ပ္ဍဲတွဵုရးဍုၚ်မန် ဂကောံဇြဟတ်ပၠန်ဂတးတံ ၜိုတ်လဵုထိၚ်ဒက်မာန်လဝ်ယျရော

မတ်မလီု၊ ဂျောန် (၁၆)

ဂကောံဇြဟတ်ပၠန်ဂတးရပ်လွဟ် မဖျေံသ္ဇိုၚ်ချဳဒရာၚ်ဒၟံၚ် အပ္ဍဲတွဵုရးဍုၚ်မန်တံဝွံ အပ္ဍဲကာလဒပ်ပၞာန်သီအဝဵု ပွိုၚ်ၜါသၞာံဏံ စိုပ်ကၠုၚ်ကဆံၚ် အုပ်ဓုပ်တိဍာ်မာန်ယျဂှ် ညးတာလျိုၚ် ဂကောံဒပ်စဵုဒၞါဒေသ (PDF) တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဂကောံဒပ်စဵုဒၞါဒေသ (PDF) တံဂှ်ဝွံ အခိၚ်ဒပ်ပၞာန်စသီအဝဵုတေံ ပြံၚ်လှာဲလွေဟ်ပၞာန်ဓလုက်တုဲ နူကဵုဗ္တိုက်ကၠုၚ် ရဲလ္ပာ်ပရေၚ်အုပ်ဓုပ် ကေုာံ ပရေၚ်ပၞာန် မဒှ်တိုၚ်အထံက်ကံၚ်ဇြဳပၞာန်တံဂှ် အခိၚ်လၟုဟ် ထ္မံက်ကၠုၚ်ပရေၚ်ပြုပြေၚ်ပၞာန် မလုပ်စိုပ်ဍိုက်ဗ္တိုက် နဒဒှ်ဗီုပြၚ်ပၞာန်ထ္ပက်တံဂှ်ရ။

ပ္ဍဲကဵုပွိုၚ်ဍုၚ် ၁၀ ဍုၚ် တွဵုရးဍုၚ်မန်ဂှ် ပွိုၚ်ဍုၚ်သဓီု၊ ကျာ်ထဝ် ကေုာံ ပွိုၚ်ဍုၚ်ၜဳကလေၚ်တံကီု သီုကဵုပွိုၚ် ဍုၚ်ရေဝ် ကေုာံ ဒေသသၠုၚ်ကျာ ပွိုၚ်ဍုၚ်ဇြပ်ဗုတံဂှ်ဝွံ ပရေၚ်ချဳဒရာၚ် ဂကောံဒပ်စဵုဒၞါဒေသတံ ဇြဟတ် ခိုဟ်တုဲ ဒှ်တိဍာ် က္တဵုဒှ်လဝ် ပရေၚ်ဇီုကပိုက်ဗ္တိုက် ကုဒပ်ကံၚ်ဇြဳပၞာန် ဂၠိုၚ်အိုတ်မွဲရ။

ညးဒုၚ်တာလျိုၚ် PDF ခရိုၚ်သဓီု ကိုဝ်အေမေန်ထောန်ဂှ် အပ္ဍဲကာလဒပ်ပၞာန်သီအဝဵု ပွိုၚ်ၜါသၞာံဏံ ပရေၚ်ထိၚ်ဒက်တိဍာ် သီု KNLA သီုဂကောံဒပ်ပံၚ်ကောံဒပ်ပၠန်ဂတးတံဂှ်ဝွံ နွံဒၟံၚ်ကြပ်ပ်ကဵု ကံၚ်ဇြဳပၞာန် တုဲ လ္ပာ်ကံၚ်ဇြဳပၞာန် နူကဵုဗီုပြၚ်ထ္မံက်ကၠုၚ်ပရေၚ်ပၞာန်ဂှ် ပြံၚ်လှာဲကၠုၚ်ဗီုပြၚ်ပၞာန်ဒုၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“နကဵုဂကောံပံၚ်ကောံပရေၚ်ပၠန်ဂတးပိုယ်တံ လ္တူနူကဵုသၞာံတုဲတေံဂှ် သၠုၚ်ပ္တိုန်အသိၚ်တုဲ ဗ္တိုက်အာမာန်ဏောၚ်။ တုဲပၠန် ပရေၚ်ထိၚ်ဒက်တိဍာ်ဟီုဂှ်လေဝ် ပိုယ်တံဂှ် နွံဒၟံၚ်ကြပ်ပ်ကဵု ဍေံတံရ ဏောၚ်။ လ္ပာ်ကံၚ်ဇြဳပၞာန်တံဂှ် ပြံၚ်လှာဲကၠုၚ် ဗီုပြၚ်ပၞာန်ဒုၚ်တံရ။ အလဵုဍေံတံ ပလီုဂၠံၚ်၊ ပလီုဒဒန်တံဂှ် ဍေံတံကၠောန်ကၠုၚ်ကေတ်တ်ရ။ တုဲပၠန် ပန်ပှော်ကဵုလွဟ်ဇၞော်တံရ။ ပရေၚ်ဗ္တိုက်ကဵုက္ၜၚ်ကျာတံဂှ်လေဝ် ဍေံတံသာတုဲ ကၠောန်ကၠုၚ်ဂှ် ဂွံဆဵုကေတ်ရ။ နဲဗျူဟာလ္ပာ်ပိုယ်တံဂှ် ပိုယ်တံ ပလေဝ်ပလေတ်လဝ်နွံ” သာ်ဝွံ ညးသ္ဂးရ။

