နေဗျဳဒဝ်၊ ဂျောန် (၁၃)
အလုံမွဲကၟိန်ဍုၚ် ပံက်မုက်ပၞာန်တုဲ ကံၚ်ဇြဳပၞာန် မ္ဒးတြးလဝ် ဇြဟတ်ဒပ် ပ္ဍဲမုက်ပၞာန်တံဂှ် ကော်ဒၟံၚ်အလံၚ် ဗိုလ် ညးသၟတ်အံၚ်ဇၞးလဝ် စှ်တန်တံ ပ္ဍဲကဵုတက္ကသိုလ်ကွတ်နဲပညာ၊ တက္ကသိုလ်ဂဥုဲ ကေုာံ တက္ကသိုလ် ပၞာန် စပ်ကဵုဒပ်ပၞာန်တံဂှ်ရ။
ပပ္တံနူဂိတုဂျောန် (၁၂) တုဲ လိက်တၞးပ္တိုန်စရၚ် သွက်တန်ဗ္တောန်အလံၚ်ဗိုလ် တက္ကသိုလ်ကံၚ်ဇြဳပၞာန် (၃) နူကဵုရုၚ်သ္ကိုပ်က္ဍိုက်ပ်ကာစဵုဒၞါ မကော်လဝ်တံဂှ် ကေတ်ပ္ဍဲဌာန်ဂအုပ်ပၞာန်ရး ဒၞါဲမကြပ်တံမာန်ရောၚ် ပ္ဍဲဂိတုဂျောန် (၁၂) တေံ ထ္မံက်ထ္ၜးလဝ် ပ္ဍဲလိက်ပရိုၚ်ရ။
နကဵုညးမအာတ်ပ္တိုန်စရၚ် ပ္ဍဲတက္ကသိုလ်ကွတ်နဲပညာ၊ တက္ကသိုလ်ဂဥုဲ ကေုာံ တက္ကသိုလ်ပၞာန်တံဂမၠိုၚ် ယးသၞာံ ဂိတုဂျာန္နဝါရဳ (၁) မ္ဂး အာယုက်သၟဝ် (၁၆) ဍောတ်ဟွံဂွံ ၁၉ သၞာံ ကဵု ၆ ဂိတုဇၞော်ဟွံဂွံ သာ်ဝွံ စၟတ်လဝ်ဂှ် ဂွံဆဵုကေတ်ရ။
ဆ္ဂး ပ္ဍဲကဵုအာယုက်အပိုၚ်အခြာ ညးမအာတ်မပ္တိုန်စရၚ် တန်ဗ္တောန်အလံၚ်ဗိုလ် မကော်လဝ် အပ္ဍဲဂိတု ဂျောန် သၞာံ ၂၀၂၁ မသီလဝ်အဝဵုတေံဂှ် သၞာံ ၂၀၂၂ ဂိတုဂျာန္နဝါရဳ (၁) မ္ဂး အာယုက်ဍောတ်နူ (၁၆) သၞာံဟွံဂွံတုဲ (၁၈) သၞာံလေဝ် ဇၞော်ဟွံဂွံပုဟ်ဂှ် ထ္မံက်ထ္ၜးလဝ်ရ။
စပ်ကဵုကော်တန်ဗ္တောန်အလံၚ်ဗိုလ်ဂှ်တုဲ ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် အခိၚ် ကာလ ညးဍုၚ်ကွာန်တံ စိုတ်အိုတ်မံၚ် သွက်ဂွံလုပ်အပ္ဍဲဒပ်ပၞာန်ဂှ် ဖအောန်ဖျေံစေဝ်ပၞောန် ကော်ဒၟံၚ်တၚ်လလောၚ်တြးသာ်ဏံရောၚ်ဂှ် သ္ၚဳဂၠိပ်လဝ်ရ။

