အန္တရာယ်လမျီု ကောန်ထံၚ်ပရေၚ်ဍုၚ်ကွာန် နူကဵုထံၚ်စာတ်တွဵုရးဍုၚ်မန်တံ ဒးဂွိၚ်ကၠုၚ်

မတ်မလီု၊ ဂျောန် (၁၇)

ကြဴနူဒပ်ပၞာန် ကၠုၚ်စိုပ်ကော်ဏာ ကောန်ထံၚ်ပရေၚ်ဍုၚ်ကွာန် မဒးဒုၚ်ရပ်လဝ် ပ္ဍဲထံၚ်စာတ် တွဵုရးဍုၚ်မန်တံတုဲဂှ် ဒှ်ကၠုၚ်စဵုကဵုအကာဲအရာ ဟွံဂွံအဆက်လးလးရဂှ် ညးမစုက်လုက်ကဵု ကောန်ထံၚ်ပရေၚ်ဍုၚ်ကွာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကောန်ထံၚ်ပရေၚ်ဍုၚ်ကွာန် မဒးဒုၚ်ရပ်ဒက်တံဂှ် ကံၚ်ဇြဳပၞာန် ရပ်ထိၚ်ဒက်လဝ် ပ္ဍဲထံၚ်စာတ်သဓီု ကဵု ထံၚ်ဗဟဵုကျာ်မြဟ် တွဵုရးဍုၚ်မန်တံရ။

ပ္ဍဲကဵုဏံ ကောန်ထံၚ်ပရေၚ်ဍုၚ်ကွာန် မဒးဒုၚ်ပံက်လဝ်အမှု နကဵုၝောံပိုဒ် သၞောဝ်ဗ္တိုက်သ္အး ပကီုပရာပ် တံဂှ်ကဵု ကောန်ဒပ်စဵုဒၞါညးဍုၚ်ကွာန် မဒးရပ်ဒက်လဝ်တံဂှ် ပ္ဍဲအခိၚ်ကာလလက္ကရဴဏံ ဒပ်ကံၚ်ဇြဳပၞာန် တံကဵု သၟိၚ်တၠထံၚ်တံ မ္ၚးနူၜုၚ်တက်ပျဲပျာံဂှ် ရပ်စပ်နဲကဲနာနာသာ်တုဲ ကၠောန်သ္ပကၠုၚ် ပရေၚ်ပကီုပရာပ်တံရ။

ပရေံအိုတ်ဂှ်တှ်ေ ကောန်ထံၚ်ပရေၚ်ဍုၚ်ကွာန် မဒးဒုၚ်ဖျေံစၟတ်လဝ်ဒဏ်ထံၚ်သၞာံဂၠိၚ် နကဵုၝောံပိုဒ် ပကီုပရာပ်တံဂှ် ကြဴနူဒပ်ပၞာန် ကၠုၚ်စိုပ်ကော်ဏာ အခိၚ်ဗ္တံ နကဵုဇြဟတ်ဗွဲမဂၠိုၚ်ဂၠေၚ်တုဲဂှ် လ္ပာ်ဂြောဝ် ဂတာညးတံ ၜိုန်ရဗက်ဂၠိုက်ဂၠါဲစၟဳစၟတ်ကီုလေဝ် အဆက်ပိုတ်အာ နွံကၠုၚ်ဂှ် ညးမစုက်လုက်ကဵု ဂြောဝ်ဂတာကောန်ထံၚ်ပရေၚ်ဍုၚ်ကွာန်မွဲတၠ ဟီုရ။

“ပ္ဍဲသဓီုဂှ် နူကဵုထံၚ်ဖာအၚ်ဂှ် ပလံၚ်လဝ် ကောန်ထံၚ်ပရေၚ်ဍုၚ်ကွာန်တံ ပ္ဍဲကဵုထံၚ်သဓီုရ။ ပလံၚ်လဝ် ထံၚ်မတ်မလီု ကျာ်မြဟ်ရ။ အေ ဇှ် အခိၚ်စွံလဝ်ပ္ဍဲကဵုသဓီုတေံရဂှ် နကဵုၝောံပိုဒ်ဇၞော်ဇၞော်တံရဏောၚ်။ ၝောံပိုဒ် ၄၉၊ ၅၂ တံဏံဂှ် ကော်ပ္တိတ်ဏာနွံရ။ မုဍေံပရောဟီုဂှ် ဟွံတီပုဟ်။ လၟုဟ်ဂှ် အခိၚ်ဗ္တံ ၜိုတ် ၁၂ နာဍဳဂှ် ကော်ပ္တိတ်ဏာရ။ ကော်ပ္တိတ်ဏာဂှ်ရတီ၊ ကော်ပ္တိတ်ဏာအလဵုရောဟီုဂှ် ဟွံတီပုဟ်။ တုဲပၠန် ကဵုဂြောဝ်ဂတာဂှ်လေဝ် ဟွံဂွံအဆက်ပုဟ်။ အတိုၚ်ဂြောဝ်ဂတာ အာစိုပ်ပလံၚ်လဝ်စၞစ ပ္ဍဲကဵုထံၚ်တံ သၟာန်လဝ်ဂှ်မ္ဂး ဍေံတံဂှ် နူကဵုညးမဆေၚ်စပ်တံ ကော်ပ္တိတ်ဏာလဝ်ရဏောၚ် သှ်ကဵုရ။ ကော်ပ္တိတ်ဏာအလဵု၊ မုဍေံပတုဲ အလဵုဍေံစွံလဝ်ရောဟီုဂှ် ဟွံသှ်ပုဟ်” သာ်ဝွံ သ္ဂးရ။

