ဟိုတ်နူမိက်ဂွံပ္တိတ်ပရဲပရေၚ်ဍုၚ်ကွာန်တုဲ ၚုဟ်ဖျာဇၞော်သၠုၚ်ဒၟံၚ်ရောၚ် က္ဍိုပ်သ္ကိုပ်ပၞာန် ပ္တိုန်ဒုဟ်

နေဗျဳဒဝ်၊ ဂျောန် (၁၄)

ၚုဟ်ဖျာက္ဍၚ်ဂှ်ဝွံ ဟိုတ်နူရဲဝေၚ်ၚုဟ်သၠုဲတံကဵု ရဲမိက်ဂွံပ္တိတ်ပရဲ နကဵုပရေၚ်ဍုၚ်ကွာန်တံဂှ်တုဲ ဒးသၠုၚ်ဒၟံၚ် လ္တူနူကဵုၚုဟ်ဖျာ ထေက်ကဵုဒှ်တံရောၚ်ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုရ။

ပ္ဍဲလက်ထက်ကံၚ်ဇြဳပၞာန် သွက်ဂွံသောၚ်ကလး ပရေၚ်ၚုဟ်ဖျာက္ဍၚ်တံဂှ်တုဲ ပ္ဍဲကဵုကောံဓရီု ပရေၚ် ကၠောန်ပ္တိတ်သၠုၚ်ပ္တိုန် ကပေါတ်ဗၞိက်စသုၚ်သ္ဇိုၚ် မကၠောန်ဗဒှ်လဝ် ပ္ဍဲနေဗျဳဒဝ် ဂိတုဂျောန် ၁၂ ဂှ် က္ဍိုပ်သ္ကိုပ်ပၞာန် ဟီုဂးလဝ်ရ။

က္ဍိုပ်သ္ကိုပ်ပၞာန်ဂှ် ပ္ဍဲကဵုကမၠောန်ပ္တိတ်ဗၞိက်၊ ပရေၚ်တဵုလွဳ ကေုာံ ပရေၚ်လွဳတိရစ္ဆာန် မၞုံအပ္ဍဲဍုၚ်တံဂှ် ဟိုတ်နူၚုဟ်ကပေါတ်တမ်က္ဍၚ်တုဲ ခရိတ်အိုတ်ပရေၚ်ကၠောန်ပ္တိတ်အပ္ဍဲဍုၚ်တံ သၠုၚ်တိုန်ကၠုၚ်ဂှ်ကီု၊ ဇြဟတ်ရာန်ကဵု ဇြဟတ်သွံဂှ် တၞဟ်ခြာဂၠိုၚ်ကၠုၚ်တုဲ ကလေၚ်သွံအဆံၚ်ၚ်တံ ဂၠိုၚ်ကၠုၚ်ဂှ်ရ ၚုဟ်ဖျာဂှ် သာတုဲသၠုၚ်တိုန်ကၠုၚ်ရောၚ် သ္ဂးရ။

သ္အာၚ်နူဂှ်ပၠန် ကြဴနူဒပ်ပၞာန်သီအဝဵုတုဲ ဂကောံလညာတ်ဟွံတုပ်အပ္ဍဲဍုၚ်တံဝွံ ရေၚ်တၠုၚ်ဒၟံၚ် ညံၚ်ကဏ္ဍ ပရေၚ်ပိုန်ဒြပ် ဂွံဇီုကပိုက်ဂှ်နွံတုဲ ဍုၚ်သ္အာၚ်ဂမၠိုၚ်ဂှ်လေဝ် ထ္ၜးဟိုတ်နာနာသာ်တုဲ ကၟာတ်လဒဵုပရေၚ် ပိုန်ဒြပ်တံ၊ ဒေါအ်ဒေၚ်ပရေၚ်ထံက်ပၚ်တံကဵု ဒေါအ်ဒေၚ်ပ္ဍဲအရာပံၚ်တောဲတံဂှ် ကၠောန်ၜိုတ်လဝ်ရောၚ် ဟီုရ။

