လဂုၚ် – ဂျောန်(၂၀)
ဒဝ်အံၚ်သာန်သုကျဳ မဒှ်ညးကဵုကသပ်ကၟိန်ဍုၚ်ဂှ် ပ္ဍဲအရာပသောၚ်ကလး ပြဒ္ဒညာကၟိန်ဍုၚ်ဗၟာဂှ် ဒှ်ညးပသှ်ေပါဲစွံလဝ် ဟွံဂွံ ပူဂဵုပၟိက်ဇၞော်အိုတ် မွဲတၠရဂှ် ဗော်ဒဳမဝ်ကရေဇြဳကောန်ဂကူ NLD လလောၚ်တြးလဝ် ပရိုၚ်ရ။
ပ္ဍဲတ္ၚဲမ္ၚဵုက္တဵုဒှ်မၞိဟ် ဥက္ကဋ္ဌဗော်ဒဳမဝ်ကရေဇြဳကောန်ဂကူ ဒဝ်အံၚ်သာန်သုကျဳ မရနုက်ကဵု (၇၈) သၞာံ ကၠုၚ်စိုပ်လဝ် ပ္ဍဲဂိတုဂျောန်စၟတ်တ္ၚဲ (၁၉)ဂှ် လလောၚ်တြးလဝ်ရ။
ဒဝ်အံၚ်သာန်သုကျဳဂှ် ဟိုတ်နူညးဍုၚ်ကွာန်သီုဖအိုတ် သ္ဍိုက်ဆာန်၊ လျုၚ်ပတှ်ေစှ်ေစိုတ်တုဲ ဒှ်ညးဒးဒုၚ်စၟတ်သမ္တီလဝ် နဒဒှ်က္ဍိုပ်သ္ကိုပ်ညးဍုၚ်ကွာန်မွဲတၠလေဝ်ဒှ်တုဲ က္ဍိုပ်သ္ကိုပ်ဗော်ပရေၚ်ဍုၚ်ကွာန် ဇၞးလဝ်မာဲမွဲတၠလေဝ် ဒှ်ရ။

ပ္ဍဲအရာသောၚ်ကလးပြဒ္ဒညာက္တဵုဒှ်ဒၟံၚ် ပ္ဍဲကၟိန်ဍုၚ်ဗၟာဂှ် ဒှ်က္ဍိုပ်သ္ကိုပ်ပၟိက်ကိစ္စဇၞော် ပသှ်ေပါဲစွံလဝ်ဟွံဂွံ မွဲတၠကီု ပ္ဍဲအရာပသောၚ်ကလးပြဒ္ဒညာပရေၚ်ဍုၚ်ကွာန်ဗၟာ က္တဵုဒှ်ကၠုၚ် ဟိုတ်နူဒပ်ပၞာန်သီအဝဵုဂှ် ပရေၚ်ဆဵုဂဗသဳကၠဳကဵု ဒဝ်အံၚ်သာန်သုကျဳ ဟၟဲမွဲသာ် က္လိဂွံဂၠံၚ်ဍာန်ကလိတ်ကလောတ်မာန် ဟွံသေၚ်ရဂှ် ဓမံက်လဝ် ပ္ဍဲတၚ်လလောၚ်တြး NLD ရ။
ဟိုတ်နူအကာဲအရာဏံတုဲ သွက်ညးဒးဒုၚ်ရပ်စပ်လဝ် ဟွံဗဗွဲကဵုဓဝ် ပါလုပ်သီုဒဝ်အံၚ်သာန်သုကျဳတအ် ညံၚ်ဂွံကလေၚ်ဗၠးတိတ်ကၠုၚ်ဂှ် ပံၚ်တောဲရေၚ်တၠုၚ်အာ ကရောံကၟိန်ဍုၚ်မိတ်သဟာဲတအ်ရောၚ်ဂှ် ဟီုသ္ဂးလဝ်ရ။

ဒဝ်အံၚ်သာန်သုကျဳဂှ် သ္ပတမ်နူအခိၚ်ချဳ ဒရာၚ်ပ္တိတ်ဇြဟတ် ပရေၚ်ဒဳမဝ်ကရေဇြဳတုဲ ဒးဒုၚ်ရပ်လဝ် ပွိုၚ် (၁၅)သၞာံပြၚ်ကီု ပ္ဍဲသၞာံ ၂၀၂၀ အခိၚ်ဒပ်ပၞာန်သီအဝဵုဂှ်လေဝ် ဒးဒုၚ်ရပ်ဖျေံလဝ်ထံၚ် လအ်ပွိုၚ် (၂)သၞာံပြၚ်ကၠုၚ်ရဂှ် ဂွံတီကေတ်ရ။
တ္ၚဲမ္ၚဵုက္တဵုဒှ်မၞိဟ်ဒဝ်အံၚ်သာန်သုကျဳ ဥက္ကဋ္ဌ ဗော် NLD မရနုက်ကဵု (၇၈)သၞာံဂှ် ကၠောန်ဗဒှ်ဒၟံၚ် အလုံမွဲ ဂၠးကဝ်တုဲ သွက်ဂွံကလေၚ်ဗၠးတိတ်ဂှ် ပူဂဵု ဂကောံ ဘိုၚ်ရာဒၞာမိက် ဖျေံလဝ်ကဵုမေတ္တာ သီုဖအိုတ်တအ် နကဵုဗော်ဒဳမဝ်ကရေဇြဳကောန်ဂကူ တၚ်ဏာဂုဏ်ဗွဲတၟေၚ်ရဂှ် ဟီုသ္ဂးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – NLD

