ဇြေတုတ္တရာ – ဂျောန်(၂၁)
ရးဒေသမဂွေ၊ ပွိုၚ်ဍုၚ်ဇြေတုတ္တရာ ဗဒိုပ်ဗၠာဲသၟိၚ် ကွာန်တပွေန်ဂှ် ကြဴနူဒပ် PDF လုပ်စိုပ်သီကေတ်ဂွံတုဲ စံၚ်ပလီုလဝ်ကီု ပျူသဝ်ထဳ ၂ တၠလေဝ် ရပ်ဂွံလဝ်ရဂှ် ဌာနဝန်ဇၞော်ပရေၚ်စဵုဒၞာ NUG လလောၚ်တြးလဝ် ပရိုၚ်ရ။
ပ္ဍဲဂိတုဂျောန် စၟတ်တ္ၚဲ (၁၅) တုဲကၠုၚ်တေံ အခိၚ်ဗ္တံဂှ် ဗဒိုပ်ဗၠာဲသၟိၚ်ကွာန်တပွေန် ကံၚ်ဇြဳပၞာန် ခ.လ.ရ-၂၅၃၊၂၅၄၊၂၅၅ ကဵု က.ပ.စ-၂၀ ဇြဟတ်မၞုံ (၄၀)ဖျေံလဝ်ဗဒိုပ်လဂှ် ဒပ်ပၞာန်စဵုဒၞာညးဍုၚ်ကွာန်(PDF) ခရိုၚ်မေန်ဗူ၊ တံဒပ် – ၃ လုပ်စိုပ် က္ဍိုက်ဗတိုက်လဝ်ရ။

အခိၚ်ပေါဲဗတိုက်ဒှ်လဝ်ဂှ် ဟိုတ်နူလ္ပာ်ကံၚ်ဇြဳပၞာန် ဂြိပ်တိတ်လဝ် နူဗဒိုပ်ဂှ်ရ မ္ၚးနူပျူသဝ်ထဳသှ်ေၜက်ဒၟံၚ် (၂)တၠဂှ် သီဂွံလဝ် ကွဳလိုန်ဓာတ်မွဲဖ္ဍိုက်ကေုာံ ဇွောံမညိညရဂှ် ဓမံက်လဝ် ပ္ဍဲတၚ်လလောၚ်တြးဂှ်ရ။

ကြဴနူအခိၚ်ကောန်ဒပ်ကံၚ်ဇြဳပၞာန်တအ် ဂြိပ်တိတ်နူဗဒိုပ်တုဲဂှ် ဒပ် PDF တအ်စံၚ်ပလီုလဝ် ဗဒိုပ်ဗၠာဲသၟိၚ်ကွာန်တပွေန်တုဲ ပရေၚ်ဇီုကပိုက်ဟၟဲမွဲသာ် ကလေၚ်ဆုတ်တိတ်ကၠုၚ်မာန်လဝ်ရဂှ် ဒပ်ပၞာန်စဵုဒၞာညးဍုၚ်ကွာန်PDF (ရုၚ်ဂအုပ်ပၞာန်) လလောၚ်တြးလဝ် ပရိုၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – MOD

