(၃)မွန်ပြည်နယ်မှာ အလုပ်သမားရှားပါးမှုကြောင့် မိုးစပါးစိုက်ပျိုးဖို့ အခက်ကြုံနေရ

ပ္ဍဲတွဵုရးဍုၚ်မန် ဟိုတ်နူကောန်ကမၠောန်အောန်တုဲ သွက်ဂွံတဵုသြောံကသီုဂှ် ဒးဂဗမံၚ်အခက်

မတ်မလီု၊ ဂျောန်(၂၁)

ပ္ဍဲတွဵုရးဍုၚ်မန် ဟိုတ်နူပြဿနာကောန်ကမၠောန်အောန်တံ ဇၞော်မောဝ်ကၠုၚ်ဂှ်ရ သၞာံဏံ သွက်ဂွံတဵုသြောံကသီုဂှ် ဒးဆေၚ်မံၚ်မုက်ကဵုအခက်အခုဲနာနာသာ်ရဂှ် သၟာဗ္ၚတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။

အခိၚ်တဵုသြောံကသီုဂှ် ကောန်ကမၠောန်စိုန်သကီု နူရးဨရာဝတဳ၊ ရးဗဂေါတံမပါလုပ် နူဒေသစုၚ်တံ ကၠုၚ်စိုပ်မံၚ်ကီုလေဝ် ပ္ဍဲသၞာံဏံ ဟိုတ်နူတိဍာ်ဟွံညိၚ်ဝတ်ကီု၊ မ္ၚးနူအာကၠုၚ်တရဴဝါတ်ဂါတ်ကၠုၚ်တံဂှ် ဟိုတ်နူစရၚ်ကၟုဲကံၚ်ဇြဳပၞာန်တံကီု ဟိုတ်နူတၚ်သၞောတ်ဗ္ၜတ်တံဏံတုဲ အသိၚ်ကောန်ကမၠောန်လုပ်စိုပ်တံ စှ်ေကၠုၚ်တီတီဒှ်ဒှ်ရ။

ကောန်ကမၠောန်ပ္ဍဲဒေသတံဂှ်လေဝ် ၚုဟ်ဖျာက္ဍၚ်တိုန်ဂၠိုၚ်ကဵုဆတုဲ ဟိုတ်နူအခက်အခုဲပရေၚ်စသုၚ်မံၚ်စံၚ်တံဂှ်တုဲ တိတ်ဍုၚ်သ္အာၚ်တုဲ အာကၠောန်စကမၠောန်အိုတ်ဂှ်ရ ဒးဆေၚ်မံၚ်မုက်ကုပြဿနာကောန်ကမၠောန်အောန်တံ ဗွဲမဇၞော်ကဵုဇြဟတ်ရ။

(၃)မွန်ပြည်နယ်မှာ အလုပ်သမားရှားပါးမှုကြောင့် မိုးစပါးစိုက်ပျိုးဖို့ အခက်ကြုံနေရ

သၟာဗ္ၚမွဲတၠဂှ်တှ်ေ မ္ၚးနူကော်ကောန်ကမၠောန်ဟွံဂွံဂှ် ၚုဟ်လိၚ်ကမၠောန်တံလေဝ်က္ဍၚ်တိုန်မံၚ်ဂှ်ရ သွက်ဂွံတဵုသြောံကသီုဂှ် ဒးဆေၚ်မံၚ်မုက် ကုအခက်အခုဲဗွဲမဂၠိုၚ်ဂၠေၚ်တုဲ ပြံၚ်သုၚ်စောဲကၠုၚ်သၞောတ်မဟရာတ်ရဂှ် ဟီုရ။

