အပ္ဍဲပရေၚ်ရုသံၚ် ဍုၚ်အိန္ဒိယ သ္ကုတ်ဨသာန်တေံဂှ် မၞိဟ်ဂၠိုၚ်ကဵုဒါဇြိန် ချိုတ်အာ

မဏိပူရ၊ မေ (၃၀)

ပ္ဍဲဍုၚ်အိန္ဒိယ သ္ကုတ်ဨသာန် ပ္ဍဲကဵုတွဵုရးမဏိပူရ မၞုံဌာန်တၞုၚ်တၞးဂှ် အပ္ဍဲကဵုမက္တဵုဒှ်လဝ်ရုသံၚ် ကုဂကောံဒပ်ဂီုကၠီုတံဂှ် သၟာဗ္တိုက် ဂၠိုၚ်ကဵုဒါဇြိန် ဒးချိုတ်အာလဝ်ရောၚ် ဂွံတီကေတ်ရ။

တုဲကၠုၚ် ပ္ဍဲဂိတုမေ (၃) တေံ နူစဂကူမွဲကုမွဲ က္တဵုဒှ်ပွပကီုပရာပ်တုဲဂှ် တွဵုရးဝွံ စပ်ကဵုအစဳဇန် သၠုၚ်ပ္တိုန်ကဵု အရေၚ်ပရေၚ်ပိုန်ဒြပ်တံဂှ်တုဲ အကြာဂကူမုၚ်တုၚ် မဒှ်ကောန်ဍုၚ်အရၚ်ဗွဲမဂၠိုၚ် ကေုာံ ဂကောံမၞိဟ်တံဂှ် ပဋိပက္ခ က္တဵုဒှ်လဝ်ရ။

ပ္ဍဲကဵုရုသံၚ် ကလိုက်ကၟဵုတံဏံဂှ် မၞိဟ်ဂၠိုၚ်ကဵုဒါဇြိန် ချိုတ်အာတုဲ ဂၠိုၚ်ကဵုလ္ၚီ ဒးထောံလသာသ္ၚိဌာန် ဒးဂြိပ်ဒဴလဝ်ရ။ တုဲကၠုၚ် ပ္ဍဲတ္ၚဲအဒိုတ်တေံ အပ္ဍဲကဵုပရေၚ်ပါ်ထ္ကး ဂကောံဒပ်ဂီုကၠီုတံဂှ် သၟာဗ္တိုက် ဟွံအောန်နူကဵု (၄၀) တၠ ဒဒှ်ရဒးချိုတ်အာလဝ်ဂှ် သ္ကိုပ်ဝန်ဇၞော် အာန်ဗဳရာန်သေမ် ဟီုဂးလဝ်ကဵု အ္စာပရိုၚ်ဂမၠိုၚ်ရ။

အပ္ဍဲရုသံၚ် တုဲကၠုၚ်အပ္ဍဲၜါတ္ၚဲဂှ်လေဝ် ဒဒှ်ရကောန်ဒပ်ဗၠာဲသၟိၚ်ၜါတၠ ချိုတ်အာလဝ်ဂှ် ညး ဆက်ဟီုလဝ်ရ။

“သၟာပကီုပရာပ်တံဂှ် သုၚ်စောဲသေနာတ်ရိုၚ်ဖေဝ် ညံၚ်ရဴ M-16, AK-47 တံကဵု သနိုက်ပါတံဂှ်တုဲ ဗ္တိုက်ဒၟံၚ် ကောန်အရာပ်တံရ။ ညးတံဝွံ သွက်ဂွံစံၚ်ပလီုသ္ၚိဒၟံၚ်တံဂှ် တတ်ကၠောံကွာန်ဗွဲမဂၠိုၚ်ဂၠေၚ်တုဲ စိုပ်ကၠုၚ်လဝ်ရ” သာ်ဝွံ မဳဒဳယာဒေသတံ နိဿဲကေတ် ဂလာန်သေမ်တုဲ ထ္မံက်ထ္ၜးလဝ်ရ။

