ပွဗ္တိုက်စွံပွန်လ္တူကောန်အရာပ်ကံၚ်ဇြဳပၞာန်တံ သာတုဲပရေံကၠုၚ်ဂှ် KHRG ဟီု

မတ်မလီု၊ ဂျောန်(၁၈)

ပ္ဍဲသ္ကုတ်ဒိုဟ်အဂၞဲဍုၚ်ဗၟာဂှ် ဟိုတ်နူပွဗ္တိုက်သ္ကာတ်မြဟ်ကံၚ်ဇြဳပၞာန် စွံပွန်လ္တူကောန်အရာပ်တံဂှ်တုဲ လ္တူဂကောံမၞိဟ်ပ္ဍဲဒေသတံဂှ် ဖဵုပရေံပရေံတံ က္တဵုဒှ်ကၠုၚ်မံၚ်သၠဲသၠဲလးလးရဂှ် ဂကောံအခေါၚ်အရာ မၞိဟ်ကရေၚ် KHRG ဟီုဂးလဝ်ရ။

ပ္ဍဲလိက်ဒုၚ်စဳရေၚ် ဂကောံအခေါၚ်အရာမၞိဟ်ကရေၚ် တြးပ္တိတ်လဝ် ” မုဟိုတ်ဂွံစွံပွန် လဝ်လ္တူ ပိုဲတံဂှ်ရော – ထ္မံက်ထ္ၜး ဗီုပြၚ်ဒပ်ပၞာန်ဗၟာတံ စွံပွန်ပကီုပရာပ် လ္တူကောန်ကွာန် မၞုံသ္ကုတ်ဒိုဟ် အဂၞဲဍုၚ်ဗၟာ ဂမၠိုၚ်” ဂှ်သ္ဂးလဝ်ရ။

သၞာံ ၂၀၂၁ နူစအခိၚ်ဒပ်ပၞာန်သီအဝဵုတုဲဂှ် ဒပ်ကံၚ်ဇြဳပၞာန်တံ ပ္ဍဲကွာန်မၞုံပ္ဍဲသ္ကုတ်ဒိုဟ်အဂၞဲဍုၚ်ဗၟာတံဂှ် စၞးဂကောံရပ်လွဟ်တံဂှ် ကၠောန်သ္ပကၠုၚ်ပွဗ္တိုက်စွံပွန်လ္တူကောန်အရာပ်တံ ဗွဲမသ္ကာတ်မြဟ်ရဂှ် ပါလုပ် မံၚ် ပ္ဍဲတၚ်လလောၚ်တြးဂှ်ရ။ ပွဂစိုတ်ဂယိုၚ်ဒပ်ကံၚ်ဇြဳပၞာန်တံ၊ ပွဗ္တိုက်တရဴကျာတံ၊ ပွပန်ပှော် လွဟ်ဇၞော်လွဟ်ဍောတ်ကြာန်န်တံ၊ ပွရပ်ဒက်ဗွဲအဓမ္မတံ ကေုာံ ပွပလီုပလာ်ပွပိုၚ်ပြဳတံမပါလုပ် ပွဗ္တိုက်နကဵုတၚ်ရန်တၟံနွံနွံတံဂှ် သ္ကဵုဒှ်ကၠေံဖဵုပရေံပရေံ လ္တူဂကောံမၞိဟ်မၞုံပ္ဍဲဒေသတံရဂှ် KHRG ဟီုသ္ဂးလဝ်ရ။

ဟိုတ်နူပွဗ္တိုက်သ္ကာတ်မြဟ်ကံၚ်ဇြဳပၞာန် စွံပွန်လ္တူကောန်အရာပ်တံဂှ်တုဲ နဒဒှ်ဖဵုအဆက်လက်ကရဴဂှ် သ္ကဵုက္တဵုဒှ်ကၠေံ ပွက္လိလောန်ဝးပ္ကဝ်အခေါၚ်အရာမၞိဟ်ပရေံပရေံ ကေုာံ အမှုရာဇာဝတ်က္လိလောန်လ္တူဂကူ မၞိဟ်တံရဂှ် ညးတာလျိုၚ် ကသေအ်ကၟဝ်ဆဝ်မ္ၚုဟ် KHRG သဝ်နန္ဒသူ ဟီုကဵုဌာန်ပရိုၚ် သြၚ်လောန် တိုၚ်မ်ရ။

” ပွဗ္တိုက်စွံပွန်လ္တူကောန်အရာပ်ဟွံမွဲကဵုဒုဟ်ဒဏ်ဗီုဏံဂှ်တှ်ေ နူကဵုအခိၚ်ကၠာတေံကၠာတေံ နူလက်ထက်တၠအဝဵုပၞာန်အုပ်ဓုပ်မံၚ်တေံရ ဒှ်အရာ ကောန်အရာပ်ညး ဍုၚ်ကွာန်မၞုံသ္ကုတ် ဒိုဟ်အဂၞဲ ဍုၚ်ဗၟာတံ ဒးဆဵုဂဗမံၚ်မွဲရ။ ဗွဲတၟေၚ်ဂှ်တှ်ေ ဇၟာပ်ပ်ပေါဲဗ္တိုက်က္တဵုဒှ် ပ္ဍဲဗ္ဒါဲဗ္ဒါဲကွာန်တံဂှ် ယဝ်ရဆဵုဂဗဒး ကောန်ကွာန်တံတှ်ေ ပွရပ်ဒက်ဟွံဗဗွဲဓရ်တံ၊ ပွဍဵုဍိုက်ပျဲပျာံတံ၊ ပွမဒးဒုၚ်ဂစိုတ်ဂယျိုၚ်တံမပါလုပ် ပွမဒးဒုၚ်စံၚ်ပလီုအလုံကွာန်မွဲတံဂှ်လေဝ် ကၠောန်သ္ပကၠုၚ်လဝ်ရ။ ကြဴနူဒပ်ပၞာန်သီအဝဵု သၞာံ(၂၀၂၁) ဏံတုဲဂှ်လေဝ် အရာတံဏံဆက်က္တဵုဒှ်မံၚ်ဖိုဟ်ဏောၚ်ဏး။ အကြာပေါဲဗ္တိုက်ရပ်လွဟ်ဂှ် ညးဍုၚ်ကွာန် ကောန်အရာပ်ဟွံမွဲကဵုဒုဟ်ဒဏ်တံ ဒးဒုၚ်ဇီုကပိုက်ကၠုၚ်မံၚ်အကြာရ။ ညးတံဂှ် ဒးဒုၚ်ဂစိုတ် ဂယျိုၚ်မံၚ် ဟွံဗဗွဲဓရ်ရ”ဂှ် သဝ်နန္ဒသူ ဟီုရ။

