ကံၚ်ဇြဳပၞာန်သုၚ်စောဲကၠုၚ် ဗုမ်ဒးထေၚ်ခယျကေတ်လွဟ်လက်နက်ဓာတု ဂကောံဇြဟ်ပရေၚ်ပၠန်ဂတးတအ် ဟီု

ဗြဝတဳ၊ ဨဗြဴ(၂၆)

ပ္ဍဲပေါဲဗတိုက်မေဝ်ကနေဝ် ပွိုၚ်ဍုၚ်ဗြဝတဳ တိဍာ် KNU ဒပ်မဟာ(၆)ဂှ် နူလ္ပာ်ကံၚ်ဇြဳပၞာန် ကၠောန်သ္ပကၠုၚ် ပရေၚ်ဗတိုက်ပန် နက္ၜၚ်ကျာ အရိုဟ်ဒဒှ်တ္ၚဲသၟးဟွံက သီုကဵုသုၚ်စောဲကၠုၚ်ဗုမ် ဒးထေၚ်ခယျကေတ် လွဟ်လက်နက်ဓာတုရဂှ် ဂကောံဇြဟတ်ပၠန်ဂတးတအ် ဟီုသ္ဂးဒၟံၚ်အိုတ်ရ။

ပ္ဍဲဒေသမေဝ်ကနေဝ် တိဍာ်ဗော်သွးကောန်ဂကူကရေၚ် KNU ဒပ်မဟာ(၆)ဂှ် သ္ပတမ်နူ ဂိတုဨဗြဴ ပထမသတ္တာဟတုဲ ဒပ်ပံၚ်တောဲ ကံၚ်ဇြဳပၞာန် BGF တအ် ဟိုတ်နူထ္ပက်ကၠုၚ်ကရောၚ်ပၞာန် သီုဇြဟတ်ပေၚ်ပေၚ်တုဲ အကြာဒပ်ပံၚ်ကောံ ဂကောံဇြဟတ်ပၠန်ဂတးတအ် ပေါဲဗတိုက်ၜါလ္ပာ် သ္ကာတ်မြဟ်ကၠုၚ်ဒၟံၚ်ရ။

ဂိတုဨဗြဴ စၟတ်တ္ၚဲ (၂၃) ကဵု စၟတ်တ္ၚဲ (၂၄) ပွိုၚ်(၂)တ္ၚဲဂှ် ပ္ဍဲမွဲဗွိုၚ်ဒေသမေဝ်ကနေဝ် ဂကောံဇြဟတ်ပၠန်ဂတးတအ် ကေတ်လဝ်ပရေၚ်ဂီုကၠီုဂှ် နူဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော် ဟွံအောန်နူ (၃၀)ဝါတုဲ ပ္ဍဲကဵုလွဟ်လက်နက်ပန်ဖျေံနၚ်ဗီုဏံဂှ် ဂကူလွဟ်လက်နက်ဇၞော် ချိၚ်ခယျကေတ်ဗုမ်ဓာတု(ဗုမ်သၟုဟ်ဓာတ်) လေဝ် ပါဲလုပ်ဒၟံၚ်ရဂှ် ကရောၚ်ပၞာန်ကဝ်ဗရာ လလောၚ်တြးလဝ် ပရိုၚ်ရ။

သ္အာၚ်နူဂှ်ပၠန် ပ္ဍဲမွဲဗွိုၚ်ဒေသမေဝ်ကနေဝ်ဂှ် ဒပ်ကံၚ်ဇြဳပၞာန် ထပ်ကၠောန်သ္ပကၠုၚ် ပရေၚ်ဗတိုက်ပန်ကဵုက္ၜၚ်ကျာဂှ်ရ ဟိုတ်နူပရေၚ်ပန်ပှော်ဏံတုဲ ဂကောံဇြဟတ်ပၠန်ဂတးတအ် ဇီုကပိုက်ဒးလဝ်ဟၟဲရဂှ်လေဝ် ဟီုသ္ဂးလဝ်ရ။

နူလ္ပာ်ကံၚ်ဇြဳပၞာန် ပရေၚ်ထ္ပက်ဒၟံၚ်ပၞာန်တိုက်၊ ပၞာန်ကျာ ပ္ဍဲမွဲဗွိုၚ်ဒေသမေဝ်ကနေဝ် သ္ကာတ်မြဟ်ဂှ် ထ္ၜးပျးဒၟံၚ် ဒဒှ်ရဍေံတအ် ထိၚ်ဒဝ်တိဍာ်ဟွံမာန်ရဂှ် ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဒပ်ကံၚ်ဇြဳပၞာန်ဂှ် ၜိုန်ရဟီုဂးဒၟံၚ် ထ္ပက်ပၞာန်ဗတိုက်ဒၟံၚ်ကဵု ဂကောံဇြဟတ်ပၠန်ဂတးတအ်ကီုလေဝ် ဍာံဍာံတေံဂှ် ပ္တဝ်လဝ်ကဵု ကောန်အရာပ်ဂမၠိုၚ်တုဲ ကၠောန်သ္ပဒၟံၚ် ပရေၚ်ပန်ပှော်ရဂှ် ပဒိုဝ်သဝ်တဝ်နဳ ဟီုသ္ဂးလဝ်ရ။

သ္ပတမ်နူ ဂိတုဨဗြဴမံက်ဏံတုဲ ဒပ်ကံၚ်ဇြဳပၞာန် ဒပ်ပမၚ်ပယျဵု BGF တအ် ထ္ပက်ပၞာန်ဗတိုက်ကၠုၚ်ဒၟံၚ် ပ္ဍဲဒေသမေဝ်ကနေဝ် တိဍာ်KNU ဒပ်မဟာ (၆) ပ္ဍဲဗလးမုက်တိကီု၊ သီုကဵုဗလးကျာ သ္ကာတ်တ်မြဟ်ဟ်တုဲ ပ္ဍဲအရာဗတိုက်ကၠုၚ်ဗီုဏံဂှ်လေဝ် ပ္တဝ်လဝ်ကဵု ကောန်အရာပ်ညးဍုၚ်ကွာန်တုဲ ကၠောန်သ္ပဒၟံၚ် ပရေၚ်ပန်ပှ်ော ပ္ဍဲကွာန်ဂမၠိုၚ်ရ။

ဟိုတ်နူပရေၚ်ဒပ်ကံၚ်ဇြဳပၞာန်ဗတိုက်လဝ်တုဲ ဘာကျာ်ခရေတ်ယာန်(၁)ဘာကီု သီုကဵုသ္ၚိဒၟံၚ်မၞိဟ် ပ္ဍဲကွာန်မေဝ်ကနေဝ်ဗွဲမဂၠိုၚ် ဒးခရိုဟ်လီုလဝ်တုဲ ညးဍုၚ်ကွာန်ကောန်ဒေသ နူကွာန်မေဝ်ကနေဝ် ကေုာံကွာန်တၞဟ်သ္အာၚ်ဂမၠိုၚ် ဂၠိုၚ်ကဵုလ္ၚီ ဒးဂြိပ်ဒဴဒၟံၚ် ပ္ဍဲဒၞာဲဗၠးဘဲဏီဖိုဟ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် -KNU