လ္ဂုၚ်၊ မာတ်ချ် (၁၅)
ကိုန်စဳမာန်ဇြဟတ်ဓာတ်ဍာ်အဇာဇၞော် မဒက်ပ္တန်အာ လ္တူၜဳကြုၚ်ဍုၚ်ဗၟာတံသီုဖအိုတ် သွက်ဂွံဒေါအ်ဒေၚ်ကဵုဂှ် ဂကောံကရေၚ် မၚ်ရံၚ်ၜဳကြုၚ်ဂမၠိုၚ် Karen Rivers Watch အာတ်မိက်လဝ်ရ။
သွက်တ္ၚဲၜဳကြုၚ်ဂၠးတိ ကေုာံ သွက်တ္ၚဲဒစဵုဒစးတာတၟိုန် ပ္ဍဲတ္ၚဲဂိတုမာတ်ချ် (၁၄) ဏံဂှ် ဂကောံကရေၚ် မၚ်ရံၚ်ၜဳကြုၚ် Karen Rivers Watch လလောၚ်ပ္တိတ်လဝ်လစွံစိုတ် အာတ်မိက်လဝ်ရ။
ကိုန်စဳမာန်ဇြဟတ်ဓာတ်ဍာ်အဇာဇၞော် မဒက်ပ္တန်အာ လ္တူၜဳကြုက်မၞုံဍုၚ်ဗၟာတံဂှ်ဝွံ သွက်ညးဍုၚ်ကွာန် ကေုာံ ပွဳပွူသဘာဝ မၞုံဒေသၜဳတတ်ဇွောဝ်အာတံ လလေၚ်ဖဵုနွံဒၟံၚ်ဂှ် သ္ဂးလဝ်ရ။
သ္အာၚ်နူဂှ်ပၠန် သွက်ဂွံထိၚ်ဒဝ်မၚ်မွဲ ၜဳမၞုံကဵုလမျီုတံကဵု သၞောတ်ဂေဟတံဂှ်ကီု၊ ကေုာံ သွက်ဂွံဒေါအ်ဒေၚ်ကဵု ကိုန်စဳမာန်ဇြဟတ်ဓာတ်ဍာ်အဇာဇၞော် မဒက်ပ္တန်အာ လ္တူၜဳကြုၚ်မၞုံဍုၚ်ဗၟာဂမၠိုၚ် မနွံကဵုလလေၚ်ဖဵုဇီုကပိုက်ဂၠိုၚ် စပ်ကဵုဘဝပရေၚ်မၞိဟ် ကေုာံ ပွဳပွူသဘာဝတံဂှ်ကီုဂှ်တုဲ အာတ်မိက်လဝ် ဇရေၚ်အေဂျေန်ဇြဳကုလသမဂ္ဂ အလဵုအသဳဍုၚ်သ္အာၚ် ညးမဓလိုက်တမ်ရိုဟ်တံကဵု မၞိဟ်ပူဂဵုတံသီုဖအိုတ်ရ။
ညးမၞုံအခေါၚ်ဟီုဂး ဂကောံ KRW သဝ်တာဗိုဝ်ဂှ် ဒပ်ပၞာန်သီအဝဵုတုဲ အပ္ဍဲပွိုၚ် (၂) သၞာံ ပ္ဍဲကဵုဒေသကောန်ဍုၚ်အရၚ် မၞုံဍုၚ်ဗၟာတံဂှ် ပရေၚ်ဇီုကပိုက်ပွဳပွူသဘာဝတံ သာဂၠိုၚ်ကၠုၚ်တုဲ ယန္တယာ မရေၚ်တၠုၚ် သ္ပကဵုအရီုတံ ဆောတ်ယောၚ်လီုလာ်စှ်ေကၠုၚ်ဂှ်လေဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
က္ဍိုပ်သ္ကိုပ်ပၞာန်ဂှ်လေဝ် ကလေၚ်ကၠောန်အာ ကိုန်စဳမာန်တၟိုန်ဍာ်ဟာတ်ကျဳ မၞုံလ္တူၜဳသြၚ်လောန် တွဵုရးကရေၚ်တံဏောၚ်ဂှ် ကဵုသမ္တီလလောၚ်တြးလဝ်ရ။
ပ္ဍဲဒၞါဲကိုန်စဳမာန်တၟိုန်ဍာ်ဟာတ်ကျဳဂှ် စနူသၞာံ ၂၀၁၄ တေံတုဲ က္တဵုဒှ်လဝ် ပဋိပက္ခပရေၚ်ပၞာန်တုဲ ပ္ဍဲကဵုညးဍုၚ်ကွာန်ဒၟံၚ်ဒေသတံဂှ်လေဝ် ထောံလသာသ္ၚိဌာန်ဒးဂြိပ်ဒဴဒၟံၚ်တံ နွံဒၟံၚ်ဂှ် ပါလုပ် ပ္ဍဲတၚ်လလောၚ်တြးဂှ်ရ။
အခိၚ်လၟုဟ်ဂှ်လေဝ် ဟိုတ်နူပၞာန်ထ္ပက်ဒပ်ပၞာန်ဗၟာ နူကဵုတရဴကျာ၊ တရဴတိုက်တံဂှ်တုဲ ဒးဆောံလေၚ်လီုလာ်အာလဝ် လမျီုသ္ၚိဌာန်ညးဍုၚ်ကွာန်ဒေသတံသၟးဟွံက သီုကဵုဒးမံၚ်အောပ်မာဒၟံၚ် ပ္ဍဲဒဵုဂြိုပ်တံဂှ်တုဲ နွံပၟိက်ဒၟံၚ်ကဵု အထံက်အပၚ် ပရေၚ်ရီုဗၚ်ဗ္စာရဏာမၞိဟ်တံ မဇၞော်ကဵုပၟိက်ရောၚ်ဂှ်လေဝ် ထ္မံက်ထ္ၜးပါလုပ် ပ္ဍဲတၚ်လလောၚ်တြးဂှ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−MOI