“နကဵုအရီုဗၚ် ဒပ်ပၞာန် ကေုာံ ဂကောံဒပ်ဂီုကၠီုတၞဟ်သ္အာၚ်တံဂှ်တုဲ ကေတ်လဝ်ဒုဟ် လ္တူဍေံတံ သ္ကာတ်တ်မြဟ်ဟ်မာန်လဝ်ရ၊ ဒဒှ်ရသၟာပကီုပရာပ် ဗၞတ် ၄၀ ဒးဒုၚ်ပန်ဂစိုတ်လဝ်ဂှ် ကလိဂွံလဝ်ပရိုၚ်ရ” သာ်ဝွံ နိဿဲထ္မံက်ထ္ၜးလဝ် ဂလာန်သ္ကိုပ်ဝန်ဇၞော်ဂှ်ရ။

တွဵုရးတၞုၚ်တၞး ဗွဲဒိုဟ်ဨသာန် ဍုၚ်အိန္ဒိယ မၞုံတန်တဴဒၟံၚ် အကြာဗေန်ဂလာဒေတ်၊ ကြုက် ကေုာံ ဗၟာဂှ်ဝွံ နဒဒှ်ပၞော်တိတ် ပရေၚ်ကြံၚ်မ္ၚိုဟ် အကြာဂကောံမၞိဟ်မွဲကုမွဲ မဟွံတုပ်သၟဟ်တံဂှ် နွံတန်တဴဒၟံၚ် အခိၚ်အခါဗွဲမလအ်လလေဝ် မဒှ်ရ။

နျူဒေလဳဝွံ ဓရိုဟ်ပလံၚ်ဏာလဝ် မၞိဟ်မၞုံပၟိက်ပၞာန် ကေုာံ ကောန်ဒပ်ဂမၠိုၚ် ဂၠိုၚ်ကဵုလ္ၚီ အပ္ဍဲတွဵုရး လၟိဟ်မၞိဟ် (၃ ဒဿမ ၂) ပြကောဋိကိုဋ်ဂှ်ရ။ အကြာဂကောံမၞိဟ် မုၚ်တုၚ် မသ္ပဒတဴဒမံၚ် မွဲဒမြိပ်ဍုၚ်ဇၞော်အေမ်ဖေဝ် ဍုၚ်ဇၞော်တွဵုရး ဂကူဟိန္ဒူဗွဲမဂၠိုၚ်ဂှ်ကဵု ဂကူခရေတ်ယာန်ကူကဳဗွဲမဂၠိုၚ် နူကဵုအကြာကုန်ဒဵု ပွဳပွူဗ္ဒါဲဗ္ဒါဲတံဂှ် ကြဴနူပေါဲဗ္တိုက်တံ က္တဵုဒှ်တုဲဂှ် မ္ဒးလလောၚ်ပ္တိတ်လဝ် ကာဖျူရ။

သ္အာၚ်နူဂှ်ပၠန် မိုဝ်ဗိုၚ်အေန်တာနိတ် မၞုံဒေသတံဏံဂှ်လေဝ် ဒးဒုၚ်ထပိုတ်လဝ် ဂၠိုၚ်ကဵုသတ္တာဟရ။

ညးမချိုတ်အာဂမၠိုၚ်ဝွံ ဟိုတ်နူပရေၚ်ပလီုပလာ် ဂကောံမၞိဟ်မုၚ်တုၚ်တံဂှ်တုဲ ကွာန်ညးတံကဵု ဘာကျာ်လ္ၚဵု ဒးလီုလာ်အာလဝ်ရောၚ် ရဴဝွံ စှ်ေလဝ်စိုတ်ရ။ ၜိုန်ဂှ်ကီုလေဝ် ပ္ဍဲကဵုဒၞါဲလ္ၚဵုလ္ၚဵုတံဂှ် ကူကဳတံဂှ် စွံလဝ်ပွန် ကုဂကူမုၚ်တုၚ်တံဂှ်ကီုဏောၚ်ဂှ်လေဝ် ဂွံတီကေတ်ရ။

ပ္ဍဲကဵုလၟေၚ်ဒဒှ်ကိုပ်ကၠာအိုတ် ဟိုတ်ဂွံဒှ်ရုသံၚ်ဂှ် အဃောမပရအ်ကဵုအရၚ် မၞုံကဵုတၚ်ဒုၚ်လျိုၚ် အခေါၚ်ဂွံဒုၚ်စသိုၚ်တၞဟ်သ္အာၚ် ကေုာံ ကမၠောန်အလဵုအသဳတံဂှ် ဂကူကူကဳတံ ဒေါသတိတ်ထေဲပၞတ်လဝ် လ္တူပရေၚ်ပါ်ကဆံၚ် ပါ်ဂကူတံဂှ် မဒှ်ရ။

Ref: Aljazeera