ကျာ်မြဟ်၊ မာတ်ချ် (၁၅)
ညးယိုက်ဝန်ထံၚ်စာတ် မၞုံပ္ဍဲထံၚ်ကျာ်မြဟ်၊ တွဵုရးဍုၚ်မန်တံဂှ်ဝွံ အာတ်မိက်လီဠာန်ဒၟံၚ်သြန် နူကဵုကောန်သ္ၚိကၟိန် ကောန်ထံၚ်ပရေၚ်ဍုၚ်ကွာန် မ္ဒးဒုၚ်ဖျေံလဝ်ထံၚ် နကဵုဒုဟ်ဒဏ်ပရေၚ်ဍုၚ်ကွာန်တံ နွံဒၟံၚ်ဂှ် ကောန်ထံၚ်ပရေၚ်ဍုၚ်ကွာန် ညးမကလေၚ်ဗၠးကၠုၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးယိုက်ဝန်ထံၚ် သၟဝ်တဲဌာနက္ဍိုက်ပ်ထံၚ်စာတ် ကံၚ်ဇြဳပၞာန်တံဂှ်ဝွံ ကောန်ထံၚ်ပရေၚ်ဍုၚ်ကွာန် မဒးဒုၚ်ဖျေံလဝ်ထံၚ်တံဂှ် ဟွံကဵုအခေါၚ်ဆဵု ကုသ္ၚိကၟိန်တံမွဲသာ် ထပိုတ်ထောံအဆက်တုဲ မ္ၚးဏံဂှ် လီဠာန်အာတ်မိက်ဒၟံၚ်သြန် နူကဵုကောန်ဂကောံသ္ၚိကၟိန်တံ နဲကဲနာနာသာ်ရ။
ညးယိုက်ဝန်ထံၚ်တံဝွံ ကောန်ထံၚ်ပရေၚ်ဍုၚ်ကွာန်တံ ဟွံတီမွဲသာ် ဒးပြံၚ်ထံၚ်ဏောၚ်၊ ဟွံမိက်ကၠောန်ကလောန်မ္ဂး ဒးကဵုလှုဲဏောၚ် ဂးကဵုကောန်သ္ၚိကၟိန်ကောန်ထံၚ်ပရေၚ်ဍုၚ်ကွာန်တံဂှ်တုဲ အာတ်မိက်ဒၟံၚ်သြန် ဂၠိုၚ်ကဵုကိုဋ်တံနွံတုဲ နွံပၟိက်တုဲ အာတ်သြန်မ္ဂးလေဝ် သြန်မွဲကိုဋ်မ္ဂး ထပိုတ်ကေတ် (၃) ဠက်တံ နွံဂှ် ကောန်ထံၚ်ပရေၚ်ဍုၚ်ကွာန်မွဲတၠ ဟီုရ။
“ကောန်ထံၚ်ပရေၚ်ဍုၚ်ကွာန်ဟီုမ္ဂး ကဵုညးလဵုမှ ဆက်စၠောံဆက်ဆောံ ဟွံဂွံလးလးရ။ ကၟာတ်လဝ်အခေါၚ်ဆဵုဂဗ ကုသ္ၚိကၟိန်တံရ။ ပွမပလံၚ်ဗစိုပ်ဇွောံမစၞစတံဂှ် ကၟာတ်လဒဵုလဝ်ရ။ လဆောဝ်လဆောဝ်မ္ဂး ဇကုဟွံအာတ်မွဲသာ် နူကဵုဍေံတံဂှ် အဏံမုဒးကၠောန်ဏောၚ်၊ ပြံၚ်ထံၚ်ရဏောၚ်၊ ဟွံမိက်ကၠောန်ကလောန်မ္ဂး ဒးကဵု မွဲကိုဋ် ၜါကိုဋ်တံဏောၚ်၊ အာတ်ဒၟံၚ် ပ္ဍဲသ္ၚိတေံ သာ်ဏံရ။ ပိုယ်တံဂှ် ထပိုတ်လဝ်အဆက် ကဵုသ္ၚိကၟိန်တံဂှ်ရ ပိုယ်တံ မုမှဟွံဂွံတီကေတ်ပုဟ်။ မွဲပၠန်ဂှ် ပိုယ်တံ မိက်ဂွံစဇမၠုသတ်တံ၊ သြန်သွက်ဂွံသက်သာတံ မုတံဂှ်ကီု၊ မွဲပၠန်ဂှ် အေဗီုဏံ ဍေံတံ ဗ္ကန်ကဵုညးယိုက်ဝန်တံဂးတုဲ ပိုယ်တံဗ္ကန်ဏာမ္ဂး (၁) ကိုဋ်ဂှ် ထပိုတ် (၃) ဠက်” သာ်ဝွံ သ္ဂးရ။