ဟိုတ်နူ ပွဗ္တိုက်သ္ကာတ်မြဟ်ဒပ်ကံၚ်ဇြဳပၞာန်တံတုဲ ပြဟ်ဟ်ဏံ ပ္ဍဲတွဵုရးကရေၚ် ညးဍုၚ်ကွာန်ပါဲဒဴ ဘဲပၞာန်ထောံလသာဌာန်ဒၟံၚ်တံ နွံကၠုၚ် စဵုကဵုပွဳူ (၆)ကိုဋ်တုဲ အရိုဟ်ဒဒှ်တ္ၚဲ နွံမံၚ်ပၟိက် ကုအရီုဗၚ်ပရေၚ်ဗ္စာ ရဏာမၞိဟ်ရဂှ် ပါလုပ်ပ္ဍဲတၚ်လလောၚ်တြးဂှ်ရ။

အရီုဗၚ်ပရေၚ်ဗ္စာရဏာမၞိဟ် ပံၚ်တောဲရေၚ်တၠုၚ်ကုကံၚ်ဇြဳပၞာန်တံဂှ် သွက်ညးနွံပၟိက်ဍာံဍာံတံ သ္ဂောံဂွံအထံက်အပၚ်ဂှ် ဒှ်မံၚ်ပလာပ်ပထုဲတုဲ နကဵုအာဇြဳယာန် သွက်ဂွံပံၚ်တောဲရေၚ်တၠုၚ်တိုက်ရိုက် ကုဂကောံကဵုအရီုဗၚ်ပရေၚ်မၞိဟ်ဗလးတိတံဂှ် သဝ်နန္ဒသူ အာတ်မိတ်လဝ်ရ။

“ယဝ်ရ ညးတံ ပံၚ်တောဲရေၚ်တၠုၚ်နူကံၚ်ဇြဳပၞာန်မွဲကဆံၚ်မ္ဂး ဟွံစိုပ်ဇရေၚ် ညးဍုၚ်ကွာန်နွံပၟိက် အရီုဗၚ်ဍာံဍာံတံဂှ်တုဲ ကံၚ်ဇြဳပၞာန်ဂှ် ဒှ်ဟိုတ်အဓိက သ္ကဵုက္တဵုဒှ်ကၠေံ အကြေပ်ဂြတ်ပရေၚ်ဗ္စာရဏာ မၞိဟ်ရဂှ် ဣဏံ ပိုဲတံဖ္တိုက်ဖ္အောဝ်မံၚ်ညးတံ လၟိုန်ရ”ဂှ် သဝ်နန္ဒသူ သ္ဂးရ။

ပ္ဍဲလိက်ဒုၚ်စဳရေၚ်KHRG လလောၚ်တြးလဝ် နကဵုစၟတ်တ္ၚဲ ဂိတုဂျောန်(၁၆)ဂှ် ပွပ္လံၚ်ပ္တိုန် ကၠေၚ်က္ၜၚ်ကျာ ကုကံၚ်ဇြဳပၞာန်၊ ပွပၠောပ်ပ္တိုန်သွံတြးလွဟ်လက်နက်မပါလုပ် နဲကွတ်ပညာထံၚ်ပရိုၚ် ကေုာံ သွက်ဂွံဒေါံ ဒေၚ်ကဵု ပွရီုဗၚ်ထံက်ပၚ်ပရေၚ်ပၞာန်တၞဟ်သ္အာၚ်တံကဵု ပွကဵုမံၚ်အခေါၚ်အဝဵုကုဂကောံပၞာန်တံဂှ် အာတ်မိက်လဝ်ရ။

သ္အာၚ်နူဂှ်ပၠန် သွက်ဂွံသ္ပစၞး ကုတၚ်ဆဵုဂဗ ကေုာံ ရမျာၚ် ညးဍုၚ်ကွာန်ဒးဒုၚ်ဍဵုပရောပ်တံမာန်ဂှ် သွက်ဂွံပံၚ်တောဲရေၚ်တၠုၚ်ကေုာံ သွက်ဂွံထံက်ပၚ်ကဵုသြန်လှုဲ ကုဂကောံအခေါၚ်အရာမၞိဟ်ကဵု ညးချဳဒရာၚ်ဗလးတိတံညိဂှ် KHRG အာတ်မိက်ကဵုလဝ်ကသပ် ဇရေၚ် တွဳဗွိုၚ်ဂၠးတိ၊ အာဇြဳယာန်၊ ဂကောံအလဵုသဳဟွံသေၚ်တံ ကေုာံ ဇရေၚ်အလဵုသဳတံရ။

ပရိုၚ်- သြၚ်လောန်တိုၚ်မ်

ဗီု- KHRG

Leave a Reply

Your email address will not be published. Required fields are marked *