လ္ဂုၚ်၊ ဂျောန် (၁၆)
ကံၚ်ဇြဳပၞာန်တံ သုၚ်စောဲနဲကဲနာနာတုဲ ညံၚ်ၚုဟ်ထဝ်အပ္ဍဲဍုၚ်ဂွံစှ်ေ ၜိုန်ရကၠောန်ဒၟံၚ်ကီုလေဝ် ပ္ဍဲကဵုဂိတုဂျောန် သတ္တာဟဒုတိယဂှ် ထဝ်မဳဠေန် ထဝ်ဒကောၚ် မွဲဒ္ကေဝ်ဂှ် ၚုဟ်ထပ်သၠုၚ်တိုန်ကၠုၚ် စဵုကဵု (၃၁) ကိုဋ်ဒ္ကေဝ်ပြၚ်ရောၚ် တၠကမၠောန်ထဝ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ထဝ်အပ္ဍဲဍုၚ်ဝွံ ဟိုတ်နူဒုၚ်သ္ဇိုၚ်ကဵု လ္တူၚုဟ်ထဝ်ကဵု ၚုဟ်ဒဝ်ဠာဂၠးတိတံဂှ်ရ အပ္ဍဲအကြာတ္ၚဲတံဏံ ၚုဟ်ဒဝ်ဠာအပ္ဍဲဍုၚ် သၠုၚ်တိုန်ဒၟံၚ်တုဲ ၚုဟ်ထဝ် ထပ်သၠုၚ်တိုန်ကၠုၚ်ရ။
ၚုဟ်ဒဝ်ဠာဝွံ အပ္ဍဲဂိတုဂျောန် သတ္တာဟပထမဂှ် မွဲဒကေဝ် နူကဵုၚုဟ်မၞုံ ၂၉၀၀ ဒ္ကေဝ်ဂှ် အခိၚ်လၟုဟ် မွဲဒဝ်ဠာဂှ် ၚုဟ်သၠုၚ်တိုန်ကၠုၚ် စဵုကဵုဗ္ဒါဲ ၃၀၀၀ ဒ္ကေဝ်ရ။
ဟိုတ်နူၚုဟ်ဒဝ်ဠာသၠုၚ်တိုန်ကၠုၚ်တုဲ ထဝ်မဳဠေန် ထဝ်ဒကောၚ်မွဲဒ္ကေဝ်ဂှ် နူကဵုပွဳပွူ ၃၀ ကိုဋ်ဒ္ကေဝ်ဂှ် ၚုဟ်တိုန်ကၠုၚ် စဵုကဵု ၃၁ ကိုဋ်ဒ္ကေဝ်ရ။

တၠကမၠောန်ထဝ်မွဲတၠဂှ် ဟိုတ်နူၚုဟ်ထဝ်အပ္ဍဲဍုၚ် သၠုၚ်တိုန်ဒၟံၚ်ဂှ်ရ အပ္ဍဲဗွဝ်ဖျာဂှ် ပရေၚ်သွံရာန်ညိၚ်ဒၟံၚ်တုဲ ယဝ်ရထိၚ်ဒက်ၚုဟ်ဒဝ်ဠာဟွံမာန်မ္ဂး ၚုဟ်ထဝ် ထပ်သၠုၚ်တိုန်ကၠုၚ်မာန်ရောၚ် သ္ၚဳဂၠိပ်လဝ်ရ။
“ဟိုတ်အဓိကဂှ်တှ်ေ ၚုဟ်ထဝ်ဂၠးတိဂှ် အတိုၚ်တြေံရဏောၚ်။ တိုန်စှ်ေကွေံကွေံဂှ် ဟွံမွဲပုဟ်။ ၚုဟ်ဒဝ်ဠာတိုန်တုဲ ၚုဟ်ဒဝ်ဠာကဵု ၚုဟ်ထဝ်ဂၠးတိဂှ်ကၟဝ်ထောံတုဲ အခိၚ်စထောံ ကဵု (၁ ဒဿမ ၈၇၅) ဂှ် ထဝ်နူကဵုဗွဝ်ဖျာအပ္ဍဲဍုၚ်တံလေဝ် ကလေၚ်တိုန်ကၠုၚ်ကီုရ။ လၟုဟ်ဂှ် ၚုဟ်ထဝ်သၠုၚ်ဒၟံၚ်ကွေံကွေံတုဲ ဇြဟတ်ရာန်ဂှ် ဟွံမွဲပုဟ်။ မၞိဟ်ရာန်လ္ၚဵုတံဂှ်လေဝ် ၚုဟ်ထပ်တိုန်ဒၟံၚ်ဏီဟာဂးတုဲ မၚ်မံၚ်မွဲလစုတ်တံ နွံရ။ မၞိဟ်ရာန်တံဂှ်လေဝ် ရာန်ညိညိရဂှ် ၚုဟ်ဂှ်က္ဍၚ်ဒၟံၚ်ယျလေဝ်။ သီုသွံ၊ သီုရာန် သီုၜါသာ်ဂှ် ညိၚ်ဒၟံၚ်ရ။ လုကဴဖျေံဒဝ်ဠာဟွံမာန်ဏီမ္ဂး ၚုဟ်ထဝ်ဂှ်တှ်ေ ဆက်က္ဍၚ်အာဒၟံၚ်ဏီဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် ၚုဟ်ထဝ်ဝွံ ပြဟ်ဟ်ဏံ ဟွံညိၚ်ဝတ်တုဲ ပြံၚ်လှာဲဒၟံၚ်ဂှ်ရ ၚုဟ်ထဝ်ချိုတ်တ်ပၠိုတ်တ်ဂှ်ရဂှ် ဒးချိၚ်ခယျဝါတ်ဒၟံၚ်တုဲ ညံၚ်ၚုဟ်ထဝ်ဂွံညိၚ်ဝတ် ၚုဟ်ဒဝ်ဠာဂွံစှ်ေ ဂှ် ဒးကၠောန်ဗွဲမပြဟ်ထေက်ရောၚ်ဂှ် ညးဆက်ဟီုလဝ်ရ။
ဟိုတ်နူၚုဟ်ထဝ်အပ္ဍဲဍုၚ် သၠုၚ်တိုန်ကၠုၚ်ဂှ်ရ ကံၚ်ဇြဳပၞာန်တံ ၜိုန်ရကော်စၟဳစၟတ် တၠကမၠောန်ထဝ်လ္ၚဵုတံ နွံကီုလေဝ် ၚုဟ်ထဝ်ဂှ် ဆက်က္ဍၚ်ဒၟံၚ်ဖိုဟ်ရ။

ကံၚ်ဇြဳပၞာန်ဂှ် ၜိုန်ရစၟတ်သမ္တီလဝ် ၚုဟ်ထဝ်အပ္ဍဲဍုၚ် မွဲဒကေဝ် ဗ္ဒါဲ ၂၃ ကိုဋ်ဒ္ကေဝ်ကီုလေဝ် အပ္ဍဲဗွဝ်ဖျာဂှ် နွံဒၟံၚ် (၃၁) ကိုဋ်ဒ္ကေဝ်ပြၚ်တုဲ ၚုဟ်ကွာဒၟံၚ် ၈ ကိုဋ်ပြၚ် နွံဒၟံၚ်ရ။
မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ညံၚ်ၚုဟ်ထဝ်အပ္ဍဲဍုၚ် ဂွံစှ်ေဂးတုဲ ပ္ဍဲကဵုအခိၚ်တုဲကၠုၚ်တေံ ထဝ်တၚ်္ကာတံဂှ် သွံတြးကဵုလဝ် နကဵုလျိုၚ် မွဲဒ္ကေဝ်၊ ၜါမး၊ မွဲမးကီုလေဝ် ဟွံအံၚ်ဇၞးလဝ်ရ။
ၚုဟ်ထဝ်အပ္ဍဲဍုၚ်ဝွံ ဒပ်ပၞာန်သီအဝဵုတုဲ ပ္ဍဲကဵုသၞာံတုဲကၠုၚ်တေံ အပ္ဍဲဂိတုအဝ်ဂါတ် သတ္တာဟလက္ကရဴ အိုတ်ဂှ် ၚုဟ်ဒဝ်ဠာ သၠုၚ်တိုန်ကၠုၚ်လဝ် ဂၠိုၚ်ကဵုဆဂှ်ရ ထဝ်ဒကောၚ်မဳဠေန်မွဲဒ္ကေဝ်ဂှ် ၚုဟ်ကေၚ်သၠုၚ်တိုန်လဝ် စဵုကဵု (၃၅) ကိုဋ်ဒ္ကေဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ

