ညးဒေသတယျေတ်ချောၚ် ၁၀,၀၀၀ ပြၚ် နွံဒၟံၚ်ပၟိက် အရီုဗၚ်စၞစဇွောံမ နဒဒှ်ကာတၟေၚ်

တယျေတ်ချောၚ်၊ ဂျောန်(၁၇)

ရးဒေသဇၞော်တၞၚ်သြဳ ပ္ဍဲပွိုၚ်ဍုၚ်တယျေတ်ချောၚ်ဂှ် ဟိုတ်နူဒပ်ကံၚ်ဇြဳပၞာန် ထ္ပက်လုပ်ကရောၚ်ပၞာန် စံၚ်ပလီုလဝ်ကွာန်ဂှ်ရ သွက်ညးဍုုၚ်ကွာန် ဒးဂြိပ်ဒဴပါဲဓလေတ်ဒၟံၚ် ၁၀,၀၀၀ ပြၚ်တအ် နွံဒၟံၚ်ပၟိက်ကဵု စၞစဇွောံမနဒဒှ်ကာတၟေၚ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဒပ်ကံၚ်ဇြဳပၞာန်ဂှ် သ္ပတံနူ ဂိတုဂျောန် စၟတ်တ္ၚဲ (၉) တုဲကၠုၚ်တေံ နကဵုဇြဟတ်ဒပ် ၁၀၀ ပြၚ် ပန်ဖျေံလွဟ် ဇၞော် ပ္ဍဲကွာန် မၞုံပွိုၚ်ဍုၚ်တယျေတ်ချောၚ် အဆက်ဟွံပိုတ်သ္ကုတ် ဂေတ်လၟေၚ်ကွာန်တုဲ ထ္ပက်လုပ် ကၠုၚ်ဒၟံၚ်ကရောၚ်ပၞာန်ရ။

ဟိုတ်နူထ္ပက်ဒၟံၚ်ကရောၚ်ပၞာန်တုဲ ညးဒေသ နူကွာန် (၁၀)ကွာန် ပါလုပ်သီုကွာန် မပ္တံကဵုကျွဲမေန်ကုမ်၊ ကနေတ်သဳရိ၊ ယျၚေဝ်၊ ဝေန်ဝ၊ တုၚ်ကုမ်၊ ကမျာၚ်၊ ဝါရက်၊ လၟိဟ် ၁၀,၀၀၀ ပြၚ်တအ် ထောံသ္ၚိဌာန်တုဲ ဒးဂြိပ်ဒဴပါဲဓလေတ်ဒၟံၚ် ပ္ဍဲဒၞာဲဗၠးဘဲလမျီု ဂွံကၠုၚ် ပွိုၚ်မွဲဂိတုပြၚ်ရ။

ညးဒေသတယျေတ်ချောၚ် ၁၀,၀၀၀ ပြၚ် နွံဒၟံၚ်ပၟိက် အရီုဗၚ်စၞစဇွောံမ နဒဒှ်ကာတၟေၚ်
ညးဒေသတယျေတ်ချောၚ် ၁၀,၀၀၀ ပြၚ် နွံဒၟံၚ်ပၟိက် အရီုဗၚ်စၞစဇွောံမ နဒဒှ်ကာတၟေၚ်

အခိၚ်လၟုဟ်ဏံ ညးဍုၚ်ကွာန်တအ်ဂှ် စၞစဇွောံမ ယိုက်ကေတ်နၚ်လဝ်ဂှ် ကြပ်ပိုတ်သ္ကုတ် အိုတ်ကၠုၚ် ဒၟံၚ်ကီု ဒပ်ကံၚ်ဇြဳပၞာန်လေဝ် ဟိုတ်နူဆက်ဖျေံလဝ်ဗဒိုပ် ပ္ဍဲကွာန်တအ်ဂှ်ရ သွက်ဂွံကလေၚ်စဴဌာန်ဒၟံၚ် ဒးဆဵုဂဗဒၟံၚ်ကဵု တၚ်အခက်ခုဲရဂှ် ညးဒေသပါဲဘဲပၞာန်မွဲတၠ ဟီုသ္ဂးလဝ်ရ။

ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ် ပ္ဍဲဂိတုဂျောန် စၟတ်တ္ၚဲ (၁၁) တုဲကၠုၚ်တေံလေဝ် ပန်ဂစိုတ် လဝ် ကိုဝ်ဝေယာန်ဟုၚ် ကောန်ကွာန်ယျၚေဝ် အာယုက် (၂၃) သၞာံ ဃောကလေၚ်စဴ ကၠုၚ်ကေတ်ဂဥုဲ သွက်မိဇကုရ။

ကွာန်မၞုံပွိုၚ်ဍုၚ်တယျေတ်ချောၚ်တအ်ဂှ် ကံၚ်ဇြဳပၞာန် ဂေတ်လၟေၚ်ကွာန်တုဲ ထ္ပက်ကရောၚ်ပၞာန်ကီု စံၚ်ပလီုဒၟံၚ်ကီု ဟိုတ်နူကၠောန်ဒၟံၚ်ဂှ်ရ သ္ၚိဒၟံၚ်ညးဒေသတအ် ဟွံအောန်နူ (၁၀)မ ဒးတူပၟတ် လီုလာ်အာလဝ်ရ။

ပ္ဍဲဂိတုဂျောန် တုဲကၠုၚ်တေံလေဝ် ဗဒိုပ်ကၚ်ကံၚ်ဇြဳပၞာန်ကဵု ပၞာန်ညးဍုၚ်ကွာန်ပံၚ်တောဲ မၞုံသ္ၚောဲနူဍုၚ် တယျေတ်ချောၚ် ၂ မိုၚ်ဂှ် လုပ်စိုပ်ဍိုက်ဗတိုက် စံၚ်ပလီုမာန်လဝ်ရဂှ် ဂကောံချဳဒရာၚ်ပၞာန်ဒေါၚ် ဖျေံသ္ဇိုၚ်ဒေသဂှ် လလောၚ်တြးလဝ်ရ။

ပရိုၚ်သြၚ်လောန်တိုၚ်(မ်)

ဗီုရုပ်-Dawei PDF

Leave a Reply

Your email address will not be published. Required fields are marked *