ကြုၚ်ဒဵု၊ မေ (၃၁)
တွဵုရးကရေၚ်၊ ပွိုၚ်ဍုၚ်ကအ်ကြိက်၊ ဗဒိုပ်ဗၠာဲသၟိၚ်ကြုၚ်ဒဵုဂှ် ပ္ဍဲဂိတုမေ စၟတ်တ္ၚဲ(၃၀) အခိၚ်နူဂယး ဟိုတ်နူ ဒးဒုၚ်ဗတိုက်လဝ်တုဲ သီုသ္ကိုပ်ဗၠာဲသၟိၚ်မွဲတၠ ဒးလဝ်ဘဲဝပ် (၃)တၠရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တ္ၚဲဂှ် အခိၚ်နူဂးၜိုတ်(၉)နာဍဳ ဂကောံရပ်လွဟ်မွဲဂကောံ ကၠုၚ်ဗတိုက်လဝ် ဗဒိုပ်ဗၠာဲသၟိၚ်ကြုၚ်ဒဵု မၞုံအရာပ် စၟတ်(၂)၊ ဍုၚ်ကြုၚ်ဒဵုဂှ် နကဵုဒရုမ်ရ။
ဟိုတ်နူပရေၚ်ဗတိုက်ပန်ပှော်ဏံတုဲ ဒၟာနူဗုမ်ဒတုံစှ်ေ ခတိုဟ်လဝ် ပ္ဍဲဗဒိုပ်ဂှ်ရ သ္ကိုပ်ဗၠာဲသၟိၚ်ခေန်ဇြဝ်၊ ဒုသ္ကိုပ်ဗၠာဲသၟိၚ် ကျဝ်ဒူရကဵု ဥူကျဝ်ကျဝ်ထောန် ဒၟံၚ်ဍုၚ်လဂုၚ်တအ် ဒးလဝ်ဘဲဝပ်ညးသ္ကအ်ရ။
သီုသ္ကိုပ်ဗၠာဲသၟိၚ် ညး (၃) တၠ ဒးလဝ်ဘဲဝပ်တအ်ဂှ် နကဵုအရီုဗၚ် ဂကောံရီုဗၚ်ဟံၚ်ပြာ်မၞိဟ် ပလံၚ်ဗစိုပ်ဏာလဝ် ရုၚ်ဂဥုဲပွိုၚ်တိုက်ကြုၚ်ဒဵုရဂှ် ဂွံတီကေတ်ရ။
ဒပ်စဵုဒၞာညးဍုၚ်ကွာန် PDF တအ် ဗတိုက်လဝ် ဗဒိုပ်ဗၠာဲသၟိၚ်ကြုၚ်ဒဵုရဂှ် ပရေၚ်ချူတြးဒၟံၚ် ပ္ဍဲအကံက်တေဝ်လဳဂရာမ်ဠဝ်ဗဳဒပ်ပၞာန်တအ် နွံရ။
ဆ္ဂးဂကောံလဵု ဗတိုက်လဝ်ဗဒိုပ်ဗၠာဲသၟိၚ်ကြုၚ်ဒဵုရောဂှ် စဵုကဵုလၟုဟ်ဏံ ပရေၚ်လလောၚ်တြးလဝ် ဟွံဂွံဆဵုညာတ်ကေတ်ဏီရ။
ကြဴနူဗဒိုပ်ဗၠာဲသၟိၚ်ဒးဒုၚ်ဗတိုက်လဝ်တုဲ နူတံဒပ်ကံၚ်ဇြဳပၞာန် ခမရ(၅၄၅) ခမရ(၅၄၆)ဖျေံသ္ဇိုၚ်ဍုၚ်ကြုၚ်ဒဵုဂှ် ဟိုတ်နူပန်ဖျေံနၚ်လွဟ်ဇၞော် ၁၂၀-မမ ပ္ဍဲလ္ပာ်ကွာန်တယျေတ်တဝ် ကေုာံ ညံၚ်ယျုက်တာ ကြာန်န်ဂှ်ရ ကောန်အရာပ်ညးဍုၚ်ကွာန်မွဲတၠ ဇီုကပိုက်ဒးလဝ် ပ္ဍဲက္ဍိုပ်တုဲ ချိုတ်အာရဂှ် ဂွံတီကေတ် နူတံရိုဟ်တၚ်ဂၞၚ်ပရိုၚ်ဒေသဂှ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-CJ
sanlontai