ ကဵုဇြဟတ်၊ ရီုဗၚ်၊ ဖ္တိုက်ဖ္အောဝ် ကုပွပကီုပရာပ်တံဂှ် ဒးပ္တိုန်ထ္ၜး ဂကောံဗဟဵုတေံ နကဵုသက်သဳရောၚ်ဂှ် ထ္မံက်ထ္ၜးလဝ်ရ။
ပ္ဍဲကဵုတၚ်နၚ်မ္ဒးပ္တိုန်ထ္ၜးတံဂှ် လၟေၚ်ဒဒှ် မကလိလောန်ပွပကီုပရာပ်ဗွဲခမၞောန်၊ တၚ်နၚ်မထ္မံက်ပ္တိတ်ကလိဂွံဂမၠိုၚ် ကေုာံ သက်သဳဂမၠိုၚ်၊ ယၟုရဲပကီုပရာပ် ဟွံသေၚ်မ္ဂး ယၟုဂကောံပကီုပရာပ်၊ ယၟု ကေုာံ ဌာန်ဒၟံၚ်၊ ဂၞန်ဖုၚ်၊ အဳမေလ် ကောန်ဂကောံပကီုပရာပ် မဆေၚ်စပ်တံဂှ် ပါလုပ်ရ။
သ္အာၚ်နူဂှ်ပၠန် ပရူပရာသၟာပကီုပရာပ် ဟွံသေၚ်မ္ဂး ဂကောံပကီုပရာပ်တံဂှ်ကီု၊ သၟာပကီုပရာပ် အပ္ဍဲဍုၚ် မ္ၚးဍုၚ် မဆက်စပ်ဒၟံၚ်ကဵု ပွပကီုပရာပ်တံ ဟွံသေၚ်မ္ဂး ဂကောံပကီုပရာပ်တံဂှ်ကီု သီုကဵုဟိုတ်ပရူပရာ နွံပၟိက်သ္ဂောံလလောၚ်တြး နဒဒှ်ရဲပကီုပရာပ်တံဂှ်လေဝ် ဒးပ္တိုန်ထ္ၜးကီုရောၚ်။
သၟာပကီုပရာပ် နွံပၟိက်သ္ဒးလလောၚ်တြးစၟတ်သမ္တီသာ်ဏံတံ ဟွံသေၚ်မ္ဂး သက်သဳ သြန်လှုဲဂကောံဗော်သွး မပိုၚ်ပြဳတံကဵု ဒၞါဲဒတန်ကပေါတ်ကိရိယာမၞုံ ဗွဲလစှ်ေတံဂှ်ကီု၊ တၚ်နၚ်မဆက်စပ်ကဵု ပွမကဵုဇြဟတ်၊ ပွမထံက်ပၚ်သြန်လှုဲ ကုပွပကီုပရာပ်တံဂှ်လေဝ် ဒးပ္တိုန်ထ္ၜးကီုဏောၚ်ဂှ် သ္ဂးရ။
အခိၚ်ဍုၚ်အမေရိကာန်ကီု ဍုၚ်ရးပလိုတ်တံဂမၠိုၚ်ကီု စၟတ်ထောံကံၚ်ဇြဳပၞာန် နဒဒှ်ဂကောံပကီုပရာပ်တုဲ မကၠောန်သ္ပဒၟံၚ် ကၟာတ်လဒဵုတပ်ဒဏ်တံဂှ် လလောၚ်ပ္တိတ်နဲဥပဒေ သာ်ဏံဂှ်ဝွံ သွက်ဂွံခၠေဝ်ပလန် လလောၚ်တြး ကုဂၠးတိ သွက်ဂွံလီဠာန်စောဲဂဗုတ်မာန်ဂှ် ခၞံပကောံပကေဝ်လဝ်စရၚ်ရောၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ် ပါ်ပါဲလဝ်ရ။
