ကျာ်ထဝ်၊ ဂျောန် (၂၁)
တွဵုရးဍုၚ်မန် ပွိုၚ်ဍုၚ်ကျာ်ထဝ် ပ္ဍဲဗဒိုပ်ဗၠာဲသၟိၚ်ကြုၚ်ကပေါဝ် မၞုံတံဒဵုကျာ်ဣသိယဵုဂှ် ထောံဖျေံလဝ်ဗုမ် ကဵုဒရုမ် (၁၀) မတုဲ ဗတိုက်လဝ်ရဂှ် ကဝ်မတဳကောပ်ကာဲကေၚ်ကာမိတ်ခရိုၚ်သဓီု KNU ဟီုကဵု ဌာန်ပရိုၚ်သြန်လောန်တိုၚ်(မ်)ရ။
ဗဒိုပ်ဗၠာဲသၟိၚ်တိဍာ်ကြုၚ်ကပေါဝ် ဒပ်ပၞာန်ကံၚ်ဇြဳပၞာန်ကဵု ဒပ်ဗၠာဲသၟိၚ်တအ် ပံၚ်ကောံမံၚ်ဒၟံၚ်ဂှ် ဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ်စဵုဒၞာညးဍုၚ်ကွာန် PDF တအ် ပံၚ်တောဲအာစိုပ် ဗတိုက်လဝ်ရ။

ပ္ဍဲပရေၚ်ဗတိုက်ပန်ပှော်ဏံ လ္ပာ်ကံၚ်ဇြဳပၞာန် ပန်ဖျေံလွဟ်ဇၞော် ပ္ဍဲဗ္ဒာဲကွာန်ကြုၚ်ကပေါဝ်ဂှ်ကြာန်န်ရ။
ဗုမ် ဂကောံဇြဟတ်ပၠန်ဂတးတအ် ပန်ဖျေံလဝ်ဂှ် ဒတုံစှ်ေခတိုဟ်လဝ် ပ္ဍဲဗဒိုပ်ဗၠာဲသၟိၚ်တုဲ ပရေၚ်ဇီု ကပိုက်ဒးချိုတ်လဝ် ဆက်ဂၠိုက်ဂၠာဲဒၟံၚ်ဖိုဟ်ရဂှ် ဥက္ကဋ္ဌကဝ်မတဳကောပ်ကာဲ ကေၚ်ကာမိတ် ခရိုၚ်သဓီု KNU သ္ကိုပ်ဗိုလ် သဝ်ကျဝ်မျေတ်ဟီုသ္ဂးလဝ်ရ။
ညးစုက်လုက်ကဵုကံၚ်ဇြဳပၞာန်မွဲတၠဂှ်မ္ဂး ပ္ဍဲပရေၚ်ဗတိုက်လဝ်ကဵုဒရုမ်ဏံ ပ္ဍဲဗဒိုပ်ဗၠာဲသၟိၚ်ဂှ် ကွဳစက်ဗၠာဲ သၟိၚ်ဗဒေါံလဝ်မွဲဖ္ဍိုက်ကဵု စမြိုၚ်လ္ၚဵုဟေၚ် ဇီုကပိုက်လီုလာ်လဝ်တုဲ မၞိဟ်ဇီုကပိုက်ဒးလဝ် ဟၟဲရဂှ် ဟီုသ္ဂးလဝ်ရ။

ကြဴနူဗဒိုပ်ဗၠာဲသၟိၚ် ဒးဒုၚ်ဗတိုက်လဝ်တုဲဂှ် လ္ပာ်ဒပ်ကံၚ်ဇြဳပၞာန် ထပ်ဗပေၚ်လဝ်ဇြဟတ်(၂၀) ပြၚ်တုဲ ပတေၚ်ဂြတ်လဝ်ပရေၚ်ဂီုကၠီုရဂှ် ဂွံတီကေတ်ရ။
ဗဒိုပ်ဗၠာဲသၟိၚ်တိဍာ်ကြုၚ်ကပေါဝ်ဂှ် ပ္ဍဲမွဲကာဒပ်ပၞာန်သီအဝဵုဏံ ဒးဒုၚ်ဗတိုက်ဒၟံၚ် ခြာဟွံလအ်ဟွံလအ်တုဲ ပ္ဍဲရေၚ်ဗတိုက်လဝ်ဏံဂှ် သ္ၚိဒၟံၚ်ရေၚ်ဗ္ဒမ် ပ္ဍဲဗဒိုပ်ဗၠာဲသၟိၚ် ဇီုကပိုက်ဒးလဝ်ကီု ကောန်ဒပ်ကံၚ်ဇြဳပၞာန်လ္ၚဵု ဇီုကပိုက်ဒးချိုတ်လဝ် နွံဒၟံၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-KNLA/CJ