အပ္ဍဲခရိုၚ်သဓီုဂှ် သီုကဵုပါလုပ်ဒပ်ပၞာန်ဗၠးၜးကောန်ဂကူကရေၚ် KNLA မဒှ်ဒပ်ရပ်လွဟ် KNU ဂှ် ဂကောံဒပ်စဵုဒၞါဒေသတံ နွံဒၟံၚ် ၂၆ ဂကောံရ။

စနူဒပ်ပၞာန်သီအဝဵုတုဲ အပ္ဍဲပွိုၚ်ၜါသၞာံပြၚ်ဏံ ပ္ဍဲကဵုခရိုၚ်သဓီုဂှ် ပရေၚ်ဆေၚ်မုက်ဗ္တိုက် ဒပ်ပံၚ်ကောံစဵုဒၞါ ဒေသတံ ပါလုပ်သီုကဵု KNLA တံဂှ်ကဵု ဒပ်ကံၚ်ဇြဳပၞာန်တံဂှ်လေဝ် နွံဒၟံၚ်ဗွဲမဂၠိုၚ်ဂၠေၚ်တုဲ လ္ပာ်ကံၚ်ဇြဳပၞာန် တံဂှ် ဒးဗလးလဝ်တဲ ဗ္ဒိုပ်ကျတံၚ်သုက်၊ ဗ္ဒိုပ်လေဝ်သအ်လအ် ကေုာံ ဗ္ဒိုပ်ဇြဳကုန် ပိဗ္ဒပ်ရ။

ညးမၞုံအခေါၚ်ဟီုဂး ဒပ်ပၠန်ဂတးတွဵုရးဍုၚ်မန် (MSRF) နာဲနဂါဂှ်လေဝ် ပ္ဍဲကဵုဒေသသ္ကုတ်သၠုၚ်ကျာ ပွိုၚ်ဍုၚ်ဇြပ်ဗုကဵု ပွိုၚ်ဍုၚ်ရေဝ်တံဂှ်လေဝ် ပရေၚ်အုပ်ဓုပ် ကံၚ်ဇြဳပၞာန်တံကဵု သၞောဝ်ဥပဒေ ၜိုဟ်လလမ် တံဂှ်ဝွံ စဵုကဵုလီုလာ် က္တဵုဒှ်ဒၟံၚ်တုဲ ကောန်သ္ဂံၚ်ပၠန်ဂတးတံ အခိၚ်ဟွံရုဲ လုပ်စိုပ်အာကၠုၚ် ကွာန်ဇၞော်လ္ၚဵု တံမာန်ဒၟံၚ်ရောၚ်ဂှ် သ္ဂးရ။