တုဲကၠုၚ် ပ္ဍဲဂိတုဂျောန် ၁၃ တေံဂှ်လေဝ် ပ္ဍဲကဵုဗ္ဒမ် KTV ကၠဟ်ထောံလဝ် ပ္ဍဲဆေၚ်ကၠေၚ် PTT တြေံ ဗ္ဒါဲကွာန်ကၟာဇြိုၚ် ပွိုၚ်ဍုၚ်သဓီု တွဵုရးဍုၚ်မန်ဂှ် ဂွံဆဵုကေတ်လဝ် ဇွမၞိဟ်တြုံ ၂ တၠ မချိုတ်ပုဒၟံၚ်ဂှ် ဂွံတီကေတ် ဇရေၚ်ညးဒေသတံရ။

အတိုၚ်ဂလာန်ညးဒေသတံဂှ်မ္ဂး မၞိဟ်တြုံၜါတၠ မချိုတ်ဒၟံၚ်ဂှ်ဝွံ လ္တက်လဝ်ကယျိုၚ် ဗီုပြၚ်ဂၠိက်ပဠောံ ကောန်ထံၚ်တံ မလ္တက်ဂှ်တုဲ ဟိုတ်နူရုပ်ရဴလီုဒၟံၚ်ဂှ်ရ ညးဂှ်ရောဟီုဂှ် သ္ပဒတန်ဟွံမာန်ရောၚ် သ္ဂးရ။

မွဲလ္ပာ်ပၠန်ဂှ် ကောန်ထံၚ်ပရေၚ်ဍုၚ်ကွာန်တံဂှ် သ္ပအပြံၚ်အလှာဲထံၚ်ဟွံသေၚ်တုဲ ဟိုတ်ဟွံမွဲမွဲသာ် ကော်ဏာတုဲ ကော်ဏာလဝ်အလဵုဟွံတီဂှ်ရ ဂြောဝ်ဂတာညးတံ ဂွိၚ်ဒၟံၚ် ကုအန္တရာယ်လမျီု ကောန်ထံၚ်ပရေၚ်ဍုၚ်ကွာန်တံရ။

ကောန်ထံၚ်ပရေၚ်ဍုၚ်ကွာန်တြေံမွဲတၠဂှ် လ္ဂောံကဵုသၞောဝ်ထံၚ်စာတ်တံဂှ်မ္ဂး ယဝ်ရပြံၚ်ထံၚ်မ္ဂး နကဵုကောန်ထံၚ်ဂမၠိုၚ် ချူလိက်ကဵုသမ္တီ အာတ်စရိတ်အရပ်စပ် ကေုာံ စၞစ ဇရေၚ်ဂြောဝ်ဂတာတံ ဂွံကီုလေဝ် ပ္ဍဲကဵုပရူပရာ ဗွဲကြဴဏံဂှ် ကောန်ဇာတ်တံလေဝ် ဟွံဂွံတီကေတ်တံဂှ်ရ ဒှ်ကၠုၚ်သ္ဇက်ဒး ဂွိၚ်ကၠုၚ် ကုပရေၚ်ဂီုကၠီုရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ပြံၚ်ထံၚ်ဂှ် သၞောတ်ဗီုပြၚ်ပြံၚ်ထံၚ်ဂှ် နွံမံၚ်မွဲဗီုဏီ။ ယဝ်ရပြံၚ်ထံၚ်မ္ဂး ဥပမာ ကော်ပ္တိတ်ဏာပိုယ် တံတုဲတှ်ေ တက်ကအ်ဇိုၚ်။ တုဲမ္ဂး မၞိဟ်ၜါမွဲတောဲ ဒက်ကအ်တဲ။ တုဲပၠန် သွက်ဂွံစပ္ဍဲဂၠံၚ်တုဲ ကဵုကေတ် စၞစညိည။ လၟုဟ်ဂှ် မုမှလေဝ် ကေတ်ဏာဟွံဂွံပုဟ်။ တက်ကအ်ဇိုၚ်တံဂှ်လေဝ် ဟွံမွဲပုဟ်။ လှဲပြံၚ်တၞး လိက်တံဂှ်လေဝ် ဟွံမွဲပုဟ်။ နကဵုဗီုပြၚ် နူကဵုဒပ်ပၞာန်မဆေၚ်စပ်ဍေံတံ ကၠုၚ်ကော်ဏာဂှ်ရနွံ။ ဌာနက္ဍိုက်ပ်ထံၚ်စာတ်တံ ကၠုၚ်ကော်ဏာလဝ် ဟွံမွဲပုဟ်။ လှာဲထံၚ်မ္ဂး ဥပမာ နူကဵုအဏံဂှ် ပလံၚ်လဝ်ထံၚ်လဵု။ မၞးတံ ကေတ်အဆက်ဒၞါဲဂှ်တုဲ ပလံၚ်ညိ သာ်ဏံ ဟီုထ္ၜးကဵုနွံရ။ လၟုဟ်ဂှ် အလဵုညးယိုက်ဝန်ထံၚ်တံလေဝ် ဟွံတီပုဟ်” သာ်ဝွံ သ္ဂးရ။

