ဘေဂျေန်၊ ဂျောန်(၁၈)
ကုမ္ပဏဳကၠောန်ပ္တိတ် ချိပ်ဂတှ်ေ အမေရိကာန်ပိုၚ် မိုက်ခရောန်ဂှ် ပ္ဍဲရုၚ်စက်ကၠောန်ပ္တိတ် ကေုာံပရေၚ်စမ်ၜတ် မၞုံသ္ကုတ်သၟဝ်ကျာ ဍုၚ်ကြုက်ဂှ် သွက်ဂွံဓလိုက်အာတမ်ရိုဟ် ဒဝ်ဠာအမေရိကာန် ၆၀၀ မဳလဳယာန်ပြၚ် နွံဒၟံၚ်ရဂှ် ဟီုလဝ် ပ္ဍဲဂိတုဂျောန် စၟတ်တ္ၚဲ (၁၆)ဂှ်ရ။
ပ္ဍဲတၚ်လလောၚ်တြး WeChat မွဲတၚ်ဂှ်မ္ဂး ကုမ္ပဏဳဂှ် သွက်ဂွံရာန်ကေတ် ကပေါတ်ကြိယာဗာ ပ္ဍဲရုၚ်စက်ညးတအ် မၞုံဒၟံၚ် ပ္ဍဲဍုၚ်ယှဳအာန်ကီု သီုသွက်ရုၚ်စက်တၟိ ပ္ဍဲသၞာံဂတဏံ မွဲၜါသၞာံဂှ် ဓလိုက်အာတမ်ရိုဟ် ယွောန်ကြုက် ၄.၃ ဘဳလျာန်(ဒဝ်ဠာအမေရိကာန် ၆၀၅ ပြကောဋိကိုတ်) ပြၚ်ရောၚ်ဂှ် ဓမံက်ထ္ၜးလဝ်ရ။
ဂကောံမၚ်ရံၚ် ပရေၚ်ဂီုကၠီုဇြိုက်ဘာ ကၟိန်ဍုၚ်ကြုက်ဂှ် Micron ဏံ ဒဒှ်ရဟွံဒ္ဂေတ်ဗက် တၚ်အပိုၚ်ခြာ အခေါၚ်ရာန်ကေတ်အဝ်ပရေတာ ကပေါတ်ကၠောန်ပ္တိတ် နူ “စမြိုၚ်တၚ်ဂၞၚ်သ္ဇိုၚ်ပရိုၚ် ပၟိက်ဇၞော်” ကၟိန်ဍုၚ်ကြုက်ရဂှ် ဟီုသ္ဂးလဝ်ရ။

ပွမဓလိုက်တမ်ရိုဟ်ဗီုပြၚ်ဏံဂှ် သွက်ပေါဲဗတိုက် ဂတှ်ေချိပ် အကြာကၟိန်ဍုၚ်အမေရိကာန်ကဵု ကြုက်ဂှ် သၠုၚ်ဂၠိုၚ်တိုန်ကၠုၚ် အလန်လကြဴအိုတ် က္တဵုဒှ်လဝ်တုဲ ဝါယှေန်တာန်ဂှ် ဂစာန်ပ္တိတ်ကၠုၚ်လဝ်ဇြဟတ် သွက်ဂွံကၟာတ်ဒၞာ အခေါၚ်သုၚ်စောဲ ကပေါတ်စၠောံဓာတ်လလဳ ပေန်ကျေန်ဂတာပ်ခေတ်တအ်ဂှ်ရ။
“ပရောဂျေတ် ဓလိုက်တမ်ရိုဟ်ဏံဂှ် သွက်ပရေၚ်ပိုန်ဒြပ်ကြုက်ပိုဲကဵု သွက်ညးလုပ်ဂကောံကြုက်တအ်ဂှ် ကတိကဝတ် Micron ဟွံဒစေၚ်ဗၠေၚ်ဂှ် ဗမံက်ထ္ၜး ထေၚ်လဵုဒၟံၚ်ရ” ဂှ် CEO Sanjay Mehrotra ဟီုသ္ဂးလဝ် ပ္ဍဲတၚ်လလောၚ်တြးရ။

အတိုၚ်တၚ်လလောၚ်တြး အခိၚ်ကၠာတေံမ္ဂး ကုမ္ပဏဳမိုက်ခရောန်ဂှ် ရာန်ကေတ်ကပေါတ်ကြိယာဗာ ပရေၚ်ကၠောန်ပ္တိတ်ချိပ် Micron နူ Licheng Semiconductor ဖျေံသ္ဇိုၚ် Xi’an ရောၚ်ဂှ် ဟီုသ္ဂးလဝ်ရ။
Micron ဂှ် သိုၚ်ခၞံအာ ရုၚ်စက်တၟိကၠောန်ပ္တိတ် ချိပ်သ် သွက်မိုဝ်ဘိုၚ်၊ DRAM? NAND ကေုာံ SSD မွဲရုၚ်ရောၚ်ဂှ် ညးထပ်ဟီုလဝ်ရ။
Ref,CNA