“ပ္ဍဲဒေသသ္ကုတ်သၠုၚ်ကျာဇြပ်ဗု ကေုာံ ရေဝ်တံဂှ် ပရေၚ်အုပ်ဓုပ်ကံၚ်ဇြဳပၞာန်တံကဵု ပရေၚ်အုပ်လဒံ သၞောဝ်တံ ညံၚ်ကဵုလီုလာ်ဒၟံၚ်အိုတ်ယျဏောၚ်ဂှ် ဟီုဂွံရ။ အမှုရာဇဝတ်တံ၊ အမှုကၠတ်ဂၠံက်တံ ဂၠိုၚ်တိုန်ကၠုၚ်ကဵုဆရ။ မွဲအခိၚ်ဓဝ် ကောန်သ္ဂံၚ်ပၠန်ဂတးတံလေဝ် အခိၚ်ဟွံရုဲ လုပ်စိုပ်အာကၠုၚ် ပ္ဍဲကွာန်ဇၞော်လ္ၚဵုတံမာန်ရ။ စိုပ်ဒၟံၚ်ကဆံၚ်ဏံရ။ သ္အာၚ်နူဂှ်ပၠန် ဗ္ဒိုပ်ဗၠာဲသၟိၚ်ဗွဲမဂၠိုၚ်ဂၠေၚ် နူကဵုသၠုၚ်ကျာဇြပ်ဗုတံကဵု ပွိုၚ်ဍုၚ်ရေဝ်တံဂှ် ဒးကၟာတ်ထောံ။ ဒးပါဲစ္ဍးအာအိုတ်ရ။ ရံၚ်ကဵုညအ်တုဲ ပ္ဍဲအရာထိၚ်ဒက်တိဍာ်တံဂှ် ဒးဂဗဒၟံၚ် ပရေၚ်ဆောံလေၚ်တံ ကွေံကွေံရောၚ်ဂှ် ဟီုဂွံရ” သာ်ဝွံ ညးသ္ဂးရ။

ပ္ဍဲကဵုဒေသသ္ကုတ်သၠုၚ်ကျာ ပွိုၚ်ဍုၚ်ဇြပ်ဗုကဵု ပွိုၚ်ဍုၚ်ရေဝ်တံဂှ် ကံၚ်ဇြဳပၞာန်ဝွံ ၜိုတ်ပွဳပွူဗ္ဒါဲဗ္ဒါဲ ဒၞါဲဗ္ဒပ်ဖျေံသ္ဇိုၚ် ဒပ်ပၞာန်တံ မၞုံဂှ်ကဵု လ္တူဍုၚ်တံဂှ်ရ ထိၚ်ဒက်မာန်လဝ်တုဲ လက္ကရဴဏံဂှ်လေဝ် ကၠောန်ၜိုတ်ဒၟံၚ် ကမၠောန်ပသောၚ်တိဍာ်တံ လၟေၚ်ၚ်ဂှ် ဟွံဂွံဆဵုကေတ်ရပုဟ်ဂှ် နာဲနဂါ ဟီုထ္ၜးကၠုၚ် အကာဲအရာလၟုဟ်ရ။

အပ္ဍဲပွိုၚ်ဍုၚ်ရေဝ်ဂှ် ဂကောံဒပ်စဵုဒၞါဒေသရပ်လွဟ် မပၠန်ဂတးဒစဵုဒစးဒၟံၚ် သၞောတ်တၠအဝဵုပၞာန်ဂှ် ဟွံအောန်နူကဵု ၁၂ ဂကောံ နွံဒၟံၚ်တုဲ စွံပွန်ဗ္တိုက်ဒၟံၚ် ရုၚ်ဌာနမဆေၚ်စပ်ဂမၠိုၚ် သီုကဵုတမ်ဒပ်ကံၚ်ဇြဳပၞာန်တံ၊ ဗ္ဒိုပ်ဗၠာဲသၟိၚ်တံ ပါလုပ်ဒၟံၚ်ကီုရ။

ဒဵုကဵုအခိၚ်လၟုဟ် ဟိုတ်နူပရေၚ်ဗ္တိုက် ဂကောံဒပ်စဵုဒၞါဒေသတံတုဲ ပ္ဍဲကဵုဗ္ဒိုပ်ဗၠာဲသၟိၚ် ၆ မၞုံအပ္ဍဲပွိုၚ်ဍုၚ်ဇြပ်ဗုကဵု ပွိုၚ်ဍုၚ်ရေဝ်တံဂှ် ကောန်ဒပ်ဗၠာဲသၟိၚ်တံ ဟွံမံၚ်အိုတ်ရတုဲ ကၠဟ်ထောံလဝ်ဗ္ဒိုပ်ဂှ် အတိုၚ်ဏံရောၚ်ဂှ်လေဝ် နွံဒၟံၚ်ရ။