သ္အာၚ်နူဂှ်ပၠန် ပ္ဍဲကဵုထံၚ်စာတ်တံဂှ် စပ်ကဵုအခေါၚ်အရာမၞိဟ်တုဲ ကောန်ထံၚ်ပရေၚ်ဍုၚ်ကွာန် မအာတ်မိက်တံဂှ် ဂကောံဒပ်ကံၚ်ဇြဳပၞာန်တံ မွဲဏှမွဲဏှ ကၠုၚ်စိုပ်ကော်ဒၟံၚ်နွံတုဲ မၞိဟ်ဒးဒုၚ်ကော်တံဂှ်ဝွံ ကလေၚ်စိုပ်ကၠုၚ်ဟွံမွဲပုဟ်ဂှ် ညးဆက်ဟီုရ။

ပ္ဍဲကဵုထံၚ်စာတ်တံဂှ် ကောန်ထံၚ်ပရေၚ်ဍုၚ်ကွာန်တံဂှ် ဒးဒုၚ်ဍဵုဍိုက်ဒၟံၚ် နူကဵုကောန်ထံၚ် မဒးဒၟံၚ်ထံၚ် နကဵုဒုဟ်ဒဏ်တၞဟ်ဟ်တံဂှ်တုဲ ယဝ်ရအာတ်မိက်ကၠုၚ် အခေါၚ်အရာထေက်ကဵုဂွံတံဂှ်မ္ဂး ကၠောန်သ္ပကၟာတ်တိုက်တံနွံဂှ် ဂွံတီကေတ်ရ။

သ္အာၚ်နူဂှ်ပၠန် ကောန်ထံၚ်ပရေၚ်ဍုၚ်ကွာန်တံဂှ် စနူကဵုပရေၚ်မၚ်မွဲရံၚ်စံၚ် ပရေၚ်ထတ်ယုက်ကောန်ထံၚ် ပရေၚ်ဍုၚ်ကွာန်တံဂှ် ဟွံကဵုပေၚ်ၚ်တုဲ ဝးပ္ကဝ်ဒၟံၚ်အခေါၚ်အရာမၞိဟ် နကဵုနဲကဲနာနာ၊ ကဵုဒၟံၚ်ပလာပ် ပထုဲ စိုတ်တံဂှ်လေဝ် မွဲဏှမွဲဏှဟီုဂွံ ကၠောန်သ္ပကၠုၚ်ဂှ် ညးမစုက်လုက်ကဵု ကောန်ထံၚ် ပရေၚ်ဍုၚ်ကွာန်တံ ဟီုရ။

ပ္ဍဲကဵုထံၚ်စာတ်တွဵုရးဍုၚ်မန်တံဂှ် ကောန်ထံၚ်ပရေၚ်ဍုၚ်ကွာန် နူကဵုရးဒေသ ကေုာံ တွဵုရးနာနာ ပါလုပ်သီုကဵုရးဗဂေါ၊ တွဵုရးကရေၚ်၊ တွဵုရးဍုၚ်မန်တံဂှ် နွံဒၟံၚ် ဗ္ဒါဲ ၅၀၀ ရ။

ပရိုၚ်−သြၚ်လောန်တိုၚ်(မ်)

ဗီု−RFA

Leave a Reply

Your email address will not be published. Required fields are marked *