သွက်ဂွံသၠုၚ်ပ္တိုန်ပရေၚ်ဆက်ဆောံၜါဍုၚ်ဂှ် သ္ကိုပ်ဝန်ဇၞော်မိုဝ်ဒဳ အာစိုပ် အမေရိကာန်

ဝါယှေန်တာန်၊ ဂျောန် (၂၁)

သ္ကိုပ်ဝန်ဇၞော်အိန္ဒိယ နာရာန်ဒရာမိုဝ်ဒဳဝွံ သွက်ဂွံသၠုၚ်ပ္တိုန်ပရေၚ်ဆက်ဆောံမဟာမိတ်ၜါဍုၚ် ကေုာံ သွက် ပရေၚ်ဟွံတုပ်သၟဟ်တၞဟ်ခြာတံဂှ်တုဲ တိတ်အာတရဴ ကၟိန်ဍုၚ်အမေရိကာန် လလအ်ပွိုၚ် ၄ တ္ၚဲယျဂှ် ထ္မံက်ထ္ၜးလဝ် ပ္ဍဲပရိုၚ်အပ္ဍဲဒေသတံရ။

မိုဝ်ဒဳဝွံ စလဝ် လၟေၚ်တရဴကဆံၚ်ကၟိန်ဍုၚ် နကဵုတၚ်ကော်ဘိက် သမ္မတအမေရိကာန်ဂှ်တုဲ ကြဴနူဒှ်ကၠုၚ်သ္ကိုပ်ဝန်ဇၞော် သၞာံ ၂၀၁၄ တုဲဂှ် အာစိုပ်ဂေတ်ဝေၚ်လဝ် မရနုက်ကဵု ၆ ဝါရောၚ်ဂှ် ထ္မံက်ထ္ၜးလဝ်ရ။

“နူစအာစိုပ်ဂေတ်ဝေၚ် အမေရိကာန် အလန်လက္ကရဴအိုတ် ပ္ဍဲသၞာံ ၂၀၂၁ ဂိတုသေပ်တေမ်ဗာတုဲဂှ် သမ္မတဗိုၚ်ဒေန် ကဵုအဲဂှ် ဆဵုဂဗလဝ်ညးသ္ကအ် ဂၠိုၚ်ကဵုလ္တုန်ရ၊ လၟေၚ်တရဴဏံဝွံ ဒှ်အခေါၚ်အရာ မသ္ကဵုတဴတက်ကၠေံ ပရေၚ်ဆက်ဆောံမဟာမိတ်ပိုယ် မဇြိုဟ်နက်ဂှ်ကဵု အရာဟွံတုပ်သၟဟ်တၞဟ် ခြာတံရောၚ်” ဂှ် ကၠာလၟေၚ်တရဴညးဂွိုအ်စဂှ် သ္ကိုပ်ဝန်ဇၞော်မိုဝ်ဒဳ ဟီုဂးလဝ်ရ။

ပ္ဍဲဂိတုတုဲကၠုၚ်တေံလေဝ် သမ္မတဗိုၚ်ဒေန် ကေုာံ သ္ကိုပ်ဝန်ဇၞော်မိုဝ်ဒဳတံဝွံ ဆဵုဂဗလဝ် ပ္ဍဲကောံဓရီုကဆံၚ်လ္တူ G7 မကၠောန်ဗဒှ်လဝ် ပ္ဍဲဍုၚ်ဂျပါန်ဂှ်ရ။

“လၟေၚ်တရဴအမေရိကာန်အဲဂှ်ဝွံ ဒုၚ်သ္ဇိုၚ်ကဵု လ္တူၚုဟ်မး ဒဳမဝ်ကရေဇြဳ၊ အရာဟွံတုပ်သၟဟ် ကေုာံ ပရေၚ်ဗၠးၜးတံဂှ်တုဲ ဗပေၚ်ဇြဟတ်ကဵု ပရေၚ်ဆက်ဆောံပိုယ်မာန်ဏောၚ်ဂှ် အဲစှ်ေစိုတ်ရ။ ပ္ဍဲအရာဆေၚ်မုက် ကုတၚ်ကော်ဆဴ စပ်ကဵုဂၠးတိတံဂှ်လေဝ် ပိုယ်တံ ဒတူလိုၚ်ဒၟံၚ်မွဲစွံ ဗိုန်န်ဗတ်တ်ရောၚ်” ဂှ် ညးသ္ဂးလဝ်ရ။

နျူဒေလဳ ကေုာံ ဝါယှေန်တာန်ဒဳဇြဳတံဝွံ ပရေၚ်စဵုဒၞါ မဟာဗျူဟာ ကေုာံ ပရေၚ်ဆေက်ဆောံကလုတ်တမာန်တံဂှ် ပါ်ပရအ်လဝ်ညးသ္ကအ်တုပ်ပ်တုဲ လၟေၚ်တရဴဏံဝွံ သ္ကဵုဇြိုဟ်နက်ကၠေံ ပရေၚ်ပံၚ်တောဲညးတံဏောၚ်ဂှ် အဲပတှ်ေစှ်ေစိုတ်ရ။

