နျူဒေလဳ၊ မာတ်ချ် (၁၄)
သွက်သ္ဂောံတးပါဲထောံ တေၚ်ကော်ဆဴသၞောဝ်ဥပဒေ မဖျေံစၟတ်လဝ် လ္တူဖွက်ဆော (LGBT) မပ္တံကဵု ညးမသ္ဍိုက်ဆာန် လ္တူမၞိဟ်ဗြဴရေၚ်သ္ကအ်၊ ညးမသ္ဍိုက်ဆာန် လ္တူမၞိဟ်တြုံရေၚ်သ္ကအ် ကေုာံ မၞိဟ်မပြံၚ်လှာဲလဝ်လိၚ်တံဒှ်တမ် ၜိုန်ရအာတ်မိက်လဝ် ကုရုၚ်သၞောဝ်ဓဝ်ကီုလေဝ် အလဵုအသဳအိန္ဒိယဂှ် ဒဒှ်ရဟွံသ္ပကဵုစၟတ်သမ္တီ ကုပရေၚ်ထပ်တဲလိၚ်တုပ်တံဂှ် လလောၚ်ပ္တိတ်လဝ် ဗွဲမလုပ်သၞောဝ်ရ။
နကဵုဖွက်ဆော LGBT ဂမၠိုၚ် ၜိုန်ရကၠောန်သ္ပအာတ်မိက်လဝ် သာ်ဏံတံကီုလေဝ် ပ္ဍဲကဵုဂိတုမာတ်ချ် (၁၂) ပ္ဍဲကဵုတၚ်လလောၚ်တြးရုၚ်သၞောဝ်ဓဝ်ကၟိန်ဍုၚ် သၠုၚ်အိုတ်ဂှ် အလဵုအသဳအိန္ဒိယဝွံ ဒစဵုဒစး ကုပွမသ္ပစၟတ်သမ္တီ စပ်ကဵုပရေၚ်ထပ်တဲလိၚ်တုပ်တံဂှ်ရောၚ်ဂးတုဲ လလောၚ်ပ္တိတ်ကၠုၚ်ရ။
ပ္ဍဲကဵုတၚ်ဒုၚ်ဂိုၚ်ကေတ် ဌာနဝန်ဇၞော်ကေၚ်ကာသၞောဝ်တံဂှ် အပ္ဍဲဗွိုၚ်မၞိဟ်တံဂှ် ၜိုန်ရပရေၚ်ဆက်ဆောံနာနာ နွံမာန်ကီုလေဝ် ဒဒှ်မသ္ပမ္ၚဵုထပ်တဲ မကဵုလဝ်အခေါၚ်စၟတ်သမ္တီ နကဵုသၞောဝ်တံဂှ် ကုဖွက်ဆောဓမ္မတာတံဟေၚ် သ္ပစၟတ်သမ္တီ ဆက်ထိၚ်ဒဝ်အာရောၚ် ဒဒှ်ရပါလုပ်ပ္ဍဲတၚ်သ္ဂုတ်သွာတ်ရုၚ်သၞောဝ်ဓဝ်ဂှ် ဌာန်ပရိုၚ်ရာ်တာ ချူပ္တိုန်ထ္ၜးလဝ်ရ။
“ညးသ္ဍိုက်ဆာန်လိၚ်တုပ်တံဝွံ မံၚ်စံၚ်ကရောံပါတနာဇကုတံ၊ ပရေၚ်ဆက်ဆောံ မအာလ္ပာ်လိၚ်တံဂှ်ဝွံ ပ္တောံၜတ်ကဵု လ္တူတၚ်ဒုၚ်ဂိုၚ်ကေတ် ဂြောဝ်ဂတာအိန္ဒိယ မပါလုပ်သီုတၠသ္ၚိ၊ သမ္ဘာ ကောန်ဇာတ်တံဂှ် ဟွံဂွံ” ဂးတုဲ ဌာနဝန်ဇၞော် ကယျာန်ပါဲလဝ်ရ။
သ္အာၚ်နူဂှ်ပၠန် ပ္ဍဲကဵုတၚ်လလောၚ်တြးဏံဂှ် သွက်ဂွံပြံၚ်လှာဲ မူဝါဒခၞံသၞောဝ်ကၟိန်ဍုၚ်အတိုၚ်မွဲ မဒက်ပ္တန်လဝ် နကဵုၚုဟ်မးသၞောဝ်ဗ္ၜတ် ဗွိုၚ်မၞိဟ် ကေုာံ ပရေၚ်ဘာသာတံ ဇြိုဟ်ဟ်နက်က်ဂှ် ပ္တိတ်ခန်သၟာန် ကုရုၚ်သၞောဝ်ဓဝ် ဟွံမာန်ပုဟ်ဂှ်လေဝ် ပါလုပ်ဒၟံၚ်ရ။
ပ္ဍဲကဵုလၟေၚ်ဒဒှ် မပြာကတ်ကၠုၚ်ပ္ဍဲဝၚ် အပ္ဍဲသၞာံ ၂၀၁၈ မွဲဂှ် ရုၚ်သၞောဝ်ဓဝ်သၠုၚ်အိုတ်အိန္ဒိယဝွံ စပ်ကဵုကိစ္စ မၞိဟ်တြုံရေၚ်သ္ကအ် သ္ဍိုက်ဆာန်က္တဵုဒှ်မေတ္တာတံဂှ်တုဲ သ္ပဟိုတ်ကဵုသၞောဝ်ခေတ်ကိုဝ်လိုဝ်နဳတေံတုဲ ဒဒှ်မသ္ပမ္ၚဵုထပ်တဲလိၚ်တုပ်တံဂှ် ကေၚ်စၟတ်သမ္တီလဝ် နဒဒှ်ပရေၚ်ဟွံလုပ်သၞောဝ်ရ။
Ref: CNA