ညးဒေသ ဒၟံၚ်ပွိုၚ်ဍုၚ်ရေဝ်မွဲတၠဂှ် ဂကောံဒပ်စဵုဒၞါတံ ၜိုန်ရဟီုဂးဒၟံၚ် အုပ်ဓုပ်တိဍာ်မာန်ယျကီုလေဝ် ဒၞါဲလ္ၚဵုလ္ၚဵု ဒၞါဲပရေၚ်ပန်ပှော်ဖံက်ဗ္တိုဟ်တံ ဟွံမွဲမွဲသာ် အာကၠုၚ်ဒၟံၚ်ဗီုတြေံတံဂှ် ဟိုတ်နူစက်ယန္တယာပရေၚ်အုပ်ဓုပ်ကံၚ်ဇြဳပၞာန်တံ နွံဒၟံၚ်ဂှ်ရ ဒှ်ဒၟံၚ်ဒဒိုက်တံရောၚ်ဂှ် သ္ဂးရ။

“ ဂကောံဒပ်စဵုဒၞါဒေသတံဂှ် ပရေၚ်အုပ်ဓလီုတိဍာ်တံ နွံဒၟံၚ်ရောၚ် ၜိုတ်လဵုဟီုဟီု ပ္ဍဲဒၞါဲထေၚ်ကေတ် ပရေၚ်အုပ်ဓလီုကံၚ်ဇြဳပၞာန်တံ ဟွံမွဲပုဟ် သီုဖအိုတ်တံဂှ် ကံၚ်ဇြဳပၞာန်တံ အုပ်ဓလီုလဝ်တံ နွံဒၟံၚ်ရ။ နွံဒၟံၚ်သၟဝ်စက်ယန္တယာ ကံၚ်ဇြဳပၞာန်ရ။ ဒၞါဲလ္ၚဵုတံတှ်ေ ပၞာန်လေဝ်ဟွံဒှ်ပုဟ်၊ ဗုမ်လေဝ် ဟွံထ္ကးပုဟ်၊ မာၚ်လေဝ် ဟွံထ္ကးပုဟ်၊ မၞိဟ်တံဂှ် မံၚ်မံၚ်သၞောတ်တြေံရ။ ဆ္ဂး ပ္ဍဲကဵုဒၞါဲမံၚ်စံၚ်ဒၟံၚ်သာ်ဏံတံဂှ် မၞိဟ်လ္ပာ်ကံၚ်ဇြဳပၞာန်တံ နွံဒၟံၚ်။ နွံဒၟံၚ်သၟဝ်စက်ယန္တယာကံၚ်ဇြဳပၞာန်တံရ။ ဍေံတံဝွံ ဒးဂဗဒၟံၚ် သုခ၊ ဒုက္ခ နူကဵုသၟဝ်သ္ကိုပ်အုပ်ဓုပ် မကၠောန်ပတုဲဒၟံၚ်ဝတ် ကံၚ်ဇြဳပၞာန်တံဟီုဂှ် ဒှ်ဓဝ်ဍာံဗလးတိဏံရ” သာ်ဝွံ ညးသ္ဂးရ။

မွဲလ္ပာ်ပၠန်ဂှ် နကဵုကံၚ်ဇြဳပၞာန် ဟိုတ်နူဒးပံက်လဝ်မုက်ပၞာန် ကြပ်အလုံဍုၚ်မွဲဂှ်ရ ပ္ဍဲအခိၚ်သီအဝဵု လောန်ကၠုၚ်ၜါသၞာံပြၚ် လ္တူဇြဟတ်ဒပ်ဍိုန်လျစှ်ေ ဂှ် ပ္ဍဲကဵုဗ္ဒိုပ်ကၚ်တံ၊ သၞေဟ်ကၚ်ဂီုကၠီုလ္တူဒဒန်တဂှ်လေဝ် ထ္ပက်အဇာ သုၚ်စောဲကၠုၚ်ဒၟံၚ် ပၞာန်ညးဍုၚ်ကွာန်တံကဵု ဒပ်မၚ်ပယျဵု (BGF) တံရောၚ်ဂှ် ညးဒုၚ်တာလျိုၚ် PDF တံ သ္ဂးရ။