“အလုံဂၠးတိမွဲ စၟတ်လဝ် စကစ နဒဒှ်ဂကောံပကီုပရာပ်တုဲ အခိၚ်မကၠောန်ဒၟံၚ် ကၟာတ်လဒဵုတပ်ဒဏ်ဂှ် ဍေံတံ (စကစ) ပကီုပရာပ်ဒၟံၚ် ဟွံသေၚ်ပုဟ်၊ NUG, PDF တံ ဂကောံရပ်လွဟ်ကောန်ဍုၚ်အရၚ် မသှ်ေဒၟံၚ်တံ ဒှ်ဂကောံပကီုပရာပ်တံရောၚ်ဟီုဂှ် သွက်ဂွံကလေၚ်ခၠေဝ် သွက်ဂွံလီဠာန်စောဲအမှု ကုဂၠးတိဂှ်တုဲ ပလေဝ်ပလေတ်ဒၟံၚ် စရၚ်ဏံရ။ ကၠောန်စရၚ်ဏံတုဲ ပလံၚ်ကဵု ကုလသမဂ္ဂကဵုဒှ် ပလံၚ်ကဵု ကံၚ်ဇြဳအခေါၚ်အရာမၞိဟ်ကဵုဒှ် မုဟွံတၟေၚ်ပုဟ်။ ပွပကီုပရာပ်ကံၚ်ဇြဳပၞာန်တံ သက်သဳဂၠိုၚ်ကဵုဠက် အလုံဂၠးတိဂှ် နွံဒၟံၚ်တုဲတုဲရ။ ဟိုတ်ဂှ်ရ ဒၟါနူကၠောန် နကဵုနဲကဲဏံဂှ် သာတုဲတၟေၚ်ကၠုၚ်ဟွံသေၚ်ပုဟ်” သာ်ဝွံ ညးသ္ဂးရ။
အတိုၚ်နဲဥပဒေ ဗ္တိုက်သ္အးပွပကီုပရာပ် ကံၚ်ဇြဳပၞာန်ဂှ်မ္ဂး ရပ်စပ်စကာ ဍုၚ်ဇိုၚ်ဝုတ်ဒိုဟ်တံ ကေုာံ ဍုၚ်သ္အာၚ် မဆေၚ်စပ်တံ နဒဒှ်ဗ္ဒိုပ်ဖျေံသ္ဇိုၚ်တုဲ လုပ်စိုပ်အပ္ဍဲဒၞါဲဒေသ မဂွံအခေါၚ်စဳရေၚ်တံဂှ်တုဲ စရၚ်ညးမကလိလောန်လဝ် ပွပကီုပရာပ်မွဲမွဲ၊ ညးဒုၚ်တာလျိုၚ် ဂကောံဗော်သွးတံဂှ် နူကဵုသၟိၚ်တၠ ဍုၚ်သ္အာၚ်မဆေၚ်စပ်တံ သွက်ဂွံပ္တိတ်ကဵုတၚ်လလောၚ်တြးတံဂှ် ဒးပလံၚ်ကဵု ဌာနဝန်ဇၞော်ကာဍုၚ်သ္အာၚ် မွဲကရောံသက်သဳ သ္ဂောံအာတ်မိက်မာန်တံရောၚ် သ္ဂးရ။
သ္အာၚ်နူဂှ်ပၠန် ကုသၟာပကီုပရာပ် ကေုာံ ဂကောံပကီုပရာပ် နူကဵုဍုၚ်မိတိမဇကု မလလောၚ်တြးလဝ်တံဂှ် ဒးပလံၚ်ကဵုတၚ်နၚ် ဇရေၚ်ဂကောံဗ္တိုက်သ္အးပွပကီုပရာပ်ဍုၚ်နာနာ ကေုာံ ကုလသမဂ္ဂတံရောၚ်တုဲ ၜိုတ်ဒှ်မာန် ဒးကေတ်အရေဝ်ရောၚ်ဂှ် ထ္မံက်ထ္ၜးလဝ် ပ္ဍဲနဲဥပဒေဂှ်ရ။
ညးရေၚ်တၠုၚ်ဂဗုတ် ကၠတ်ထဝ်သၞောဝ်ဓဝ်ဝှ်ကြံၚ် ဥူကျဳမျေတ်ဂှ်လေဝ် အခိၚ်ကံၚ်ဇြဳဂီုကၠီုကုလသမဂ္ဂ ကလိဂွံလဝ် သက်သဳအမှုရာဇဝတ် ဂကောံပၞာန်မကလိလောန်လဝ်တံတုဲ ပ္ဍဲကဵုအကာဲအရာဒှ်မံၚ်ဒဂူ သွက်ဂွံရေၚ်တၠုၚ် ဗီုနွံပၟိက်တံဂှ် ကံၚ်ဇြဳပၞာန် ဗက်ကၠောန်ဒၟံၚ် နကဵုဂၠံၚ်ဍာန်ကလုတ်တမာန်သာ်ဏံဂှ်ဝွံ တၟေၚ်ကၠုၚ်ဟွံသေၚ်ပုဟ်ဂှ် ထံက်ထ္ၜးလဝ်ရ။