“ပရေၚ်ဆက်ဆောံ အိန္ဒိယ−အမေရိကာန်ဂှ်ဝွံ နူကဵုသွာၚ်ဇဳ မွဲဟာန်ကေုာံ ပရေၚ်ဆက်ဆောံဆေၚ်မုက် ဗွဲမဇြိုဟ်နက်ဂှ် ဆက်ဆောံဒၟံၚ် မွဲကုမွဲရ။ အမေရိကာန်ဝွံ ပ္ဍဲကဵုပရေၚ်ရေၚ်တၠုၚ် ကေုာံ ဗၞိက်တံဂှ် ဒှ်အဖဝ်မိတ်ပရေၚ်သွံရာန် အိန္ဒိယဇၞော်အိုတ်မွဲတုဲ ပ္ဍဲကဵုသွာၚ်သိပ္ပံ ကေုာံ ကွတ်နဲပညာ၊ ပရေၚ်ပညာ၊ ပရေၚ်ထတ်ယုက်၊ ပရေၚ်စဵုဒၞါ ကေုာံ ပရေၚ်ဂီုကၠီုတံဂှ် ပံၚ်တောဲရေၚ်တၠုၚ်ဒၟံၚ် ကြပ်ပ်ရ” သာ်ဝွံ မိုဝ်ဒဳ ဟီုရ။

သ္ကိုပ်ဝန်ဇၞော်မိုဝ်ဒဳဂှ် ကၠာဂွိုအ်ဆဵုဂဗကဵု သမ္မတဗိုၚ်ဒေန်၊ သၞာဲဒဴအိန္ဒိယ ကေုာံ သၞာဲဒဴအမေရိကာန်တံဂှ် ဒုၚ်တၠုၚ်ဒုၚ်အာကၟုဲ ပ္ဍဲကဵုသ္ၚိဗု နဒဒှ်အခန်ကၞာကၟိန်ဍုၚ်ရောၚ်ဂှ် ဂွံတီကေတ်ရ။

သ္အာၚ်နူဂှ်ပၠန် မေဿတာမိုဝ်ဒဳဝွံ အတိုၚ်က္ဍိုပ်သ္ကိုပ် ကၠတ်ထဝ်တံ ကော်ဘိက်လဝ်ဂှ်မ္ဂး ဟီုအာဂလာန် ပ္ဍဲကၠတ်ထဝ်အမေရိကာန်တံဏောၚ်တုဲ ဗွဲကြဴဂှ် တိုန်စိုပ်အာ ပေါဲစသုၚ်ဗ္တံ ကဆံၚ်ကၟိန်ဍုၚ် နူကဵုသမ္မတဗိုၚ်ဒေန် ကေုာံ သမ္ဘာသမ္မတတံ မဒုၚ်တၠုၚ်ဂှ်ဏောၚ်ဂှ် ဂွံတီကေတ်ရ။

“ကောန်ဂရိတ်အမေရိကာန်ဂှ် သွက်ပရေၚ်ဆက်ဆောံ အိန္ဒိယ−အမေရိကာန်ဂှ် ကဵုဒၟံၚ်ဇြဟတ် ထံက်ပၚ်ဒၟံၚ်ဗော်ၜါဂှ် လၟိန်ဏောၚ်။ အပ္ဍဲလၟေၚ်တရဴအဲဂှ် ဟီုအာဂလာန် ပ္ဍဲကဵုကောံဓရီုပံၚ်တောဲ ကၠတ်ထဝ်အမေရိကာန်ဂှ်ကီုဏောၚ်’ သာ်ဝွံ မေဿတာမိုဝ်ဒဳ ဟီုဂးလဝ်ရ။

နကဵုတၚ်ကော်ဘိက် ဝန်ဇၞော်ကာဍုၚ်သ္အာၚ် အမေရိကာန် အာန်တိုဝ်နဳ ဘလေန်ကာန်ဂှ်လေဝ် ဆဵုဂဗအာဏောၚ်ကီုတုဲ ကုတၠကမၠောန်ပရေၚ်ိပုန်ဒြပ် မရုဲစှ်လဝ်ဂမၠိုၚ်၊ တၠပညာစိုန်သ္ကီုဂမၠိုၚ်တံဂှ်လေဝ် ဆဵုဂဗအာကီုဏောၚ်ဂှ် ဂွံတီကေတ်ရ။

အပ္ဍဲလၟေၚ်တရဴဂှ် ပ္ဍဲကဵုဌာနကူသာန်သွံရာန်ဗဟဵုဂၠးတိဂှ်ကဵု စမြိုၚ် Ronald Reagan နူကဵုဝါယှေန်တာန်ဒဳဇြဳတံဂှ်လေဝ် မ္ၚးနူဂကူအိန္ဒိယတံဂှ် သွက်ဂွံဆဵုအာ ကုကောန်ဍုၚ်အိန္ဒိယတံဂှ်လေဝ် နွံဒၟံၚ်ဂှ် ဂွံတီကေတ်ရ။

Ref: The National News

Leave a Reply

Your email address will not be published. Required fields are marked *