“ပ္ဍဲပိုဲဂှ်တှ်ေ သၞာံဏံဂှ် ဧကတဵုလွဳအောန်မံၚ်။ ကောန်ကမၠောန်အောန်ကၠုၚ်တုဲ ကၠောန်မဟရာတ်သၟးရဂၠိုၚ်အာ ဗ္တံဟွံမာန်ရပုဟ်။ တုဲပၠန် ၚုဟ်လိၚ်ကမၠောန်ဂှ်လေဝ် က္ဍၚ်မံၚ်တုဲ ဒးဗက်ဂၠံၚ်လှုဲအိုတ်သက်သာဂှ်ရ။ ရိုဟ်အလန်ဂှ် ဂကောံဗ္တမ်မ နူလ္ပာ်ဗဂေါတံ အညာတံ ကၠုၚ်မံၚ်။ သၞာံဏံဂှ် ဍေံတံလေဝ်ကၠုၚ်ဟွံပြေပြံၚ်တီတုဲ မၞိဟ်လ္ပာ်ဏံသီုဖအိုတ် ကၠောန်မဟရာတ်သၟးရဂၠိုၚ်။ ကၠာတေံဂှ် ကောန်ကမၠောန်ပ္ဍဲကွာန်နွံမံၚ်။ ဗွဲကြဴဏံ ကမၠောန်ဝါဗ္ၚဟီုဂှ် လၟေၚ်ဍာံဍေံ ဟွံမွဲပုဟ်လေဝ်။ ၜိုတ်အခိၚ်ရာသဳဍေံရ နွံတှ်ေ ကောန်ကမၠောန်တံဂှ် ဗ္ဒဗ္ဒါဲစကမၠောန်ဏံသၟးလေဝ်မံၚ်ဟွံဂွံပုဟ်။ သွက်ဂွံမံၚ်အဏံဂှ်တှ်ေ ပရေၚ်စသုၚ်မံၚ်စံၚ်ဂှ် ကမၠောန်လၟေၚ်ဍာံဟွံသေၚ်တှ်ေ ဟိုတ်ဂှ်ရ တိတ်ဍုၚ်သ္အာၚ်တုဲ အာကၠောန်စကမၠောန်ဂၠိုၚ်မံၚ်။ လၟိဟ်မၞိဟ်ကၠောန်စကမၠောန်အဏံဂှ် အောန်ကၠုၚ်ရ” ဂှ် သ္ဂးရ။

ကောန်ကမၠောန်စိုန်သကီု တဵုသြောံကသီုတံဂှ် ကိုပ်ကၠာဒပ်ပၞာန်ဟွံဂွံသီအဝဵုဏီဂှ် ၚုဟ်လိၚ်တ္ၚဲမွဲတ္ၚဲမ္ဂး ၜိုန်ရဒးကဵု ပွဳဳူ(၄၀၀၀)ဒ္ကေဝ်ဓဝ်ကီုလေဝ် ပြဟ်ဟ်ဏံဂှ် ၚုဟ်လိၚ်က္ဍၚ်တိုန် စဵုကဵုပွဳူ(၁၀၀၀၀)ဒ္ကေဝ်တုဲ ပြဿနာကော်ကောန်ကမၠောန်ဟွံဂွံတံလေဝ် က္တဵုဒှ်မံၚ်ရ။

သၟာဗ္ၚမွဲတၠဂှ်လေဝ် ဟိုတ်နူကောန်ကမၠောန်အောန်ကၠုၚ်တုဲ သွက်ဂွံတဵုသြောံမွဲဒမြိပ်ကဵုအခိၚ်ဂှ် သ္ပဟွံမာန်ဂှ်ရ ဒးသုၚ်စောဲကၠုၚ်မံၚ်သၞောတ်မဟရာတ်တုဲ ဟိုတ်နူသုၚ်စောဲသၞောတ်မဟရာတ်ဗီုလၟုဟ်ဂှ်ရ ဒမြိပ်တိတ်ယအ်စှ်ေကၠုၚ် တီတီဒှ်ဒှ်မာန်မံၚ်ဂှ် ဟီုရ။

