သွက်ညးဗြဴမန်ဒးလွဟ်ဇၞော်တုဲ ဒးချိုတ်လဝ်ဂှ် ဒပ်ပၞာန် ကၠုၚ်ကဵုလဝ်သြန် (၂) ၜါကိုတ်ဒ္ကေဝ် ဗွဲအဓမ္မ

ရေဝ်၊ ဂျောန်(၂၀)

သွက်ညးဗြဴမန် ပ္ဍဲကွာန်ကျောက်အိုၚ် ညးဒေသမန်တအ် ကော်ဂးကွာန်ဝၚ်တၟံ ဍုၚ်ခေါဇာ ပွိုၚ်ဍုၚ်ရေဝ် တွဵုရးဍုၚ်မန် ဒးလဝ်လွဟ်ဇၞော်တုဲ ဒချိုတ်လဝ်ဂှ် နူကဵုဒပ်ပၞာန် သြန်သွက်ပရေၚ်ချိုတ်ဂျိုၚ် ညးဗြဴမန် ဒးလဝ်လွဟ်မကမ် ဒးချိုတ်လဝ်ဂှ်ဂးတုဲ ကၠုၚ်ကဵုလဝ် သြန် (၂)ကိုတ်ဒ္ကေဝ် ဗွဲအဓမ္မရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

တံဒပ်ပၞာန်တိုက်ကံၚ်ဇြဳပၞာန် ခလရ (၃၁) ဖျေံသ္ဇိုၚ်ခေါဇာဂှ် ပ္ဍဲဂိတုဂျောန် စၟတ်တ္ၚဲ (၁၆) တုဲကၠုၚ်တေံ ပ္ဍဲအခိၚ်ဗ္တံဂှ် နူကဵုပန်ပှော်ဖျေံလွဟ်ဇၞော် (၅)မကြာန်န် ဟိုတ်နူဒတုံစှ်ေခတိုဟ်လဝ် ပ္ဍဲကွာန်ဝၚ်တၟံတုဲ မိထိုဲထိုဲကျဳ အာယုက်(၃၅)သၞာံ ဒးလွဟ်မကမ်တုဲ ဒးချိုတ်လဝ်ရ။

ကြဴနူပန်ဖျေံလွဟ်ဇၞော်တုဲ ပ္ဍဲတ္ၚဲဂှ်ဟေၚ် ဒပ်ကံၚ်ဇြဳပၞာန် ကၠုၚ်စိုပ် ပ္ဍဲသ္ၚိဒၟံၚ်မိထိုဲထိုဲကျဳတုဲ ဒဒှ်ရဍေံတအ် ပန်လဝ်ဟွံသေၚ်ဂှ် ကၠုၚ်စိုပ်ဟီုလဝ်တုဲ ကလေၚ်တိတ်အာရဂှ် ဂွံတီကေတ်ရ။

ကြဴနူဂှ် ပ္ဍဲဂိတုဂျောန် စၟတ်တ္ၚဲ (၁၈) ဂှ်မ္ဂး နူလ္ပာ်ဒပ်ကံၚ်ဇြဳပၞာန် ကလေၚ်စိုပ်ကၠုၚ်ပၠန်တုဲ သြန်ရီုဗၚ် ပရေၚ်ချိုတ်ဂျိုၚ် သွက်မိထိုဲထိုဲကျဳဂးတုဲ သြန် (၂) ကိုတ်ဂှ် ဒေါံဟွံဂွံဒးကေတ်ဏောၚ် နကဵုဗီုပြၚ်ဏံ ကၠုၚ်စိုပ်ကဵုလဝ် ဗွဲအဓမ္မရဂှ် ညးဒေသမွဲတၠ ဟီုသ္ဂးလဝ်ရ။

ညးဒေသတအ်ဂှ်မ္ဂး ပရေၚ်ပန်ဖျေံလွဟ်ဇၞော် ပ္ဍဲကွာန်ဝၚ်တၟံဂှ် ဒပ်ကံၚ်ဇြဳပၞာန် ကၠောန်သ္ပလဝ်ရဂှ် ဟီုလဝ်ကဵု ဌာန်ပရိုၚ်သြန်လောန်တိုၚ်(မ်) ခိုၚ်ၚ်ကၠိုက်က်ရ။

ဟိုတ်နူဒပ်ပၞာန်တုဲ သွက်ညးဗြဴမန် ဒးလဝ်လွဟ်ဇၞော်တုဲ ဒးချိုတ်လဝ်ဂှ် ဗော်ဍုၚ်မန်တၟိ မဒှ်ဂကောံရပ်လွဟ်ကောန်ဍုၚ်အရၚ်ကီု သီုကဵုဗော်ပရေၚ်ဍုၚ်ကွာန်မန်တအ် ပလံၚ်ဗစိုပ်လိက်ဒစဵုဒစး ဇရေၚ်ကံၚ်ဇြဳပၞာန် လလောၚ်တြးလဝ် တၚ်လစွံစိုတ်တအ်ဂှ် ဟွံဂွံဆဵုညာတ်ကေတ်လဝ်ဏီရ။

တွဵုရးဍုၚ် မန်ပွိုၚ်ဍုၚ်ရေဝ်ဂှ် ပါလုပ်ဒၟံၚ် ပ္ဍဲတိဍာ်ထိၚ်ဒဝ်ဗော်ဍုၚ်မန်တၟိ ဗွဲမွဲလစှ်ေတုဲ ဒပ်ပၞာန်ဗၠးၜး ကောန်ဂကူကရေၚ် KNLA ကဵု ဒပ်စဵုဒၞားညဍုၚ်ကွာန် PDF တအ်လေဝ် ချဳဒရာၚ်ဒၟံၚ် ပရေၚ်ပၞာန်ရ။

ဆ္ဂး ကံၚ်ဇြဳပၞာန်ဂှ် ပ္ဍဲမွဲကာလဒပ်ပၞာန်သီအဝဵုဏံ ကြဴနူတံဒပ်ပၞာန်၊ ဗဒိုပ်ဗၠာဲသၟိၚ်၊ ကေုာံ ရုၚ်ဌာနမ ဆေၚ်စပ် မၞုံပ္ဍဲပွိုၚ်ဍုၚ်ရေဝ်တအ် ဒးဒုၚ်ဗတိုက်ကၠုၚ် ခြာဟွံလအ်ဟွံလအ်တုဲဂှ် ပ္ဍဲဂိတုဖေဖဝ်ဝါရဳ စၟတ်တ္ၚဲ(၂) တုဲကၠုၚ်ဏံဂှ် လလောၚ်တြးကၠုၚ်လဝ် နဒဒှ်ပရေၚ်အုပ်ဓုပ်ပၞာန်ရ။

ပရိုၚ် – သြၚ်လောန်တိုၚ်(မ်)

ဗီုရုပ်-CJ

Leave a Reply

Your email address will not be published. Required fields are marked *