“ခေတ်ကာလ ညာတ်လဝ် နဒဒှ်ဂကောံဇြဟတ် နကဵုကံၚ်ဇြဳပၞာန် မဖျေံလဝ်ထဝ် ကုကောန်ပၞာန် ဗိုလ်ပၞာန်တံဂှ် အိုတ်အာယျ။ ဟိုတ်ဂှ်ရ ဗီုလဵုဍေံကော်ကော် တန်ဗ္တောန်ဗိုလ်ဂမၠိုၚ်၊ တန်ဗ္တောန် အ္စာဂဥုဲပၞာန်တံ၊ အေန်ဂျေန်နဳယာပၞာန်တံဂှ် သၞာံလဵုမွဲ ဍိုက်ပေၚ်မံၚ်ရောဟီုဂှ် ဟွံမွဲပုဟ်။ လၟုဟ်ဂှ် ကောန်ဇာတ် နူကဵုဂြောဝ်ဂတာဗိုလ်ပၞာန်ညိညတံရ နွံ။ ကောန်ဇာတ်ညးဍုၚ်ကွာန်သှ်ေတံဂှ် ဒှ်ဒၟံၚ်အခိၚ် ကာလ သွက်ဂွံလုပ်ပၞာန်ဂှ် စိုတ်အိုတ်ဒၟံၚ်ညးသ္ကအ်အိုတ်ဂှ်ရ ပ္တိတ်တၚ်လလောၚ်တြးသာ်ဏံ ဖအောန် ဖျေံစေဝ်ပၞောန်တံတုဲ ကော်ဒၟံၚ်ရောၚ်ဂှ် ညာတ်ကေတ်ရ” သာ်ဝွံ ညးသ္ဂးရ။
ကြဴနူဒပ်ပၞာန်သီအဝဵု သၞာံ ၂၀၂၁ တုဲဂှ် ပ္ဍဲကဵုတက္ကသိုလ်ပၞာန်၊ တက္ကသိုလ်ဂဥုဲ ကေုာံ တက္ကသိုလ်ကွတ် နဲပညာတံဂှ် မၞိဟ်အာတ်ပ္တိုန်လဝ်အခေါၚ်လုပ်တံ အောန်ကြဳဒၟံၚ်ဂှ်ရ နကဵုတၚ်ထ္ၜးဟိုတ်ကဝ်ဝေဒ်ဂှ် အခိၚ်ကၟာတ်လိက်တၞးအာတ်ပ္တိုန်ဂှ် လ္ပာ်ကံၚ်ဇြဳပၞာန် သၠုၚ်ပ္တိုန်လဝ် စဵုကဵု ၂ ဂိတုရ။
အတိုၚ်ဂလာန် ညးမစုက်လုက်ကဵု ဂကောံရုဲစှ်ဗိုလ်ပၞာန် (OTT) တံဂှ်မ္ဂး ပ္ဍဲသၞာံ ၂၀၂၁ ဂှ် ပ္ဍဲကဵုတက္ကသိုလ် ပၞာန်၊ တက္ကသိုလ်ဂဥုဲ ကေုာံ တက္ကသိုလ်ကွတ်နဲပညာတံဂှ် မၞိဟ်အာတ်ပ္တိုန်လဝ်စရၚ် ပွဳပွူ ၄၀၀ ဓဝ်နွံလဝ်ဂှ် မဳဒဳယျာပရိုၚ်ဂမၠိုၚ် ထ္မံက်ထ္ၜးလဝ်အိုတ်ရ။
ဗိုလ်ဇၞော် CDM ကံၚ်တူဝေန်ဂှ်လေဝ် ကြဴနူဒပ်ပၞာန်သီအဝဵုတုဲ လၟိဟ်မၞိဟ်အာတ်ပ္တိုန်လဝ်စရၚ် ပ္ဍဲတက္ကသိုလ်ပၞာန်၊ တက္ကသိုလ်ကွတ်နဲပညာ ကေုာံ တက္ကသိုလ်ဂဥုဲတံဂှ် ၜိုတ်လၟိဟ်ကၠံဓဝ်ရဟေၚ် နွံဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပ္ဍဲကာလသီအဝဵုတုဲဂှ် အောန်အာကွေံကွေံဟဂှ်ရ။ ကဵုကၠံဟီုဂှ် ၜိုတ် ၁၀၀၊ ၂၀၀ ရဏောၚ်။ ညအ်ရဂှ် တက္ကသိုလ်ပၞာန်မွဲဓဝ်ရဏောၚ်။ ပ္ဍဲကဵု DSTA, DSMA တံဂှ် ကၠာတေံဂှ် မွဲသၞာံမ္ဂး ကော်ဒၟံၚ် ၜိုတ်ဗ္ဒါဲ ၅၀၀ နွံရ။ အခိၚ်လၟုဟ်ဂှ်လေဝ် ကော်ဂှ်ကော်ဒၟံၚ်ရ၊ ဆ္ဂး ၜိုတ်ဂၞန်ကဵုကၠံရ နွံအိုတ်ဂှ် ထေၚ်ရ” သာ်ဝွံ ညးသ္ဂးရ။

ကၠာဒပ်ပၞာန်ဂွိုအ်သီအဝဵု နူသၞာံ ၂၀၀၀ စဵုကဵု ၂၀၁၀ တေံ ပ္ဍဲကဵုတက္ကသိုလ်ပၞာန်မွဲဓဝ်ဂှ် မၞိဟ်အာတ်ပ္တိုန် လဝ်စရၚ် နွံလဝ် အကြာ ၁၀၀၀ စဵုကဵုပွဳပွူ ၂၀၀၀ တုဲ အခိၚ်စှ်ေတန်ဗ္တောန်အလံၚ်ဗိုလ်တံဂှ်လေဝ် ဟိုတ်နူတၚ်နွံပၟိက် ဗက်ကဵုသၞာံတုဲ ၁၀၀၀ ပြၚ်ကဵု ဗ္ဒါဲ ၂၀၀၀ နွံလဝ်ရောၚ် ဗိုလ်ဇၞော် ကံၚ်တူဝေန် ဟီုလဴထ္ၜးလဝ်ရ။
ဂကောံဒပ်စဵုဒၞါညးဍုၚ်ကွာန် PDF မမံက်တိတ်ကၠုၚ် ပ္ဍဲပၠန်ဂတးက္ညၚ်ဏံဂှ်ဝွံ ဟိုတ်နူဒပ်ကံၚ်ဇြဳပၞာန် မကလေၚ်သီလဝ်အဝဵုကၟိန်ဍုၚ် နကဵုဇြဟတ်လွဟ်တံ ပန်ပှော်ဂစိုတ်ဂယိုၚ်ကြာန်န်၊ ရပ်ဒက်ပျဲ ပျာံတံဂှ်တုဲ မ္ဒးကွာ်လဝ်ဂၠံၚ်တရဴရပ်လွဟ်တံရ။
ဟိုတ်ဂှ်ရ အကြာဒပ်ကံၚ်ဇြဳပၞာန်ကဵု ညးဍုၚ်ကွာန်ကောန်အရာပ်တံ မ္ဒးသ္ၚောဲခြာအာလဝ်တုဲ စိုတ်မိက်ဂွံ လုပ်ပၞာန်လေဝ် ဟွံမွဲအိုတ်ဂှ်ရ ပ္ဍဲကဵုဒၞါဲတမ်ရိုဟ်ဇြဟတ်ဒပ် ရးသက်ကိုၚ် ကေုာံ ရးမဂွဵုတံဂှ်လေဝ် အရိုဟ်ဒဒှ်တ္ၚဲ တဝ်စၞေဟ်ဒစဵုဒစးဒၟံၚ် ဒပ်ကံၚ်ဇြဳပၞာန်တံရ။
ညးခါတ်အကာဲပရေၚ်ဍုၚ်ကွာန်တံကဵု ဗွိုၚ်ဒပ်ပၞာန်လ္ၚဵုတံဂှ် တန်ဗ္တောန်အလံၚ်ဗိုလ် တက္ကသိုလ်ပၞာန်၊ တက္ကသိုလ်ကွတ်နဲပညာ ကေုာံ တက္ကသိုလ်ဂဥုဲ နူကဵုကံၚ်ဇြဳပၞာန် မကော်ဒၟံၚ်တံဂှ် ၜိုတ်ကောန်ဇာတ် သၞာဲဒဴဒပ်ပၞာန်တံကဵု ၜိုတ်ဗွိုၚ်ညးမထံက်ဂလာန်ဒပ်ပၞာန်တံဟေၚ် တိုန်စိုပ်အိုတ်ဏောၚ်ဂှ် ချိၚ်ခယျလဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−MOI