“သုၚ်စောဲကၠုၚ်သၞောတ်မဟရာတ်ဏံဂှ် မုအခက်အခုဲနွံရောတှ်ေ ဍေံဂှ် သွက်မဂွံအံၚ်ဂှ် တၚ်ကော်ဆဴနွံဂၠိုၚ်ကွေံကွေံ။ သၞောတ်မဟရာတ်ဂှ် ယဝ်ရ ဗြဲဇၞော်ဂူစှ်ေကၠုၚ်တှ်ေ ဍာ်ဇၞော်တုဲ ချိုတ်။ လဆောဝ် ဒးဒုၚ်ပလီုပလာ်ကဵုကၞုတံ။ ယဝ်ရဒးပ္တဝ်ဏာကဵု မဗ္တံတှ်ေ မဟရာတ်ဂှ် ဒမြိပ်တိတ်အောန်ရ။ ဍေံဟွံသတ်ၜိုတ်မဗ္တံပုဟ်။ ဗီုလဵုသၟာဗ္ၚတံ ကၠောန်ကၠုၚ်ရောတှ်ေ ဗွဲမဂၠိုၚ်ဂွံမိၚ်ကေတ်ဂှ်တှ်ေ နူကညၚ်တေံဂှ် ထဲလဝ်ကဵုစက်ထဲတိတုဲ ကိုပ်ကၠာဗြဲဟွံဂူဂှ် ဂြာတ်ထောံလဝ်မသြောံဂှ်ရ။ သၞောတ်ဏံဂှ် ဒမြိပ်သြောံတိတ်ဟွံခိုဟ်ကွေံကွေံရ၊ စှ်ေကွေံကွေံရ”ဂှ် သ္ဂးလဝ်ရ။

မွဲလ္ပာ်ပၠန် သၟာဗ္ၚတံဂှ် မ္ၚးနူပြဿနာကောန်ကမၠောန်အောန်ဂှ် ဟိုတ်နူဒးဒုၚ်စသိုၚ်မံၚ် ကုဘဲဒဏ် ၚုဟ်ကပေါတ်တမ်ရိုဟ်သုၚ်စောဲပ္ဍဲပရေၚ်တဵုလွဳတံ က္ဍၚ်တိုန်မံၚ်ဂှ်ရ ဖအောန်တဵုကၠုၚ်သြောံကသီုတံတုဲ ပွတဵုကၠုၚ်ဗီုဒှ်ကဵုဒှ်တံလေဝ် နွံကၠုၚ်ရဂှ် သ္ဂးရ။

တွဵုရးဍုၚ်မန်ဂှ် ဒှ်တွဵုရး တိဧကတဵုသြောံ နွံမံၚ် ဗ္ဒါဲ(၇)ကိုဋ်ပြၚ်မွဲတုဲ လၟေၚ်သၞာံ လၟိဟ်နသြောံအပံၚ် တိတ်မံၚ် (၄၃၀)ကိုဋ်ပြၚ်တုဲ သြောံတိတ်ကၠုၚ်တံဂှ် ဗုတ်တုဲ ပ္လံၚ်ပ္တိုန်သြောံတြးမံၚ် ကုတွဵုရးကေုာံ ရးဒေသလ္ၚဵုတံရ။

ဆ္ဂး သၟာဗ္ၚတံဂှ် ပ္ဍဲကာလဒပ်ပၞာန်သီအဝဵုဏံ ဟိုတ်နူခရိတ်အိုတ်နာနာဇၞော်သၠုၚ်မံၚ်ဂှ်ရ သွက်ဂွံဆက်ကၠောန်တိဗ္ၚတံဂှ် ဒးဂဗကၠုၚ်အခက်တုဲ ဟိုတ်နူပြဿနာသြန်ဓလေံ ဟွံရုမ်ဂပ်ဂှ်ရ လ္တူအိက်သြန်ဂှ် အိက်သြန်ထပ်တၚ်တုဲ ဒးဆေၚ်မံၚ်မုက် ကုပွကျဗြံတံရ။

ပရိုၚ်-သြၚ်လောန်တိုၚ်မ်

ဗီု-CJ

Leave a Reply

Your email address will not be published. Required fields are marked *