ညးဒုၚ်တာလျိုၚ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်ရေဝ်ဂှ်လေဝ် နူကဵုဒပ်အမၠံက် မၞုံပ္ဍဲတိဍာ်ထိၚ်ဒဝ်ကံၚ်ဇြဳပၞာန်ဂှ် ပရေၚ်ပန်ပှော်လွဟ်ဇၞော်တံဟေၚ်နွံတုဲ ဒၟါနူစက်ယန္တယာပရေၚ်အုပ်ဓုပ် မထ္ပက်ကရောၚ်ပၞာန်မာန်တံ ဟွံမွဲဂှ်ရ ပ္ဍဲကဵုပွိုၚ်ဍုၚ်ရေဝ်ဂှ် နကဵုကံၚ်ဇြဳပၞာန် တိဍာ်ထိၚ်ဒက်ဂှ် စိုပ်ဒၟံၚ်သၟဝ် ၅၀ တၟံကၠံယျရောၚ် ဟီုရ။

“နူကဵုဒပ်အမၠံက် သၟဝ်တိဍာ်ဍေံတံထိၚ်ဒက်တံဂှ် ပန်ပၠောပ်ဒၟံၚ်လွဟ်ဇၞော်တံနွံရ။ ဍေံတံထ္ပက်ပၞာန်တံ စက်ယန္တယာပရေၚ်အုပ်ဓုပ်ဍေံတံဂှ် လ္ပာ်ဏံ ဟွံမွဲရပုဟ်။ ဒေသနှေဟ်ခရေၚ် ကၞောတ်ရေဝ်သၟဝ်ကျာ မ္ၚးတိဍာ် ERO တံကဵု ကၞောတ်ဇြပ်ဗုသၠုၚ်ကျာတံဂှ် ဍေံတံ ထိၚ်ဟွံမာန်ရပုဟ်။ စက်ယန္တယာပရေၚ်အုပ်ဓုပ်ပၞာန်တံဂှ် ဟွံမွဲရပုဟ်။ ပရေၚ်အုပ်ဓလီုတိဍာ်၊ ပရေၚ်ဂီုကၠီုတံဂှ် မုမှအုပ်ဓုပ်ဟွံဂွံရပုဟ်။ ပိုယ်တံရ သွက်ဂွံထိၚ်ဒက်နွံ။ နကဵုဍေံတံ ပ္ဍဲကဵုပွိုၚ်ဍုၚ်ရေဝ်ဂှ်မ္ဂး တိဍာ်အုပ်ဓုပ်ဂှ် စိုပ်ဒၟံၚ် သၟဝ် ၅၀ တၟံကၠံယျ” သာ်ဝွံ သ္ဂးရ။

ဆ္ဂး ပွိုၚ်ဍုၚ်သှ်ေဒၟံၚ် ပ္ဍဲတွဵုရးဍုၚ်မန်ဂမၠိုၚ် မတ်မလီု၊ ပံၚ်၊ ၜါသွာၚ် ကေုာံ ပွိုၚ်ဍုၚ်မုဟ်ဍုၚ်တံဂှ်ဝွံ ၜိုန်ရဒှ်ဒေသ လ္ပာ်ကံၚ်ဇြဳပၞာန်တံ အုပ်ဓုပ်လဝ်ပေၚ်ၚ်ကီုလေဝ် ပရေၚ်အုပ်လဒံသၞောဝ်ဓဝ်တံ ဆောံလေၚ်ဒၟံၚ်တုဲ ကောန်ဂကောံဒပ်ကံၚ်ဇြဳပၞာန်တံလေဝ် ပရေၚ်ဂွိၚ်ဂွါဲ လ္တူပရေၚ်ဂီုကၠီုတံဂှ် နွံဒၟံၚ်ရ။

ပ္ဍဲကဵုပွိုၚ်ဍုၚ်ကျာ်မြဟ် ဒၞါဲပရေၚ်ချဳဒရာၚ်ပရေၚ်ပၞာန် ဂကောံဒပ်ပံၚ်ကောံ ကေုာံ KNLA တံနွံဂှ်မ္ဂးလေဝ် အရာပ်လ္တူဍုၚ်လ္ၚဵုတံကဵု ကွာန်ရးလ္ၚဵုလ္ၚဵုတံညိဓဝ်ဂှ်ရ ကံၚ်ဇြဳပၞာန် အုပ်ဓုပ်မာန်လဝ်တုဲ လ္ပာ်ဂၠံၚ်မတ်မလီု−ၜါသွာၚ်လ္ၚဵုတံဂှ် ကံၚ်ဇြဳပၞာန် ဒးဗလးလဝ်တဲရ။