“ပ္ဍဲကဵုအကာဲအရာဗီုဏံဂှ် ဍေံတံ (စကစ) ချပ်ဒးတုဲ ဗက်ကၠောန်ဒၟံၚ်မတံဏံရ။ တၟေၚ်ကၠုၚ်ကွေံကွေံဟွံသေၚ်ပုဟ် ဍေံတံဂှ် အလဵုအသဳပၞာန် ဟွံရှ်ေသှ်ေသၞောဝ်ဓဝ်တံဂှ် တီမံၚ်အတိုၚ်ဂၠးတိရ။ ဗ္တံဟွံဂၠု နူသ္ဂာဗ္တံပုဟ်။ ဍေံတံ မုစၞောန်ပျးစၞောန်ပျး၊ ညအ်ဂှ် ဒှ်အဟောသိကံဍေံတံရ။ ဟိုတ်နူဍေံတံ သ္ဇက်ဂွံကၠောန်ဟွံမွဲဂှ်ရ ကလေၚ်ပြာပ်လုပ်ကၠုၚ် နကဵုနဲကဲကလုတ်တမာန်ပၠန်ရ။ ၜိုတ်ကဆံၚ်ဏံရ နွံ” သာ်ဝွံ ညးသ္ဂးရ။
စပ်ကဵုကလိလောန် ပွပကီုပရာပ်တံဂှ်တုဲ စၟံစၟံညးမနွံအပ္ဍဲဍုၚ်ဂှ် နဒဒှ်သၟာပကီုပရာပ်ကဵုဒှ်၊ ကုဂကောံဗော်သွးမွဲမွဲဂှ် နဒဒှ်ဂကောံပကီုပရာပ် ဟွံသေၚ်မ္ဂး နဒဒှ်ညးဒုၚ်တာလျိုၚ် ကေုာံ ဂကောံဗော်သွး မပါလုပ်ဆက်စပ်တံကဵုဒှ် တၚ်သ္ဂုတ်သွာတ် ကံၚ်ဇြဳပရေၚ်ဂီုကၠီုကုလသမဂ္ဂ ဖျေံစၟတ်တုဲ ဂကောံဗဟဵုဂှ် ဒးကဵုသမ္တီလလောၚ်တြး ပ္ဍဲကဵုပရိုၚ်မဳဒဳယာတံရောၚ်ဂှ် ထ္မံက်ထ္ၜးလဝ်ရ။
ကုသၟာပကီုပရာပ် ကေုာံ ဂကောံဗော်သွး လလောၚ်ပ္တိတ်လဝ် သာ်ဏံတံကဵုဒှ်၊ မၞိဟ်မရီုဗၚ်ကဵုဇြဟတ် ကုဍေံတံကဵုဒှ် ဂကောံပကီုပရာပ်နူကဵုဍုၚ်သ္အာၚ် မထံက်ပၚ်သြန်လှုဲ နကဵုမွဲမွဲဗီုတံကဵုဒှ် ဗီုနွံပၟိက် သွက်ဂွံကေတ်အရေဝ်ဂှ် မ္ၚးနူဒးကဵုပရိုၚ် ကုသၟိၚ်တၠဍုၚ်သ္အာၚ် မဆေၚ်စပ်တံသၟးဟွံက သီုကဵုဒးကဵုပရိုၚ် ကုဂကောံဗၠာဲသၟိၚ်ဍုၚ်နာနာတံဏောၚ် သာ်ဝွံ သ္ဂးလဝ်ရ။
သ္အာၚ်နူဂှ်ပၠန် သြန်လှုဲ၊ ကပေါတ်ပိုန်ဒြပ် ရဲပကီုပရာပ်၊ ဂကောံပကီုပရာပ် ဟွံသေၚ်မ္ဂး ဂကောံမပါလုပ်ဆက်စပ်ဂမၠိုၚ် ကေုာံ ညးဒုၚ်တာလျိုၚ်ဂမၠိုၚ် မပိုၚ်ပြဳလဝ်တံဂှ် ညံၚ်လှဲပြံၚ်၊ ပြံၚ်လှာဲ၊ ပၞုက်၊ ပလေံပလီု ကေုာံ ပြံၚ်လှာဲပကာရတံ ဟွံဂွံဂှ် ဒးလလောၚ်ပ္တိတ်အမိၚ်တုဲ ကုသြန်လှုဲ ကေုာံ ကပေါတ်ကညောတ်တံဏံဂှ် ညးလဵုမွဲမှ ကၠောန်သ္ပပရေၚ်ပြံၚ်လှာဲ၊ ပရေၚ်ရေၚ်တၠုၚ် သြန်လှုဲတံ ညံၚ်ဂွိုအ်ဂွံဂှ် ဒးလလောၚ်ပ္တိတ်တၚ်ကၟာတ်လဒဵုတံရောၚ်ဂှ် ထ္မံက်ထ္ၜးလဝ် ပ္ဍဲနဲဥပဒေဂှ်ရ။
ပရိုၚ်−သြၚ်လောန်တိုၚ်(မ်)