မတ်မလီု၊ မာတ်ချ် (၁၄)
ပ္ဍဲတွဵုရးဍုၚ်မန် ဟိုတ်နူဗြဲဂူ ဟွံသေၚ်ကဵုအခိၚ်အခါတံ ကေုာံ ကျာသ္ကာတ်ပိုက်တံဂှ်တုဲ ခံက်ၜဵုစဲတ္ၚဲတံ ဗ္ဒါဲကြပ်ဖအိုတ် ဇီုကပိုက်လီုလာ်လဝ်တုဲ ၜဲ ကေုာံ သြောံဂန် မဒှ်သတ်တဵုလွဳမုဟ်ကျာတံဂှ်လေဝ် ဇီုကပိုက်လီုလာ်တံ ဂၠိုၚ်လဝ်ဂှ် သၟာဂူယာတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုမာတ်ချ် (၁၂) အခိၚ်ဗ္တံဂှ် ဟိုတ်နူဗြဲအခိၚ်အခါဟွံသေၚ်တံ ဂူတုဲ ဍာ်လုပ်စိုပ် အပ္ဍဲခံက်ၜဵုတံ နွံလဝ်တုဲ ၜဲမရတ်သီလဝ်တံဂှ်လေဝ် ဟိုတ်နူဍာ်ဗြဲတုဲ ဇီုကပိုက်လီုလာ်အာလဝ်တုဲ ပ္ဍဲကဵုခံက်သြောံဂန်တံဂှ်လေဝ် ဟိုတ်နူကျာသ္ကာတ်ပိုက်တုဲ တၞံဂမၠိုၚ်ကဝ်တုဲ လီုလာ်အာတံ နွံလဝ်ရ။
ရဲကၠောန်ၜဵုမွဲတၠဂှ် ဟိုတ်နူဗြဲပလီုခံက်ၜဵုတံတုဲ ဆောံလေၚ်လဝ် လျိုၚ်ပသာၜဵု ဂၠိုၚ်ကဵုဠက်တုဲ သွက်ဂွံကလေၚ်ပ္တိတ် ၜဵုမာန်ဂှ် အောန်အိုတ် ဒးကလေၚ်ကေတ်အခိၚ် ဗၞတ် ပွဳပွူ (၂၀) တ္ၚဲပၠန်ဂှ် သ္ဂးရ။
“သၞာံတုဲတေံ ၜိုတ်အခိၚ်ဏံမ္ဂး ၜဵုပိုယ်တံ မတိတ်ဒၟံၚ်လၟေၚ်ၚ် ၜိုတ်အခိၚ်ၜဵုအိုတ်ဂှ်တှ်ေ (၃) ကိုဋ်ရ။ သၞာံဏံဂှ် ၜိုတ် (၂) ကိုဋ်ဟွံပေၚ်ပုဟ်။ ၜိုတ် (၁) ကိုဋ်ကဵု (၈) ဠက်ရ နွံညိကီု။ သွက်ရဲကၠောန်ၜဵုတံဂှ် လဇုဲအာမ္ဂးတှ်ေ ဗြဲပလီုဗီုဏံခ္ဍၚ် ရဲကၠောန်ၜဵုတံ ဒှ်ဒဒိုက်ခ္ဍၚ်ရ။ ပွဒးဆောံလေၚ်ဂှ် သာဂၠိုၚ်ခ္ဍၚ်ရ။ သွက်ဂွံကလေၚ်မၚ် အခိၚ်လက္ကရဴဂှ် ပိုယ်တံ ဒးကလေၚ်ကဵုအခိၚ် ၜိုတ် (၂၀) တ္ၚဲ (၁၅) တ္ၚဲဏီရ။ တ္ၚဲကာတ်ခိုဟ်ဟ်မှ၊ ယဝ်ရဗြဲဆက်ဂၠုဒၟံၚ် အတိုၚ်ဏံရဟီုမ္ဂး ပိုယ်တံ သက်ဂွံကၠောန်ၜဵုဂှ် လဇုဲအာကွေံကွေံဏောၚ်။ ပွမဒးဆောံလေၚ်ဂှ် သာဂၠိုၚ်ကၠုၚ် သိုက်က်ဏောၚ်၊ ဒမြိပ်တိတ်ပိုယ်တံဂှ်လေဝ် သာတုဲယအ်စှ်ေကၠုၚ်ဏောၚ်” သာ်ဝွံ သ္ဂးရ။
ဟိုတ်နူဗြဲပလီုခံက်ၜဵုတံတုဲ ခံက်ၜဵုမွဲခံက် မကၠောန်ပ္တိတ်ၜဵုဂၠိုၚ်တံဂှ်မ္ဂး အောန်အိုတ် ၜိုတ် (၁၀၀) ကိုဋ် ကျဗြံမာန်တုဲ သွက်ဂွံကလေၚ်စကမၠောန်ဂှ် တမ်ရိုဟ်သြန်လှုဲတံ အခက်အခုဲနွံဒၟံၚ်ဂှ် ဂွံတီကေတ် ဇရေၚ်ရဲကၠောန်ၜဵုတံရ။
အပ္ဍဲကာလဒပ်ပၞာန်သီအဝဵု ပွိုၚ်ၜါသၞာံဂှ် သီုကဵုဗြဲပလီုရာသဳဥတုကီု သီုကဵုခရိတ်အိုတ်နာနာ မဇၞော်သၠုၚ်ဒၟံၚ်တံဂှ်တုဲ ရဲကၠောန်ၜဵုတံဝွံ ပ္ဍဲရာသဳၜဵုသၞာံဏံဂှ်လေဝ် ထပ်ဒးဂဗလဝ် ဗြဲပလီုခံက်ၜဵုတံပၠန်ရ။
