ညးယိုက်ဝန် နူကဵုဌာနမဆေၚ်စပ် မၞုံပွိုၚ်ဍုၚ်ရေဝ်တံ ဟွံဂွံအခေါၚ်မွဲသာ် ညံၚ်ဂွိုအ်အာတရဴဂှ် ကံၚ်ဇြဳပၞာန် ပိုၚ်ခြာသၞောတ်ဗ္ၜတ်

ရေဝ်၊ ဂျောန် (၁၇)

နကဵုညးယိုက်ဝန် နူကဵုဌာနမဆေၚ်စပ် မၞုံအပ္ဍဲပွိုၚ်ဍုၚ်ရေဝ် တွဵုရးဍုၚ်မန် မလလောၚ်တြးလဝ် ပရေၚ်အုပ်ဓုပ်ပၞာန်တံဂှ် ယဝ်ရအာကၠုၚ်ၜက်တရဴမ္ဂး ဂွံအခေါၚ်နူကဵုဒပ်ပၞာန်မှဟေၚ် သွက်ဂွံအာကၠုၚ် အိုတ်ဂှ် စၞောန်ကၠုၚ်ရောၚ် သာ်ဝွံ ညးယိုက်ဝန် နူကဵုဌာနမဆေၚ်စပ်ကံၚ်ဇြဳပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

နကဵုညးယိုက်ဝန်ဂမၠိုၚ် ယဝ်ရအာတရဴၜက်ဒေသမ္ဂး သွက်ဂွံကဵုပရိုၚ် ဇရေၚ်ဌာန်ဂအုပ် စကစ (၁၉) ဌာန်ဂအုပ်ကောပ်ကာဲပရေၚ်ပၞာန် ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်ရေဝ်ဂှ်ကီု၊ ဂွံအခေါၚ်တုဲမှ သွက်ဂွံအာ တရဴအိုတ်ဂှ် ပ္ဍဲဂိတုဂျောန် (၁၃) တေံ စၞောန်ပ္ညုၚ်ကၠုၚ် ကုဌာနမဆေၚ်စပ်တံသီုဖအိုတ်ရ။

ဟိုတ်နူအကာဲအရာ ဒးဂွိၚ် ပရေၚ်ဂီုကၠီုတိဍာ်တံဂှ်တုဲ လ္တူညးယိုက်ဝန်တံ အာတရဴဂှ် တုဲကၠုၚ်ပ္ဍဲဂိတု ဂျောန် (၉) တေံ ကြဴနူကောံဓရီု သၞာဲဒဴဒပ်ပၞာန် ကေုာံ ဇၞော်သ္ကိုပ် နူကဵုဌာနမဆေၚ်စပ်ကံၚ်ဇြဳပၞာန် သၟဝ်ဌာန်ဂအုပ်ကောပ်ကာဲပရေၚ်ပၞာန် စၟတ် (၁၉) တံတုဲဂှ် စၞောန်ပ္ညုၚ်ကၠုၚ်ရ။

ညးယိုက်ဝန်မွဲတၠ နူကဵုဌာနမဆေၚ်စပ်သၟဝ်တဲကံၚ်ဇြဳပၞာန် ပွိုၚ်ဍုၚ်ရေဝ်ဂှ် အပ္ဍဲမွဲၜါတ္ၚဲကၠုၚ်စိုပ်ဏံ ဟိုတ်နူပရိုၚ် ဂကောံဇြဟတ်ပၠန်ဂတးတံ လုပ်စိုပ်ဗ္တိုက် ရုၚ်ဌာနမဆေၚ်စပ်တံကဵု တမ်ဒပ်တံဏောၚ် ဂှ်တုဲ စၞောန်ပ္ညုၚ်ကၠုၚ် သာ်ဏံရောၚ်ဂှ် ဟီုရ။

ဟိုတ်နူပရိုၚ် ဂကောံဇြဟတ်ပၠန်ဂတးတံ လုပ်စိုပ်ဗ္တိုက်ဏောၚ်ဂှ်တုဲ ဇၞော်သ္ကိုပ်နူကဵုဌာန မဆေၚ်စပ် ကံၚ်ဇြဳပၞာန်တံ မံၚ်ဆုဲပြံၚ် အပ္ဍဲတမ်ဒပ်တံဂှ် နွံတုဲ ညးယိုက်ဝန်လ္ၚဵုတံ အရာမဒှ်ဓဝိၚ် ကုပရေၚ်ဂီုကၠီုတံဂှ် သၠုၚ်တိုန်ဒၟံၚ်ရောၚ် သ္ဂးရ။

ဌာန်ဂအုပ် တမ်ဒပ်လၟိဟ် (၂၇) ဒပ်ပၞာန်ဗၠးၜးကောန်ဂကူကရေၚ် KNLA ဂှ် ဂကောံဒပ်ညးတံဝွံ စထိၚ်ဒက်ချဳဒရာၚ်ဒၟံၚ် မွဲဒမြိပ်ဂၠံၚ်ဇၞော် စၟတ် (၈) ၊ ဗိက်၊ ထဝါဲ၊ ရေဝ်၊ ဇြပ်ဗု၊ မုဟ်ဍုၚ်၊ မတ်မလီု တံဂှ်ယျဂှ် ပ္ဍဲဂိတုဂျောန် (၁၀) တေံ လလောၚ်ပ္တိတ်လဝ်ရ။

ဂကောံဒပ်စဵုဒၞါညးဍုၚ်ကွာန်ပွိုၚ်ဍုၚ်ရေဝ်ဂှ်လေဝ် အပ္ဍဲကာလခြာဟွံလအ်ဏံ သၠုၚ်ပ္တိုန်အာအသိၚ် ပရေၚ်ပၞာန်ဏောၚ်တုဲ နကဵုညးဍုၚ်ကွာန်ဂမၠိုၚ် ပၟိက်ဟွံမွဲမွဲသာ် ညံၚ်ဂွိုအ်အာတရဴဂှ်ကီု၊ အခိၚ်ဂကောံ ဒပ်စဵုဒၞါတံ စၟဳစၟတ်ဂှ် ညံၚ်ဂွံဒုၚ်စၟဳစၟတ်ကဵု ဂကောံဒပ်စဵုဒၞါတံ ခိုဟ်ဟ်ဂှ်ကီု ပ္ဍဲဂိတုဂျောန် (၁၅) တေံ လလောၚ်ပ္တိတ်လဝ် လိက်ကဵုသတိရ။

ပွိုၚ်ဍုၚ်ရေဝ် တွဵုရးဍုၚ်မန်ဂှ်ဝွံ အပ္ဍဲကာလဒပ်ပၞာန်သီအဝဵုဏံ တမ်ဒပ်ကံၚ်ဇြဳပၞာန်၊ ဗ္ဒိုပ်ဒပ် ကေုာံ ရုၚ်ဌာနမဆေၚ်စပ်တံ ဒးဒုၚ်ဗ္တိုက်ဒၟံၚ် မွဲဏှမွဲဏှတုဲ သီုကဵုဒှ်ပွိုၚ်ဍုၚ် ဂကောံဇြဟတ်ပၠန်ဂတးတံ ထိၚ်ဒက်ကၠုၚ် တိဍာ်လ္ၚဵုတံမာန်မွဲရ။

ပရိုၚ်−သြၚ်လောန်တိုၚ်(မ်)

ဗီုဓာတ်−MOI

Leave a Reply

Your email address will not be published. Required fields are marked *