ပွိုၚ်ဍုၚ်ရေဝ် ဒၞါဲပရေၚ်ပၞာန်မသ္ကာတ်မြဟ်ဒၟံၚ်ဂှ်ဝွံ လ္ဂောံကဵုအကာဲအရာတိဍာ်တွဵုရးဂှ်မ္ဂး ဒှ်ပွိုၚ်ဍုၚ် တိဍာ်သၠဲလးအိုတ်မွဲတုဲ သီုကဵုဒှ်တိဍာ်ထိၚ်ဒဝ် ဗော်ဍုၚ်မန်တၟိ မဒှ်ဂကောံရပ် လွဟ်ကောန်ဍုၚ် အရၚ်မွဲကီုဂှ်တုဲ ဒှ်ဒေသ နွံဒၟံၚ်သၟဝ်ပရေၚ်အုပ်ဓုပ်ဗော်သွးကောန်ဂကူကရေၚ် KNU တံ မွဲဒကုတ်မွဲဒကူကီုရ။

ပ္ဍဲကဵုအကာဲအရာသာ်ဏံဂှ် ဒပ်မဟာ−၆ ဗော်သွးကောန်ဂကူကရေၚ် KNU တံဂှ် ဂကောံဒပ် ညးတံဂမၠိုၚ်ဝွံ မွဲဒမြိပ်ဂၠံၚ်ဇၞော် မတ်မလီု၊ မုဟ်ဍုၚ်၊ ဇြပ်ဗု၊ ရေဝ်၊ ထဝါဲ၊ ဗိက် ကေုာံ မွဲဒမြိပ်ဂၠံၚ်ဇၞော် စၟတ် (၈) တံဂှ် ချဳဒရာၚ်ထိၚ်ဒက်ဒၟံၚ်ယျရောၚ် သ္ဂးရ။

ဟိုတ်ဂှ်ရ ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံဂှ် အပ္ဍဲအခိၚ်ကာလခြာဟွံလအ်ဏံ သၠုၚ်ပ္တိုန်အာ အသိၚ်ပၞာန် ပွိုၚ်ဍုၚ်ရေဝ်ဂှ်ရ နကဵုညးဍုၚ်ကွာန်တံ ဟွံမွဲပၟိက်မွဲသာ် ညံၚ်ဂွိုအ်အာတရဴ အိုတ်ဂှ်ကီု၊ အခိၚ်ဒပ်စဵုဒၞါတံ စၟဳတ်မ္ဂး သွက်ဂွံဒုၚ်စၟဳတ်ကဵုခိုဟ်ဟ်ဂှ်ကီုဂှ်လေဝ် ဒုၚ်လဝ်ဂုဏ်ရ။

ညးခါတ်အကာဲပရေၚ်ပၞာန်တံဂှ် နကဵုကံၚ်ဇြဳပၞာန် ပ္ဍဲရာသဳဗြဲကျာတၟးကၠုၚ်စိုပ်ဏံ လ္တူဂကောံဇြဟတ် ပၠန်ဂတးတံ ဗ္တိုက်ကၠုၚ် ဗ္ဒိုပ်ဖျေံသ္ဇိုၚ်ဒပ်ပၞာန်တံကဵု ဍုၚ်ဇၞော် မထိၚ်ဒက်လဝ်လၟုဟ်တံဂှ် ညံၚ်ဂွံဒုၚ်ဒဝ် မာန် ပရေၚ်ဒက်ပ္တန်ပခိုၚ်တံ ကၠောန်ကၠုၚ်မာန်တုဲ နကဵုလွဟ်လက်နက် မဂွံလဝ်စေဝ်လ္တူတံဂှ် ကၠောန်သ္ပကၠုၚ် ပရေၚ်ဗ္တိုက်တရဴကျာတံမာန်တုဲ ဗ္တိုက်ကၠုၚ်ညးဍုၚ်ကွာန် ဟွံမွဲကဵုဒုဟ်ဒဏ်တံ သ္ကာတ်တ်မြဟ်ဟ်မာန်ရောၚ်ဂှ် သ္ၚဳဂၠိပ်ဒၟံၚ်အိုတ်ရ။

ပရိုၚ်−သြၚ်လောန်တိုၚ်(မ်)

ဗီု−Ye PDF

Leave a Reply

Your email address will not be published. Required fields are marked *