တၠကမၠောန်ပရေၚ်ိပုန်ဒြပ်တံဂှ် ၚုဟ်ဖျာအပ္ဍဲဍုၚ်ဝွံ ကြဴနူဒပ်ပၞာန်သီအဝဵုတုဲ ၚုဟ်မးသြန်ဗၟာ စှ်ေကၠုၚ်ကီု၊ ကပေါတ်ဗၞိက်အပြောံ ဗ္ကန်နၚ် နူကဵုဍုၚ်သ္အာၚ်တံ ၚုဟ်သၠုၚ်တိုန်ကၠုၚ် ဂၠိုၚ်ကဵုဆကီု ဆက်စပ်ဒၟံၚ်ကဵု အကာဲအရာတံဏံ အဓိကရောၚ်ဂှ် ဟီုဂးကၠုၚ် ညဳညဳသာသာအိုတ်ရ။

ကြဴနူဒပ်ပၞာန်သီအဝဵုတုဲ ပရေၚ်ဓလိုက်တမ်ရိုဟ်ဍုၚ်သ္အာၚ်တံ တိတ်စ္ဍးအာကီု၊ ပရေၚ်ဓလိုက်တမ် ရိုဟ်တၟိတၟိတံ လုပ်စိုပ်ကၠုၚ်ဟွံမွဲသၟးဟွံက ကမၠောန်ဗၞိက်ပ္တိတ် မၞုံအပ္ဍဲဍုၚ်တံဂှ်လေဝ် ဟိုတ်နူဂေတ် ဂြိပ်ဍိုက်က်ပေၚ်ၚ် ဟွံမာန်ဂှ်ရ တၚ်နွံပၟိက်ဂၠိုၚ်တုဲ ၚုဟ်ဗၞိက်ဖျာ ထပ်သၠုၚ်တိုန်ကၠုၚ်ရ။

တၠပညာပရေၚ်ပိုန်ဒြပ်မွဲတၠဂှ် ၚုဟ်ဗၞိက်ဖျာ မ္ဒးသၠုၚ်တိုန်ကၠုၚ်ဂှ်ဝွံ လက်ထက်ကံၚ်ဇြဳပၞာန် ဟိုတ်နူကဏ္ဍ ပုဂ္ဂလိကတံ ယာက္ဍိုပ်ဟွံမာန်ဂှ်ရ ပ္ဍဲကဵုလ္ပာ်အာက္ဍိုပ် နကဵုပဝ်လသဳဗၠေတ်တ်တံဂှ် အာရီုစိုပ်ဒၟံၚ် သွက်ဒတုဲဖဵုပူဂဵုသၟး ဒှ်ဒၟံၚ်ရောၚ် ပါ်ပါဲလဝ်ရ။

“အဓိကဂှ်တှ်ေ ကဏ္ဍပုဂ္ဂလိကတံရဏောၚ်။ ကဏ္ဍပုဂ္ဂလိကဂှ် ဗီုလဵုမှ ကလေၚ်ယိုပ်ယာဟွံမာန် ဒှ်ဒၟံၚ်ရ။ SME တံကီု၊ ပရေၚ်ဓလိုက်တမ်ရိုဟ်ဍုၚ်သ္အာၚ်တံကီု၊ ကမၠောန်ဇၞော်ဇၞော်အဏံတံကီု အပ္ဍဲပွိုၚ် ၂ သၞာံဏံဂှ် ပရေၚ်ဓလိုက်တမ်ရိုဟ် ကဏ္ဍပုဂ္ဂလိကတံဂှ် လ္ပာ်ပရေၚ်ဓလိုက်တမ်ရိုဟ်တံကီု၊ ကမၠောန်ပရေၚ်ပိုန်ဒြပ်တံကီုဂှ် ဒှ်ဒၟံၚ်အကာဲအရာ ကြေပ်ဂြတ်ဒၟံၚ်ကွေံကွေံဏောၚ်။ မွဲပၠန်ဂှ် ပဝ်လသဳကဵု လ္ပာ်ပရေၚ်အာက္ဍိုပ်တံရ။ ပဝ်လသဳဂှ်တှ်ေ ဥပမာ ခေတ်သဵုယှေဝ်လေတ်မ္ဂး နူကဵုသၞောတ်ပရေၚ်ပိုန်ဒြပ်သိုဝ်ယှေဝ်လေတ်ဂှ် ဗီုလဵုမှရုန်တိတ်ဟွံမာန်ပုဟ်။ စၟတ်လဝ်ကိုန်ဂစိုတ် မွဲအလန်ဓဝ်ရ။ ပဝ်လသဳဏံဂှ် ပြံၚ်ဟွံမာန်၊ ပလေဝ်ဟွံမာန်ပုဟ်။ ညးတၞဟ်တံဂှ် ပြံၚ်လှာဲဒၟံၚ်ယျ။ ပိုယ်တံဂှ် ပြံၚ်လှာဲဟွံမာန်မွဲသာ် စၟတ်သမ္တီလဝ် အရာတံဏံ အဓိကရ။ မွဲပၠန်ဂှ် လ္ပာ်အာက္ဍိုပ်ဂှ် အတ္တဂၠိုၚ်ဒၟံၚ်ကွေံကွေံဏောၚ်။ စွံစေတနာ လ္တူဍုၚ်ဟွံမာန်ပုဟ်ဟီုမ္ဂး ဍုၚ်ဏံဟွံတောတက်ပုဟ်။ က္ဍိုပ်သ္ကိုပ်အဆက်က်ဂှ် နူစတိုန်ကၠုၚ်တေံ ညံၚ်ကဵုဍေံရ၊ ဆ္ဂး ဟွံလအ်ပုဟ် အာရီုစိုပ်အာ လ္ပာ်ဒတုဲဖဵုဇကုသၟးတုဲ သာတုဲသ္ၚောဲအာကဵု ညးဍုၚ်ကွာန်တံတုဲ ဟိုတ်နူတၚ်နၚ်တံဏံတုဲ ဍုၚ်ပိုယ်ဂှ် သှ်ေၜက်အာလက္ကရဴ မ္ဒးသ္ၚဳဂၠိပ်ကေတ်ရ” သာ်ဝွံ သ္ဂးရ။

