ပ္ဍဲဗဒိုပ်ဗၠာဲသၟိၚ်ကြုၚ်ကပေါဝ် သ္ကိုပ်ဗဒိုပ်ကီု သီုကောန်ဒပ်ဗၠာဲသၟိၚ် (၄) တၠ ကၠေံဒၟံၚ်

ကျာ်ထဝ်၊ ဂျောန်(၂၅)

တွဵုရးဍုၚ်မန် ပွိုၚ်ဍုၚ်ကျာ်ထဝ် ပ္ဍဲဗဒိုပ်ဗၠာဲသၟိၚ်တိဍာ်ကြုုၚ်ကပေါဝ် မၞုံတံဒဵုကျာ်ဣသိယဵုဂှ် သ္ကိုပ်ဗဒိုပ်ကီု သီုကောန်ဒပ်ဗၠာဲသၟိၚ် (၄) တၠ ကၠေံဒၟံၚ်ရဂှ် ညးစုက်လုက်ကဵု ဂကောံဒပ်ဗၠာဲသၟိၚ်ကံၚ်ဇြဳပၞာန်တအ် ဟီုသ္ပလဝ်ဒ္တန်ကဵု ဌာန်ပရိုၚ်သြၚ်လောန်တိုၚ်(မ်)ရ။ 

သ္ကိုပ်ဗဒိုပ် ဂအုပ်ဗၠာဲသၟိၚ်ဇြဝ်မေန်အံၚ်ကီု သီုကောန်ဒပ်ဗၠာဲသၟိၚ် (၄) တၠတအ်ဂှ် နူဂိတုဂျောန် စၟတ်တ္ၚဲ (၂၂)တေံ ကၠေံအာနူကဵုဗဒိုပ်တုဲ ဟွံဂွံလဝ်အဆက်လးလးရဂှ် ဂွံတီကေတ်ရ။ 

ညးတအ်ညး (၄)တၠဂှ် ဟွံဂွံကေတ်ဏာလဝ် လွဟ်လက်နက်မွဲသာ်တုဲ ကၠေံအာ နူကဵုဗဒိုပ်ဂှ်ရ။ 

ပရေၚ်သ္ကိုပ်ဗဒိုပ်ကဵု ကောန်ဒပ်ဗၠာဲသၟိၚ် (၄) တၠ ကၠေံဒၟံၚ်လၟုဟ်ဂှ် ဟိုတ်နူဇြဟတ်ဓရိုဟ်နူလ္တူ ဒၟာနူဟွံမိက်ယိုက်ဂၠေၚ်တာလျိုၚ်တုဲ ဂြိပ်တိတ်အာ ဒှ်မာန်ရဂှ် ညးစုက်လုက်ကဵု ဂကောံဒပ်ဗၠာဲသၟိၚ်မွဲတၠ ဟီုသ္ဂးလဝ်ရ။ 

သ္ကိုပ်ဗဒိုပ် ဂအုပ်ဗၠာဲသၟိၚ်မေန်ဇြဝ်အံၚ်ဂှ် ပြံၚ်ကၠုၚ်ယိုက်ဂၠေၚ်ဒၟံၚ်တာလျိုၚ် ပ္ဍဲဗဒိုပ်တိဍာ်ကြုၚ်ကပေါဝ် လအ်ကၠုၚ် ပွိုၚ်မွဲသၞာံပြၚ်တုဲ ပ္ဍဲအကြာဏံ ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ကၠုၚ်စိုပ်ဗတိုက်လဝ် ဗဒိုပ်ဗၠာဲသၟိၚ်ဂှ် ဟွံအောန်နူ (၅) ဝါနွံရ။ 

ပရေၚ်သ္ကိုပ်ဗဒိုပ်ကဵု ကောန်ဒပ်ဗၠာဲသၟိၚ် (၄) တၠ ကၠေံဒၟံၚ်ဂှ် နူလ္ပာ်ကံၚ်ဇြဳပၞာန် ၜိုန်ရဗက်ဂၠာဲဒၟံၚ် အိုတ်အစောန်ကီုလေဝ် စဵုကဵုလၟုဟ်ဏံ ဟွံက္လေၚ်ဆဵုလဝ်ဏီရ။ 

ပ္ဍဲတွဵုရးဍုၚ်မန်ဂှ် မွဲကာလဒပ်ပၞာန်သီအဝဵုဏံ ဟိုတ်နူကံၚ်ဇြဳပၞာန် စကာကဵု ကောန်ဒပ်ဗၠာဲသၟိၚ်လ္ၚဵုတအ် ပြံၚ်ကၠောံကေတ်တာလျိုၚ် ပ္ဍဲရးသေတ်ဂါၚ် ကေုာံ ရးမဂွေတုဲ ဟွံသ္ပ CDM မွဲသာ် ဂြိပ်တိတ်ဒၟံၚ် နဒဒှ်ဗၠာဲသၟိၚ်ဂြိပ်ဒဴလေဝ် နွံရ။ 

အလုံမွဲကၟိန်ဍုၚ်  ပ္ဍဲမွဲကာလဒပ်ပၞာန်သီအဝဵု ပွိုၚ် (၂) သၞာံပြၚ်ဏံ ကောန်ဒပ်ကံၚ်ဇြဳပၞာန်ကဵု ကောန်ဒပ်ဗၠာဲသၟိၚ် (၁၃၀၀၀) ပြၚ် သ္ပလဝ် CDM ရဂှ် အလဵုအသဳပရေၚ်ညဳသၟဟ်ကောန်ဂကူ (NUG) လလောၚ်တြးလဝ်ရ။ 

ပရိုၚ်-သြၚ်လောန်တိုၚ်(မ်)

ဗီုရုပ်-CJ