သဓီု၊ အဝ်ဂါတ် (၁၂)
ပ္ဍဲကဵုဘာဗ္တောန်လိက် နူအပ္ဍဲတိဍာ်ထိၚ်ဒဝ် ခရိုၚ်သဓီု ဒပ်မဟာ(၁) ဗော်သွးကောန်ဂကူကရေၚ် KNU ဂှ် ဒၟါနူလၟိဟ်ကွးဘာ ဂၠိုၚ်ကၠုၚ်ဂှ်ရ ကပေါတ်ကရိယာ ချူချာဲတံ၊ ခုင်ဗ္တောန်လိက်၊ ခန်ဗ္တောန်လိက်တံ မပါလုပ် သီုကဵုကပေါတ်အထံက်အရီု ဟွံရုမ်ဂပ်တံ ဒးဂဗဒၟံၚ်ရဂှ် ညးမၞုံတာလျိုၚ် ဌာနပရေၚ်ပညာခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗွဲကြဴဒပ်ပၞာန်သီအဝဵုတုဲ ကွးဘာကတ်ဗ္တောန်ဒၟံၚ်လိက် ပ္ဍဲကဵုဘာဗ္တောန်လိက်ကံၚ်ဇြဳပၞာန်တံဝွံ ပြံၚ်စိုပ်ကၠုၚ် ဘာဗ္တောန်လိက် သၟဝ်တဲ ဌာနပရေၚ်ပညာ KNU တံတုဲ ပ္ဍဲကဵုသၞာံဗ္တောန်ပညာ သၞာံဏံရဂှ် လၟိဟ်ကွးဘာ ဟွံအောန်နူကဵု (၅၀၀၀) ပြံၚ်ကၠုၚ်အိုတ်ရ။
ပ္ဍဲကဵုဘာဗ္တောန်လိက် သၟဝ်တဲ KNU တံဂှ် ဒၟါနူကွးဘာတံ ဂၠိုၚ်ကၠုၚ်ဂှ်ရ ဒးဂဗဒၟံၚ်ကဵု ကပေါတ်အထံက်အရီု ဟွံရုမ်ဂပ်တံ မပ္တံကဵု ကပေါတ်ကရိယာချူချာဲတံ၊ ခုၚ်ဗ္တောန်လိက်တံ၊ ခန်ဗ္တောန်လိက်တံတုဲ သွက်ကွးဘာတိက်ပ္ဍဲဘာ စပ္ဍဲဘာတံဂှ် တၚ်နွံပၟိက်ဇွောံမစၞစတံ သၠုၚ်တိုန်ကၠုၚ်ရ။
စပ်ကဵုအကာဲအရာဏံတုဲ သ္ကိုပ်ဌာနပရေၚ်ပညာခရိုၚ်သဓီု ဒပ်မဟာ(၁) KNU ဟီုလဝ် သာ်ဏံရ။
“သွက်ဇွောံမံၚ်တံဂှ် နွံပၟိက်တုဲ ခုၚ်ချူလိက်တံ စမြိုၚ်တံ ဒးသၠဲပ္တိုန်ရ၊ ဗွဲမဂၠိုၚ် နွံပၟိက်ကဵု ဇွောံမစၞစတံရ၊ ကၠုၚ်မံၚ် ပ္ဍဲကဵုဘာဒၟံၚ်တံဂှ် ဂၠိုၚ်ကၠုၚ်တုဲ သာတုဲ ဒးသၠဲပ္တိုန်စၞစတံရ” ဂှ် သ္ဂးရ။
တၚ်နွံပၟိက် ဘာဗ္တောန်လိက်တံဂှ် ဗော်သွးကောန်ဂကူကရေၚ် KNU တံ ၜိုန်ရရီုဗၚ်ထံက်ပၚ်ဒၟံၚ်ကီုလေဝ် တၚ်နွံပၟိက်တံ ဆက်နွံဒၟံၚ်ဂှ် ညး သ္ဂးရ။
ပ္ဍဲကဵုဘာဗ္တောန်လိက် သၟဝ်တဲ KNU တံဂှ် ကုကွးဘာတန်ဒေါဝ်ကဵု တန်သၠုၚ်တံဂှ် စွံလဝ် ပ္ဍဲဘာဒၟံၚ် တိက်ပ္ဍဲဘာ စပ္ဍဲဘာတံရ။
အခိၚ်လၟုဟ် ဟိုတ်နူကဵု အကာဲအရာပေါဲဗ္တိုက်တံ၊ အခက်အခုဲ ပရေၚ်ဆက်စၠောံဂၠံၚ်ဍာန်၊ ၚုဟ်ဗၞိက်ဖျာ က္ဍၚ်တိုန်တံဂှ်တုဲ ဇွောံမစၞစ သွက်ကောန်ၚာ်တိက်ပ္ဍဲဘာ စပ္ဍဲဘာတံဂှ် သာတုဲနွံပၟိက်ကၠုၚ် ကုအရီုဗၚ်တံရ။
ပ္ဍဲကဵုဘာဗ္တောန်လိက် သၟဝ်တဲ KNU တံဂှ် ဗွဲအဓိက ဗ္တောန်ဒၟံၚ်ကဵု သီုဇုတ်ဓရံၚ်မာတိကာ အလဵုအသဳ၊ သီုကဵုနူဌာနပရေၚ်ပညာ KNU တံ မချူဓဇက်လဝ်တံရ။
ပ္ဍဲတိဍာ် ဒပ်မဟာ(၁) ခရိုၚ်သဓီု KNU ဂှ် ဘာပရေၚ်ပညာ KNU တံ မပါလုပ် သီုကဵုဘာမဒက်ပ္တန်လဝ် နကဵုဇြဟတ်ညးဍုၚ်ကွာန်တံဂှ် အပံၚ် (၁၅၀) ပြၚ် နွံတုဲ ကွးဘာတိုန်စိုပ်ကတ်ဗ္တောန်ဒၟံၚ် ပ္ဍဲကဵုဘာဗ္တောန်လိက်တံဏံဂှ် မၞုံဒၟံၚ် (၁၀,၀၀၀) ပြၚ်ရ။
ပရိုၚ်−သြၚ်လောန်တိုၚ်(မ်)