သ္အာၚ်နူဂှ်ပၠန် ညံၚ်ၚုဟ်ဗၞိက်အပ္ဍဲဍုၚ် ဂွံကလေၚ်စှ်ေကၠုၚ်ဂှ် ပဝ်လသဳဗၠေတ်တ် ကံၚ်ဇြဳပၞာန် မလလောၚ်ပ္တိတ်လဝ်တံဂှ် ဗွဲမဂတာပ်အခိၚ် နွံပၟိက်ဒးရုပ်သီကၠေံတုဲ ညံၚ်ၚုဟ်သြန်ဗၟာ ဂွံသၠုၚ်တိုန်ကၠုၚ်ပၠန်ဂှ် ဒးကၠောန်ၜိုတ်ရောၚ် သ္ဂးရ။

ညးမပလံၚ်ဗစိုပ်ဒၟံၚ်ဗၞိက်မွဲတၠဂှ်လေဝ် ပ္ဍဲကဵုၚုဟ်ကပေါတ်ဗၞိက် မ္ဒးသၠုၚ်တိုန်ကၠုၚ်တံဂှ် ကောန်ဂကောံဒပ်သၟဝ်တဲကံၚ်ဇြဳပၞာန်တံ ဟိုတ်နူအာတ်ဒၟံၚ်လှုဲ နကဵုဟိုတ်ပရေၚ်ဂီုကၠီုတံလေဝ် ပါလုပ်ဒၟံၚ်ရောၚ် ထံက်ထ္ၜးလဝ်ရ။

“ပြဟ်ဟ်ဏံ ဟွံပြေပြံၚ်ပုဟ်။ BGF တံ အာတ်ကၠုၚ်ဂၠိုၚ်တုဲ ညိညိတှ်ေ တၟော်ဟွံကိတ်ပုဟ်။ ဂၠံၚ်ဗြဝတဳ အကြာဒဵုတံဂှ် BGF သၟဝ်တဲဒပ်ပၞာန်ဗၟာတံ အာတ်ဂၠိုၚ်ဒၟံၚ်ဏောၚ်လေဝ်။ ဍေံတံဂှ် ၜိုန်ရဟီုဒၟံၚ် ပရေၚ်ဂီုကၠီု ပရေၚ်ဂီုကၠီုကီုလေဝ် ဍာံဍာံဂှ် ပရေၚ်ဂီုကၠီုဟွံသေၚ်မွဲသာ် အာတ်စရဏောၚ်။ မၞိဟ်ပရေံပရေံ ထ္ၜးဟိုတ်ကဵုပရေၚ်ဂီုကၠီုတုဲ ညံၚ်ညးဍုၚ်ကွာန်တံ၊ တၠကွဳစက်တံ ဂွံဒှ်ဒဒိုက် အာတ်သၠုဲ၊ ကြေပ်ဓရတ်သၠုဲဏောၚ်။ ညအ်ဂှ် ပရေံကွေံကွေံရ။ သွက်ကွဳစက် သွက်အဲဂှ် ပိ၊ပန်၊မသုန်ဠက်ပၠန်။ ပိုယ်တံဂှ် ကဵုအကံက်အခေါန်တုဲ အာဒၟံၚ်ညးသ္ကအ်ဖိုဟ်ရဏောၚ်။ ကွဳစက်ဟီုဂှ်လေဝ် ဒုၚ်လဝ်အကံက်ခေါန်ကၟိန်ဍုၚ်ရဏောၚ်။ ဗၞိက်ဟီုမ္ဂးလေဝ် ကဵုလဝ်အကံက်အခေါန်ကၟိန်ဍုၚ်ရဏောၚ်။ ဍေံတံဂှ် ထ္ၜးဟိုတ်ကဵုပရေၚ်ဂီုကၠီုတုဲ ဗက်ဒၟံၚ်ဗီုဏံမ္ဂး ၚုဟ်ဖျာတံတိုန်တွဵုရဒှ်” သာ်ဝွံ သ္ဂးရ။