သ္အာၚ်နူဂှ်ပၠန် ညးယိုက်ဝန်ထံၚ်တံဝွံ အာတ်မိက်သြန် နူကဵုကောန်သ္ၚိကၟိန်မၞုံမ္ၚးတံသၟးဟွံက အပ္ဍဲကဵုထံၚ်ဂှ်လေဝ် နူကဵုမၞိဟ်ပရမ် ဍေံတံမလွဳလဝ်ဂှ် သီုကဵုအာတ်မိက်ဒၟံၚ် ၚုဟ်ဗ္တောန်ဗီုပြၚ်၊ ၚုဟ်ပလေဝ်ဍာ်၊ ၚုဟ်ပလေဝ်ပၟတ်တံကီု နကဵုနဲကဲတၞဟ်သ္အာၚ်နာနာဂှ် အာတ်မိက်ဒၟံၚ်သြန်တံ နွံဒၟံၚ်ရ။
ညးယိုက်ဝန်သၟဝ်တဲ ဌာနက္ဍိုက်ပ်ထံၚ်စာတ်ကံၚ်ဇြဳပၞာန်တံဂှ်ဝွံ ကောန်ထံၚ်ပရေၚ်ဍုၚ်ကွာန် မကဵုသြန် ဍေံတံမအာတ်လဝ် နကဵုနဲကဲနာနာသာ် ဟွံမာန်တံဂှ် ၜုၚ်တက်ပျဲပျာံ အပ္ဍဲထံၚ်တံ နွံဂှ် ညးမကလေၚ်ဗၠးကၠုၚ်တံ သ္ဂးအိုတ်ရ။
ညးရေၚ်တၠုၚ်ဂဗုတ် ကၠတ်ထဝ်သၞောဝ်ဓဝ်ဝှ်ကြံၚ် ဥူကျဳမျေတ်ဂှ်လေဝ် အကာဲအရာ မက္တဵုဒှ်ဒၟံၚ် အပ္ဍဲထံၚ်စာတ်တံဝွံ ဒၟါနူနွံဒၟံၚ်သၟဝ်ပရေၚ်အုပ်ဓုပ်ဒပ်ပၞာန်ဂှ်ရ ပွစဵုဒၞါနူကဵုသၞောဝ်တံဂှ် ဟွံမွဲရတုဲ စိုပ်ကၠုၚ်ဒဵုကဵုကဆံၚ် ဟွံမွဲကဵုစေဝ်ပၞောန်တံရဂှ် ပါ်ပါဲလဝ်ရ။
“သွက်ဂွံအာတ်မိက်ဗီုဏံဂှ်လေဝ် သၞောဝ်ဂှ် ဟွံကဵုလဝ်အခေါၚ်ပုဟ်။ မွဲပၠန်ဂှ် မုရောဟီုတှ်ေ ညံၚ်ဂွံမံၚ်လောဲဂးတုဲ သီုၜါလ္ပာ် တုပ်စိုတ်တုဲကဵုတှ်ေ မွဲဗီု။ ဍာံဍာံဂှ် ကောန်ထံၚ်ဂှ်လေဝ် အခေါၚ်ဂွံရပ်လဝ်သၠုဲဂှ် ဟွံမွဲပုဟ်။ ကောန်ထံၚ်ဂှ်လေဝ် ဒးအပ်လဝ်တုဲ (၁) ကိုဋ်တှ်ေ (၁) ကိုဋ်ရ။ ဒးအပ်လဝ် မွဲကိုဋ်ဂၠိုၚ်အိုတ်ရဏောၚ် ထေၚ်။ ဍေံဂှ် အခိၚ်နွံပၟိက် သွက်ဂွံရာန်ဂဥုဲတံ၊ မဇကုမိက်ဂွံစနွံတှ်ေ ၝမိက်ဂွံစဂှ် ဗ္ကန်ဂွံဒၟံၚ်။ အေတံဏံဂှ်တှ်ေ ရဲဒးထံၚ်တံဏောၚ်။ ရဲၝောံပိုဒ်ပရေၚ်ဍုၚ်ကွာန် မသှ်ေတံဂှ် အခေါၚ်အရာတံဏံရဂှ် ဟွံကဵုပုဟ်။ ဒးထံၚ်တုဲမှဟေၚ် မတံဏံဂှ် ကၠောန်ဂွံဏောၚ်။ မတံဏံဂှ် ဟွံကိတ်ညဳကဵု သၞောဝ်တံပုဟ်။ အခေါၚ်ဂွံအာတ်မိက်ဗီုဏံလေဝ် ဟွံမွဲပုဟ်။ ထံၚ်ဂှ်လေဝ် ဒပ်ပၞာန်ရအုပ်ဓုပ်၊ သၟဝ်ဒပ်ပၞာန်ဂှ် အခေါၚ်ဂွံကလေၚ်ဟီု မုမှဟွံမွဲပုဟ် ဒှ်ဒၟံၚ်ရ။ အေဂှ်တှ်ေ ဒှ်ဒၟံၚ်ဟွံမွဲကဵုသၞောဝ် ဟွံမွဲကဵုစေဝ်ပၞောန်တံရ” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲထံၚ်စာတ်ကျာ်မြဟ်ဂှ် ကပေါတ်စၞစ၊ ဂဥုဲဇဗ ကေုာံ ကပေါတ်အရပ်စပ်ဂမၠိုၚ် နူကဵုသ္ၚိကၟိန် ကောန်ထံၚ်ပရေၚ်ဍုၚ်ကွာန်တံ မပလံၚ်နၚ်တံဂှ်လေဝ် ဟွံကဵုဍိုက်က်ပေၚ်ၚ်တုဲ ညးယိုက်ဝန်ထံၚ်တံဂှ် ၜိုတ်နွံပၟိက် ကေတ်လဝ်တုဲ ကလေၚ်သွံတြးဒၟံၚ် ပ္ဍဲကဵုဆေၚ်သက်သာ မၞုံအပ္ဍဲထံၚ်တံ နွံဒၟံၚ်ဂှ် သ္ဂးရ။
ကောန်ထံၚ်ပရေၚ်ဍုၚ်ကွာန်တံဝွံ ထ္ၜးဟိုတ်အပ္ဍဲထံၚ်နာနာတုဲ အာတ်မိက်ဒၟံၚ်သြန်တံနွံတုဲ မ္ၚးနူဒးဒုၚ်ဝးပ္ကဝ်အခေါၚ်အရာမၞိဟ်တံ၊ ဒးဒုၚ်ၜုၚ်တက်ပျဲပျာံတံဂှ် သီုကဵုဒးဆေၚ်ဒၟံၚ်မုက် ဒဒှ်မဟွံဂွံအခေါၚ်လွဳလွတ်ဂဥုဲတံ ဗွဲမဇၞော်ကဵုဇြဟတ်ရ။
ပ္ဍဲကဵုထံၚ်စာတ်ကျာ်မြဟ် နူတွဵုရးဍုၚ်မန်ဂှ် ကောန်ထံၚ်ပရေၚ်ဍုၚ်ကွာန်တြုံ (၂၀၀) ပြၚ် ကေုာံ ကောန်ထံၚ်ပရေၚ်ဍုၚ်ကွာန်ဗြဴ (၉၀) ပြၚ် မဒးဒုၚ်ရပ်ဖျေံလဝ်ထံၚ် နကဵုၝောံပိုဒ်ပရေၚ်ဍုၚ်ကွာန်ဂမၠိုၚ် နူကဵုလ္ဂုၚ်၊ မာန္တလေဝ်၊ ဗဂေါ၊ တွဵုရးကရေၚ်၊ တွဵုရးဍုၚ်မန်တံကီု သီုနူကဵုဒေသသ္ၚောဲသ္ၚောဲကြပ်ပ်တံ နွံဒၟံၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−သြၚ်လောန်တိုၚ်(မ်)