သ္အာၚ်နူဂှ်ပၠန် ဟိုတ်နူကဵုဗြဲဂူ ဟွံသေၚ်ကဵုအခိၚ်အခါတံဂှ်ရ ၜဲမရတ်သီလဝ်တံ ဒးအာဍာ်ဗြဲတုဲ ၚုဟ်ခိုဟ်ဟ်ဂှ် ဟွံဂွံရတုဲ ပ္ဍဲသြောံဂန်တံဂှ်လေဝ် ဒၟါနူကဵုကျာသ္ကာတ်ပိုက်တံဂှ်ရ ဒးဂဗဒၟံၚ်ကဵု အကာဲအရာကျဗြံမာန်တံရောၚ်ဂှ် ညးတဵုလွဳမွဲတၠ ဟီုရ။
“ ရဲပါ်တုဲ မဂအုံလဝ်တံ ယဝ်ရဗြဲဆက်ဂူမ္ဂး အာဟဂှ်ရ။ ညံၚ်ကဵုၜဲကလုတ်ကီုရ ဍေံလေဝ် ကလုတ်လောဲဒၟံၚ်ကီု၊ ၜဲကလုတ်ဂှ်တှ်ေ သာပရေံရ။ ၜဲဂှ် အိုတ်အာတၟာလအ်ယျ။ ၜဲဇၞော်မွဲဂကူရ သှ်ေ။ ကလုတ်လောဲတုဲ ညးစအကြာတံဂှ် ဍေံတံ ဟွံမိက်ဒးစိုတ်စကွေံကွေံပုဟ်။ ယှအ်ၚုဟ်တုဲ ရာန်ရ။ လၟုဟ်ဗြဲဂူတုဲ သြောံဂန်တံဂှ် ဟွံအောန်ပုဟ်။ လၟုဟ် သြောံဂန်သဂြာတံဂှ် လှာပ်အာတၟာဂလိုၚ်ရ။ တၞံဍေံဂှ်တှ်ေ မွဲဟတ်ပြၚ်တံ။ ဒၞါဲၜိုတ်ဂၞိၚ်တံ သီုဖအိုတ်ဂှ်တှ်ေ လီုအာဟွံအောန်ရ အဏံဂှ်။ ဗြဲဂှ် ကိစ္စဟွံမွဲပုဟ်။ နူဗ္တံဏံ ကျာပိုက် သ္ကာတ်ကွေံကွေံ၊ သြောံဂန်ဖအိုတ် သၟာဗ္ၚတံ ကျဗြံတၟာဂလိုၚ်ဏောၚ်။ ကလေၚ်ဒးကျာတုဲ နူဗ္တံဏံ ညံၚ်ကဵုဍိုက်ဒး ကြပ်ဗ္ဒါဲမွဲခံက်ကီု သြောံဂန်တံ လှာပ်အာအိုတ်ရ။ တၞံဍောတ်တှ်ေ သက်သာညိ၊ ရဲတၞံဇၞော်ဇၞော်တံဂှ်တှ်ေ ကျပေၚ်ၚ်ရ” သာ်ဝွံ သ္ဂးရ။
ရာသဳဥတုဖံက်ပၠန် ဗီုလၟုဟ်တုဲ ဟိုတ်နူဗြဲအခိၚ်အခါဟွံသေၚ်တံ ဂူဂှ်ရ ကမၠောန်ၜဵုမၞုံအပ္ဍဲတွဵုရးတံကီု သီုကဵုရဲတဵုလွဳၜဲ ကေုာံ သြောံဂန်တံလေဝ် ဒးဂဗဒၟံၚ် ပရေၚ်ဆောံလေၚ်တုဲ ဟိုတ်နူအကာဲအရာဗြဲဆက်ဂူမာန်တံ နွံဒၟံၚ်ဂှ်ရ ပရေၚ်ဆောံလေၚ်တံ ဂၠိုၚ်ကၠုၚ်မာန်ဏောၚ်ဂှ် တၠဂူယာတံ သ္ဂးအိုတ်ရ။
ပ္ဍဲတွဵုရးဍုၚ်မန်ဂှ် နဒဒှ်ကမၠောန်ၜဵုစဲတ္ၚဲဂှ် ခံက်ၜဵုအပံၚ်ဨက (၄၂၀၀) ပြၚ်နွံတုဲ လၟေၚ်သၞာံ လျိုၚ်တာန်ၜဵု (၄၀၀၀၀) ပြၚ် နူကဵုတိတ်ကၠုၚ်လဝ်ဂှ် ပ္ဍဲသၞာံတုဲကၠုၚ်တေံ ဟိုတ်နူဗြဲပလီုခံက်ၜဵုတံဂှ်တုဲ လျိုၚ်တာန်ၜဵု ၜိုတ် (၂၀၀၀၀) ဓဝ် တိတ်လဝ်ရ။
တိဨက သွက်ပရေၚ်တဵုလွဳၜဲ ကေုာံ သြောံဂန်တံဂှ် (၁၇၀၀၀၀) ပြၚ် နွံတုဲ လၟေၚ်သၞာံ လျိုၚ်တာန်ၜဲနာနာ တိတ်ဒၟံၚ် ပွဳပွူ (၂၀၀၀၀) ရ။
ပရိုၚ်−သြၚ်လောန်ုတိုၚ်(မ်)