ကၠေၚ်ဍေံ ခၞာဍေံ ညံၚ်ယူကရုၚ် ဂွံဗ္တိုက်ပ္တိတ် ရုယှာမာန်ဂှ် အမာတ်ကၠတ်ထဝ်အမေရိကာန်တံ စၟဳစဒၟံၚ်

ဝါယှေန်တာန်၊ ဂျောန် (၁၇)

ကောန်ဗော်ရဳပါပလေတ်ကာန် ကေုာံ ဗော်ဒဳမဝ်ကရေတ်တေတ် နူကဵုကၠတ်ထဝ်ကောန်ဂရိတ် အမေရိကာန်တံဂှ်ဝွံ သုၚ်စောဲပိုန်ဒြပ်အရပ်ရာရုယှာ မသီဂိုၚ်ဂွံလဝ်တံဂှ်တုဲ နကဵုဍုၚ်ယူကရုၚ် ပ္ဍဲဂိတုဂျောန် (၁၅) တေံ ဆက်မိတ်လဝ် သၞောဝ်မွဲ ပ္ဍဲအရာထံက်ပၚ်သြန်လှုဲ သွက်ဂွံဗ္တိုက်ပ္တိတ် ညးလုပ်ၜက်ၜေတ်တံ မသ္ကဵုလောဲသွာဂှ်ရ။

စနူရုယှာလုပ်စိုပ်ၜက်ၜေတ် ပ္ဍဲသၞာံ ၂၀၂၂ ဂိတုဖေဖဝ်ဝါရဳတေံတုဲဂှ် အရီုဗၚ်ပရေၚ်ပိုန်ဒြပ် ကေုာံ ပရေၚ်ဗ္စာရဏာမၞိဟ်၊ ပရေၚ်ပၞာန် သွက်ယူကရုၚ်ဂှ် ကၠတ်ထဝ်အမေရိကာန် သ္ပဒတန်လဝ် ဒဝ်ဠာအမေရိကာန် (၁၀၀) ဗဳလျာန်ပြၚ်ရ။

က္ဍိုပ်သ္ကိုပ် သီုၜါဗော်တံဂှ် ပရေၚ်ထံက်ဂလာန်အမေရိကာန် လ္တူအလဵုအသဳကိယျေပ်တံဂှ် ဇြဟတ် ခိုဟ်ဒၟံၚ်ဖိုဟ်ရောၚ် ၜိုန်ရဟီုဂးဒၟံၚ်ကီုလေဝ် အမာတ်ကၠတ်ထဝ်ကောန်ဂရိတ်လ္ၚဵုတံဂှ် သွက်ဂွံသၞောတ် ဗ္ၜတ် စရိတ်ရပ်အလဵုအသဳ အကြာအာတ်မိက်ဒၟံၚ်ဂှ် အရာမကဵုဒၟံၚ်ဒါန်တံဂှ်ဝွံ ဗၞတ်ၜိုတ်လဵုလအ်ရောဟီုဂှ် ပ္တိတ်လဝ်သၟာန်ညးသ္ကအ်အိုတ်ရ။

ညးမထံက်ဂလာန် ကုသၞောဝ်အပြောံတံဂှ် တၚ်ရန်တၟံညးတံဂှ် နူကဵုရဲကဵုအခေါန် အမေရိကာန်တံဟွံ သေၚ် ဟိုတ်နူပရေၚ်သၠိုၚ်လုပ်ၜက်ၜေတ်တုဲ သွက်ဂွံကဵုဂှ် ဒှ်တာလျိုၚ်မဝ်သကိုဝ်ရောၚ် ဟီုဂးလဝ်ရ။

“ပေါဲပၞာန်ယူကရုၚ်ကဵု ရုယှာတံဂှ် လအ်အာမွဲသၞာံပြၚ်တုဲ ပိုန်ဒြပ်အရပ်ရာအဝဵုအပိုၚ်အခြာရုယှာ (၃၀၀) ဗဳလျာန်ပြၚ်ဂှ်လေဝ် ထိၚ်ဒက်လဝ် အလုံမွဲဂၠးတိရောၚ်” ဂှ် အမာတ်ရဳပါပလေတ်ကာန်ကဆံၚ်လ္တူ ဂျေန်မ်ရေတ်ချ် နူကဵုကမ္မတဳပရေၚ်ဆက်ဆောံဍုၚ်သ္အာၚ် ကၠတ်ထဝ်လ္တူ ဟီုလဝ်ရ။

နကဵုပွဓဇန်ကြမ်ကြရုယှာဂှ် အမှုရာဇာဝတ် လ္တူညးဍုၚ်ကွာန်ယူကရုၚ်တံ ဟိုတ်နူဆက်က္တဵုဒှ်ဒၟံၚ်ဂှ်ရ သွက်ဂွံရီုဗၚ် ပ္ဍဲအရာကလေၚ်ဒက်ပ္တန် ဍုၚ်ယူကရုၚ်ဂှ် အမေရိကာန် သီကေတ်ထောံ သြန်ဗွဝ် အလဵုအသဳရုယှာဂှ်ဝွံ ဍာံပြဒၟံၚ်ရရောၚ် ညးဆက်ဟီုဂးလဝ်ရ။

သ္အာၚ်နူဂှ်ပၠန် သွက်ကောန်ဍုၚ်ယူကရုၚ် မဆက်လဝ်မိတ် ပ္ဍဲကၠတ်ထဝ်လ္တူကဵု ကၠတ်ထဝ်သၟဝ်တံဂှ် သၞောဝ်အက်ဥပဒေ မကော်ဂး REPO ဂှ်ဝွံ သွက်ဂွံသီကေတ် ပိုန်ဒြပ်ရုယှာ မထိၚ်ဒဝ်စွံလဝ် ပ္ဍဲကၟိန်ဍုၚ် အမေရိကာန်ဂှ်ကဵု သွက်ဂွံရီုဗၚ် ယူကရုၚ်တံဂှ် ကဵုအာအခေါၚ်ကၠောန် ပရေၚ်လှဲပြံၚ်တံရောၚ်ဂှ် သ္ဂးရ။

နကဵုရုယှာ စဵုကဵုတုပ်ကၠုၚ်စိုတ် သွက်ဂွံကဵုသြန်လေဲ သွက်ပရေၚ်ဇီုကပိုက်ဒးဂိ မက္တဵုဒှ်ကၠုၚ် ဟိုတ်နူပေါဲပၞာန်တံဂှ် ပွမပ္တိတ်ကဵုသြန်ဗွဝ် ကုဂကောံရုယှာ မတပ်လဝ်ဒဏ်ကၟာတ်လဒဵုလဝ်တံဂှ်လေဝ် တာဒၞါအာရောၚ် သာ်ဝွံ သ္ဂးရ။

Ref: Reuters

Leave a Reply

Your email address will not be published. Required fields are marked *