မွဲလ္ပာ်ပၠန်ဂှ် က္ဍိုပ်သ္ကိုပ်ပၞာန်ဂှ် စပ်ကဵုပရေၚ်ပလံၚ်ဗစိုပ်ဗၞိက်ပလံၚ်တုဲ ပ္ဍဲကဵုသၞေဟ်ကၚ် မၞုံတရဴဂၠံၚ်တံဂှ် ခရိတ်အိုတ် အရာဟွံမွဲပၟိက်တံ ညံၚ်ဂွိုအ်ဒးအိုတ် ညးတာလျိုၚ် နူကဵုတွဵုရး ကေုာံ ရးဒေသတံ ကဵုက္ဍိုပ်တုဲ နွံပၟိက်ဒးရေၚ်တၠုၚ်ကောပ်ကာဲဂှ် ဟီုရ။

ဆ္ဂး ကြဴနူဒပ်ပၞာန်သီအဝဵုတုဲ ပ္ဍဲကဵုသၞေဟ်ကၚ်စၟဳစၟတ် မပံက်လဝ်ဂမၠိုၚ် ကောန်ဂကောံဒပ်ကံၚ်ဇြဳပၞာန်တံ အာတ်လှုဲ ဂၠိုၚ်ကဵုဆတံဂှ် ဒဵုကဵုအခိၚ်လၟုဟ် ပွမရေၚ်တၠုၚ်ကေတ်ဒုဟ်ဂှ် ဟွံမွဲဏီရ။

ပ္ဍဲဍုၚ်ဗၟာဂှ် အပ္ဍဲကာလဒပ်ပၞာန်သီအဝဵုပွိုၚ် ၂ သၞာံပြၚ်ဏံ ၚုဟ်ကပေါတ်ဗၞိက်ဂမၠိုၚ်ဝွံ တန်တဴကဵုလ္တူဂကူအဇာဍေံတုဲ သၠုၚ်တိုန်ကၠုၚ် နူ (၃) ဆ စဵုကဵု (၅) ဆဂှ်ရ နကဵုညးဍုၚ်ကွာန်သ္ဇိုၚ်တံ သွက်ဂွံစသုၚ်အရိုဟ်ဒဒှ်တ္ၚဲရဂှ် ဒးဂဗဒၟံၚ်အခက်အခုဲရ။

ရုၚ် UNOCHA ဂှ် ဟိုတ်နူပရေၚ်ပၞာန်သီအဝဵုတုဲ လၟိဟ်မၞိဟ်ဍုၚ်ဗၟာ ၁၇ ဒဿမ ၆ ပြကောဋိကိုဋ်ဂှ်ဝွံ သီုကဵုၚုဟ်ဖျာက္ဍၚ်ကီု ဟိုတ်နူကဵုအကြေပ်အဂြတ်နာနာသာ်တံဂှ်တုဲ နွံပၟိက်ဒၟံၚ်ကဵု အရီုဗၚ်ဂမၠိုၚ်ရောၚ် ပ္ဍဲကဵုသၞာံဏံမံက်တေံ လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီုတ်ဓာတ်−Social Media

Leave a Reply

Your email address will not be published. Required fields are marked *