ဍုၚ်ယှိုဲကုက္ကိုလ် ယၟုမြဟ်မံၚ် ဍုၚ်ဝေၚ်ဇျှၚ်ဂှ် ၜိုန်ရဒဒုၚ်ထပိုတ်လဝ်ပၟတ်ကီုလေဝ် ဂေတ်ဂြိပ်မံၚ်နကဵုပၟတ်စက် 

ဗြဝတဳ၊ ဂျောန်(၁၄)

တွဵုရးကရေၚ်၊ ပ္ဍဲဗ္ဒါဲပယျဵုသေံ-ဗၟာ လ္ပာ်ဍုၚ်ယှိုဲကုက္ကိုလ်တၟိဂှ် ကြဴနူလ္ပာ်သေံတံ ထပိုတ်ထောံပၟတ်တုဲဂှ် ဂကူကြုက်တံကဵု တၠကမၠောန်ပ္တိတ်သြန်လှုဲမာန်တံ ရာန်သုၚ်စောဲကၠုၚ်ပၟတ်စက်တံ ဂၠိုၚ်ကၠုၚ်ရဂှ် ပရိုၚ်တမ်ရိုဟ်ပ္ဍဲဒေသတံ ဟီုရ။ 

ပွိုၚ်ဍုၚ်ဗြဝတဳ၊ ပ္ဍဲဍုၚ်ယှိုဲကုက္ကိုလ်တၟိ ယၟုမြဟ်မံၚ်ဍုၚ်ဝေၚ်ဇျှၚ်ဟွံလုပ်သၞောဝ် ဒပ်မၚ်ပယျဵုကရေၚ် BGFတံ ထိၚ်ဒဝ်လဝ်ဍိုက်က်ပေၚ်ၚ်ဂှ် တုဲကၠုၚ်ဂိတုဂျောန် စၟတ်တ္ၚဲ(၅) စနူအခိၚ်ဗ္တံ(၁၂)နာဍဳတုဲ လ္ပာ်သေံတံ ဒေါံဒေၚ်ထောံလဝ် ပရေၚ်ပါ်ပရအ်ကဵုဇြဟတ်ဓာတ်လလဳရ။

ပ္ဍဲဍုၚ်ယှိုဲကုက္ကိုလ်တၟိဂှ် ရာန်သုၚ်စောဲမံၚ်ဇြဟတ်ဓာတ်လလဳ လ္ပာ်ဍုၚ်သေံတံအဓိကတုဲ အတိုၚ်ပရိုၚ်တံဂှ်မ္ဂး ဟိုတ်နူကံၚ်ဇြဳပၞာန် ကဵုဇြဟတ်ဂရိုဟ် ကုအလဵုအသဳသေံ ကဵုကၟာတ်လဒဵုထောံဂှ်ရ လ္ပာ်သေံတံ ကၟာတ်လဒဵုလဝ် သီုကဵုဍုၚ်ယှိုဲကုက္ကိုလ်တၟိ၊ သီုပွိုၚ်ဍုၚ်ဗြဝတဳ ဗ္ဒါဲမေဝ်ထဝ်တလေဝ် ဒၞါဲကာဇြဳနို(၂)ဒၞါဲတံဂှ်ရောၚ် ပရိုၚ်ဂမၠိုၚ်မံက်တိတ်ကၠုၚ်မံၚ်ရ။ 

ဟိုတ်နူလ္ပာ်သေံတံ ထပိုတ်ထောံပၟတ်ဓာတ်လလဳဂှ်ရ ပ္ဍဲဍုၚ်ယှိုဲကုက္ကိုလ်တၟိ လ္ပာ်ဂကူကြုက်တံ မံၚ်တန်တဴမံၚ်တံဂှ် ပၟတ်ပိုတ်ပၠိုတ်အာတုဲ လာၚ်ပၟတ်သေံ ဆက်စၠောံလဝ်လ္ပာ် ဗြဝတဳ-ကျံက်ဖျာတံဂှ် ပၟတ်ဟွံပၠိုတ်ပုဟ်ဂှ် ညးဒေသယှိုဲကုက္ကိုလ်မွဲတၠ ဟီုရ။ 

ဟိုတ်နူလ္ပာ်သေံတံ ထပိုတ်ထောံပၟတ်ဓာတ်လလဳသာ်ဏံဂှ်ရ ဂကူကြုက်တံကဵု မၞိဟ်ပ္တိတ်သြန်လှုဲမာန် မၞုံပ္ဍဲဍုၚ်ယှိုဲကုက္ကိုလ်တၟိတံဂှ် ၜိုန်ရရာန်သုၚ်စောဲပၟတ်စက်တံမာန်ကီုလေဝ် တၠကမၠောန်အဇာဍောတ်တံ၊ ညးဒေသရဲကွာန်တံကဵု ညးပ္တိတ်သြန်လှုဲဟွံမာန်တံဂှ် ဟိုတ်နူပၟတ်ပိုတ်ပၠိုတ်ဂှ်ရ ပဵုတုဲဒးဆေၚ်ကၠုၚ်မုက် ကုအခက်အခုဲပြဿနာတံရောၚ်ဂှ် ပရိုၚ်တမ်ရိုဟ်ဂမၠိုၚ် ဟီုဂးလဝ်အိုတ်ရ။ 

ပ္ဍဲဍုၚ်ယှိုဲကုက္ကိုလ်တၟိဂှ် ဟိုတ်နူသေံတံ ထပိုတ်ထောံလဝ်ပၟတ်ဓာတ်လလဳတုဲ ပၟတ်ဟွံကၠုၚ်မံၚ် ပွိုၚ်မွဲသတ္တဟပြၚ်ကၠုၚ်ဂှ်ရ ညးတာလျိုၚ်လ္ပာ်ယှိုဲကုက္ကိုလ်တံ (တၠအဝဵု BGF)တံဂှ် သွက်ဂွံကလေၚ်ဂွံပၟတ်ဓာတ်လလဳပၠန်ဂှ် ကၠောန်သ္ပမံၚ် ပွသဳကၠဳပ္ညဳပ္ညပ် ကုတၠအဝဵုလ္ပာ်သေံတံဂှ်လေဝ် ပရိုၚ်တမ်ရိုဟ်ယှိုဲကုက္ကိုလ်တံ ဟီုအိုတ်ရ။ 

သ္အာၚ်နူဂှ်ပၠန် မွဲလ္ပာ်ပၠန်ဂှ်လေဝ် ပ္ဍဲဍုၚ်ယှိုဲကုက္ကိုလ်တၟိဂှ် အရာမသၠာဲမံၚ်ဇုက်ပၟတ်တံဂှ် ဂွံဆဵုကေတ်မံၚ်တုဲ သၠာဲထောံဇုက်ပၟတ်သာ်ဏံတံဂှ် သွက်ဂွံကလေၚ်ဗ္ဂပ်သုၚ်စောဲ လာၚ်ပၟတ်လ္ပာ်ဗၟာတံလေဝ်ဒှ်မာန်တုဲ ဗ္ဂပ်စုတ်စက်ပၟတ်အဇာဇၞော်ပူဂဵုတုဲ သုၚ်စောဲသွံတြးအာလေဝ်ဒှ်မာန်ဏောၚ်ဂှ် ပရိုၚ်တမ်ရိုဟ်ယှိုဲကုက္ကိုလ်တံ ချိၚ်ခယျဟီုဂးမံၚ်အိုတ်ရ။ 

ပရိုၚ်-သြၚ်လောန်တိုၚ်မ် 

ဗီု-CJ

Leave a Reply

Your email address will not be published. Required fields are marked *