မတ်မလီု၊ ဂျောန် (၁၃)
ကံၚ်ဇြဳပၞာန် ပ္တိတ်ကဵုဒၟံၚ်လွဟ်လက်နက် ကုသၞာဲဒဴက္ဍိုက်ပ် မယိုက်ဂၠေၚ်ဒၟံၚ်တာလျိုၚ် ပ္ဍဲကဵုဌာနအလဵု အသဳသၟဝ်တဲဂမၠိုၚ် မၞုံအပ္ဍဲတွဵုရးဍုၚ်မန်တံဂှ်တုဲ သၞာဲဒဴပ္တိတ်ကဵုလဝ်လွဟ်လက်နက်ဂှ် နွံကၠုၚ် စဵုကဵု (၃၀) ပြၚ်ယျရောၚ် ရုၚ်အလဵုအသဳတွဵုရးကံၚ်ဇြဳပၞာန် ကေုာံ ညးမစုက်လုက်တံ ဟီုကဵု ဌာန်ပရိုၚ်သြၚ်လောန် တိုၚ်(မ်) ရ။
ပ္ဍဲကဵုညးမပ္တိတ်ကဵုလဝ်လွဟ်လက်နက်ဂမၠိုၚ်ဂှ် သၞာဲဒဴက္ဍိုက်ပ် နူကဵုဌာနကောပ်ကာဲပရေၚ်မၞိဟ်လုပ် ကေုာံ ဌာနက္ဍိုက်ပ်အုပ်ဓုပ်ကာနာနာတံ ဗွဲမဂၠိုၚ်ပါလုပ်တုဲ သၞာဲဒဴက္ဍိုက်ပ် နူကဵုဌာနမဆေၚ် စပ်သှ်ေ ဒၟံၚ်လ္ၚဵုတံဂှ်လေဝ် ပါလုပ်ရောၚ်ဂှ် ဂွံတီကေတ်ရ။
ပ္ဍဲကဵုကံၚ်ဇြဳပၞာန် ပ္တိတ်ကဵုလွဟ်လက်နက်တံဂှ် သၞာဲဒဴက္ဍိုက်ပ် နူကဵုပွိုၚ်ဍုၚ် မဒးဒုၚ်ဗ္တိုက်ဒၟံၚ် မွဲဏှ မွဲဏှတံဂမၠိုၚ် သီုပွိုၚ်ဍုၚ်ရေဝ်၊ ကျာ်ထဝ်၊ ၜဳကလေၚ် ကေုာံ ပွိုၚ်ဍုၚ်သဓီု မဒှ်တိဍာ်ဟွံညိၚ်ဝတ် မၞုံအပ္ဍဲတွဵုရးတံဂှ် ကဵုက္ဍိုပ်ပ္တိတ်ကဵုဒၟံၚ်ရ။

အခိၚ်လၟုဟ် ညးမၞုံကဆံၚ်က္ဍိုက်ပ် နူကဵုဌာနအလဵုအသဳလ္ၚဵုတံလေဝ် ပ္တိုန်လဝ်စရၚ်လွဟ် လက်နက်တံ နွံကီုလေဝ် တန်တဴကဵု လ္တူပရေၚ်ဂီုကၠီု ကေုာံ တၚ်နၚ်နွံပၟိက်တံဂှ်တုဲ ကဵုက္ဍိုပ်ပ္တိတ်ကဵုဒၟံၚ်ရောၚ် ညးမစုက်လုက်ကဵု ရုၚ်အလဵုအသဳတွဵုရးကံၚ်ဇြဳပၞာန်မွဲတၠ ဟီုရ။
ကံၚ်ဇြဳပၞာန်ဝွံ ကၠာတေံဂှ်လေဝ် ပ္တိတ်ကဵုလဝ်လွဟ် ကုသ္ကိုပ်အုပ်ဓုပ်ပွိုၚ်ဍုၚ်၊ ခရိုၚ်၊ တွဵုရးတံကီု သီုကဵု သၞာဲဒဴ နူကဵုဌာနအလဵုအသဳလ္ၚဵုတံဂှ်တုဲ သွက်ဂွံကဵုပရေၚ်ဂီုကၠီုကြပ်ပ်မာန်ဂးတုဲ စွံလဝ်ကဵု သီုကောန်ပၞာန် သီုဗၠာဲသၟိၚ်တံရ။
မွဲလ္ပာ်ပၠန်ဂှ်လေဝ် ကံၚ်ဇြဳပၞာန်ဝွံ သွက်ကောန်အရာပ်၊ သွက်ညးယိုက်ဝန်ကၟိန်ဍုၚ် နွံပၟိက်မဒးရပ်လွဟ် သွက်ပရေၚ်ဂီုကၠီုဍာံဍာံတံဂှ် ပ္ဍဲဂိတုဂျာန္နဝါရဳ (၃၁) တေံ လလောၚ်ပ္တိတ်လဝ် မူဝါဒရပ်လွဟ် လက်နက်တံရ။

သ္အာၚ်နူဂှ်ပၠန် ပ္ဍဲဂိတုမေ (၁၁) တေံဂှ်လေဝ် စၞောန်ပျးလဝ် သၞောဝ်လွဟ်လက်နက်မွဲတုဲ ညးလဵုဟွံဟီု ရပ်လွဟ် ဟွံမွဲကဵုသၞောဝ်တုဲ ဒဒှ်ရကလိလောန်ဖံက်ပ္ကဝ်လဝ် တၚ်ကၟာတ်လဒဵုမွဲမွဲရောၚ် ယဝ်ရဒုဟ် ဒဏ်ပြာကတ်မ္ဂး အောန်အိုတ် နူဒဏ်ထံၚ် (၆) ဂိတု သၠုၚ်အိုတ် ဒဏ်ထံၚ်မွဲအာယုက်၊ စဵုကဵုဒဏ်ဂစိုတ်တံ ဖျေံမာန်ဏောၚ်ဂှ် ပါလုပ်ရ။
ကြဴနူကံၚ်ဇြဳပၞာန် လလောၚ်ပ္တိတ် ဒဒှ်ရရပ်လွဟ် နကဵုလာၚ်ဇြေန်မာန်ရောၚ်တုဲဂှ် ပ္ဍဲတွဵုရးဍုၚ်မန်ဂှ် ညးစုက်လုက်ကဵုကံၚ်ဇြဳပၞာန်တံ၊ တၠကမၠောန်ပရေၚ်ပိုန်ဒြပ်တံ၊ သ္ကိုပ်အုပ်ဓုပ်ဂမၠိုၚ် ပါလုပ်သီုကဵု ကောန်ဗော်ကျခိုၚ်ယျေလ္ၚဵုတံ အာတ်ပ္တိုန်လဝ်စရၚ် အခေါၚ်ရပ်လွဟ်တံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−MRTV

