ပဠဝ်၊ ဂျောန် (၁၇)
ရးဒေသဇၞော်တၞၚ်သဳ ပွိုၚ်ဍုၚ်ပဠဝ် ဍုၚ်ပလ သ္ကုတ်ဂၠံၚ်ဗိက်−ပဠဝ်ဂှ် နူကဵုဒပ်ကံၚ်ဇြဳပၞာန် ဟိုတ်နူပန်ပှော်ဒၟံၚ်လွဟ်ဇၞော်တံဂှ်တုဲ သီုကဵုကၟာတ်လဝ်သၞေဟ်ကၚ်စၟဳတ်တံဂှ်ရ ကွဳစက်အာတရဴ ဂၠိုၚ်ကဵုကၠံ ကၟာတ်ဒးဒၟံၚ်ရောၚ် ဂွံတီကေတ် ဇရေၚ်ညးဒေသတံကဵု ဂကောံဇြဟတ်ပၠန်ဂတးတံရ။
ဂိတုဂျောန် (၁၆) စနူအခိၚ်နူဂယးတုဲဂှ် နူကဵုဒပ်ကံၚ်ဇြဳပၞာန် မၞုံဗ္ဒိုပ်ဗၠာဲသၟိၚ် ပဠကဵု တမ်ဒပ်ခလရ (၂၈၅) ကံၚ်ဇြဳပၞာန် ဖျေံသ္ဇိုၚ်ပဠဝ်တံဂှ် ပေါဲဗ္တိုက်ဟွံမွဲမွဲသာ် ပန်ပှော်ဒၟံၚ်လွဟ်ဇၞော် လ္ပာ်ကွာန်ပဝတ်ကုန် ကေုာံ ကွာန်ကဒါတံ ဟွံပိုတ်သ္ကုတ်ရ။
အပ္ဍဲလၟေၚ်ဒဒှ်ဏံ နူကဵုသၞေဟ်ကၚ်စၟဳစၟတ်ဍုၚ်ပဠ ကံၚ်ဇြဳပၞာန်တံဂှ်လေဝ် ကွဳစက်အာတရဴတံကဵု ကွဳစက်ဖ္ဍိုက်ဗၞိက်တံဂှ် ဟွံကဵုအခေါၚ်အာ ကၟာတ်လဒဵုလဝ်ရ။

ပေါဲဗ္တိုက်ဟွံမွဲမွဲသာ် ပန်ပှော်လွဟ်ဇၞော်တုဲ ကၟာတ်လဒဵုလဝ် ဂၠံၚ်ကွဳစက်တံဂှ်ဝွံ သွက်ရေၚ်ကွဳစက်ဍေံတံ ဂွံကြေပ်အာ ကရောံကွဳစက်အာတရဴတံ ဒှ်မာန်ရောၚ်ဂှ် ညးဒုၚ်တာလျိုၚ် လလောၚ်ပရိုၚ် တမ်ဒပ်ခရိုၚ်ဗိက်လၟိဟ် (၁ ) ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တံဂှ်တုဲ ဒဵုကဵုအခိၚ်ဇိုၚ်သဝ်တ္ၚဲ ၄ နာဍဳဂှ် ဟွံကဵုကွဳစက်အာတရဴတံအာတုဲ ဆက်ကၟာတ်လဒဵုလဝ်ရောၚ် ညးဒဳယာန်အာတရဴမွဲတၠ ဟီုဂးလဝ်ရ။
ဟိုတ်နူလၟေၚ်ဒဒှ်ဏံတုဲ သၞေဟ်ကၚ်စၟဳစၟတ်ပလဂှ် သီုကွဳစက် နူကဵုဗိက် တိုန်လ္ဂုၚ်တံဂှ်ကီု၊ သီုကဵုကွဳစက်နူလ္ဂုၚ် စှ်ေဗိက်တံဂှ်ကီု ဟွံကဵုအာမွဲသာ် ကၟာတ်လဒဵုလဝ်ရ။

ပ္ဍဲပွိုၚ်ဍုၚ်ပဠဝ် သ္ကုတ်ဂၠံၚ်ကွဳစက် ဗိက်−လ္ဂုၚ်ဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် မွဲဏှမွဲဏှဟီုဂွံ ပေါဲဗ္တိုက်တံ က္တဵုဒှ်ဒၟံၚ်တုဲ ဇီုကပိုက်ပြဟ်လလုဲတံဂှ် က္တဵုဒှ်ဒၟံၚ် သီုကဵုညးဒဳယာန် သီုညးအာတရဴတံရ။
ပွိုၚ်ဍုၚ်ပဠဝ် မလလောၚ်တြးလဝ် ပရေၚ်အုပ်ဓုပ်ပၞာန်ဂှ်ဝွံ အပ္ဍဲကာလဒပ်ပၞာန်သီအဝဵု ပွိုၚ် ၂ သၞာံပြၚ်ဏံ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ပေါဲဗ္တိုက် ၁၀၀ ဝါဟွံက က္တဵုဒှ်လဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−သၞာံတုဲတေံ အဃောကွဳစက်အာတရဴတံ ကၟာတ်ဒးမံၚ် အပ္ဍဲပေါဲဗ္တိုက် ပွိုၚ်ဍုၚ်ပဠဝ် (ဗီုတြေံ)

