သ္ဇိုၚ်ဝန် Non CDM ပ္ဍဲပွိုၚ်ဍုၚ်ရေဝ် ကံၚ်ဇြဳပၞာန် ကဵုဒၟံၚ်ဇြဟတ်ဓရိုဟ် သ္ကာတ်မြဟ်

ရေဝ်၊ ဂျောန်(၂၅)

သ္ဇိုၚ်ဝန် Non CDM မၞုံပွိုၚ်ဍုၚ်ရေဝ် တွဵုရးဍုၚ်မန် မလလောၚ်တြးလဝ် ပရေၚ်အုပ်ဓုပ်ပၞာန်တအ်ဂှ် နူဒပ်ကံၚ်ဇြဳပၞာန် ကဵုဒၟံၚ်ဇြဟတ်ဓရိုဟ် သ္ကာတ်မြဟ်တုဲ စကာဒၟံၚ်ကမၠောန်ရဂှ် သ္ဇိုၚ်ဝန် ဟွံမိက်ဓမံက် ထ္ၜးယၟုတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

သ္ဇိုၚ်ဝန် Non CDM တအ်ဂှ် အရိုဟ်ဒဒှ်တ္ၚဲ ပရေၚ်ကၠောန်ရေၚ်တၠုၚ်ကမၠောန် ကေုာံပရေၚ်ဒဒှ် ပရောပရာတၟေၚ်တၟဟ်တအ်ဂှ် နူသၞာဲဒါကဆံၚ်လ္တူမွဲကဆံၚ် ဒးပ္တိုန်ထ္ၜးဒၟံၚ် ဇရေၚ်ကံၚ်ဇြဳပၞာန်ရ။

ပ္ဍဲအရာပ္တိုန်ထ္ၜးလေဝ် ယဝ်ပလံၚ်ဗစိုပ် ဗွဲမဂတာပ်အခိၚ်ဟွံမာန်မ္ဂး ဟိုတ်နူဒးဒုၚ်ကဵုဇြဟတ်ဓရိုဟ်ကီု သီုဒးဒုၚ်ပရာန်ကဟုက်တုဲ စိုတ်ဓာတ် သွက်ဂွံဆက်သ္ပသ္ဇိုၚ်ဝန် အိုတ်ကၠုၚ်ရဂှ် ဟီုသ္ဂးလဝ်ရ။

သ္ဇိုၚ်ဝန် Non CDM ဒးဒုၚ်ကဵုဒၟံၚ်ဇြဟတ်ဓရိုဟ်တအ်ဂှ် ၜိုန်မိက်ဂွံနုက်တိတ် နူကမၠောန်ကီုလေဝ် ကံၚ်ဇြဳပၞာန် တာဒၞာလဝ် အခေါၚ်နုက်တိတ်နူကမၠောန်တုဲ သ္ဇိုၚ်ဝန်ဟိုတ်နူဂိယဲတုဲ ဒးအိုတ်လမျီုမာန် တအ်ဂှ်ဟေၚ် ပ္တိတ်ကဵုပေန်ဇြေန်ဂဥုဲနွံဒၟံၚ်ရဂှ် ဂွံတီကေတ်ရ။

သ္အာၚ်နူဂှ်ပၠန် သ္ဇိုၚ်ဝန် Non CDM တအ်ဂှ် ပ္ဍဲအရာအာကၠုၚ် အကြာဂၠံၚ် မတ်မလီု-ရေဝ်ဂှ်လေဝ် ပ္ဍဲသၞေဟ်ကၚ်စၟဳစၟတ်ကံၚ်ဇြဳပၞာန် ပံက်စွံလဝ်ဂှ် ဒးကဵုဒၟံၚ်သြန်နွံတုဲ ဒးဒှ်ဒၟံၚ်ဓဝိၚ် ဂွိၚ်ဖေက်ဒးဒုၚ်ရပ်ကဵု PDF တအ်ရဂှ် ဟီုသ္ဂးလဝ်ရ။

အကြာမွဲၜါတ္ၚဲဏံ တံဒပ်ကံၚ်ဇြဳပၞာန်၊ ဗဒိုပ်ပၞာန် ကေုာံ ရုၚ်ဌာနမဆေၚ်စပ် မၞုံပ္ဍဲပွိုၚ်ဍုၚ်ရေဝ်တအ်ဂှ် ဟိုတ်နူပရိုၚ် ဒပ်ပံၚ်ကောံဂကောံဇြဟတ်ပၠန်ဂတးတအ် ကၠုၚ်ဗတိုက်ဏောၚ်ဂးတုဲ ပရေၚ်ဒးဒှ်ဓဝိၚ် ဂၠိုၚ်တိုန်ဒၟံၚ်ရဂှ် သ္ဇိုၚ်ဝန်ဟွံမိက်ဓမံက်ယၟုမွဲတၠ ဟီုသ္ဂးလဝ်ရ။

ဒပ်ပၞာန်ဗၠးၜးကောန်ဂကူကရေၚ် KNLA ဌာန်ဂအုပ်တံဒပ် (၂၇)ဂှ် ဟိုတ်နူချဳဒရာၚ်ထိၚ်ဒဝ်ကၠုၚ် ပ္ဍဲမွဲဒမြိပ်ဂၠံၚ် မတ်မလီု၊ မုဟ်ဍုၚ်၊ ဇြပ်ဗု၊ ရေဝ်၊ ထဝါဲ ကေုာံဂၠံၚ်ဗိက်တုဲ နကဵုညးဍုၚ်ကွာန်အာတရဴတအ် သွက်ဂွံဒုၚ်စၟဳစၟတ်နစိုတ်ဗုဗုအးအးကီု၊ ညံၚ်ဟွံဂွံပ္ဍိုက်ဏာနၚ် ကောန်ဒပ်ကံၚ်ဇြဳပၞာန်တအ်ကီု ညံၚ်ဟွံဂွံ ပ္ဍိုက်ဏာနၚ် ကပေါတ်ဆေၚ်စပ်ကဵု ဒပ်ကံၚ်ဇြဳပၞာန်တအ်ဂှ် ပ္တိတ်လဝ်အသံပၟိၚ် ပ္ဍဲဂိတုဂျောန် စၟတ်တ္ၚဲ(၁၅)ရ။

ဒပ်ကံၚ်ဇြဳပၞာန်လေဝ် နကဵုသ္ဇိုၚ်ဝန်တအ် ယဝ်အာကၠုၚ်တရဴ လောန်ၜက်တိဍာ်မ္ဂး သွက်ဂွံကဵုပရိုၚ် ဇရေၚ်ဌာန်ဂအုပ်ကောပ်ကာဲချဳဒရာၚ်ပၞာန် ဌာန်ဂအုပ် စကစ (၁၉) ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်ရေဝ်ကီု က္လိဂွံအခေါၚ်ဟေၚ် သွက်ဂွံအာကၠုၚ်တရဴဂှ် ကဵုလဝ်တၚ်စၞောန် ဌာနမဆေၚ်စပ်သီုဖအိုတ် ပ္ဍဲဂိတုဂျောန် စၟတ်တ္ၚဲ (၁၃) တေံရ။

တွဵုရးဍုၚ်မန် ပွိုၚ်ဍုၚ်ရေဝ်ဂှ် ပ္ဍဲမွဲကာဒပ်ပၞာန်သီအဝဵုဏံ တံဒပ်ကံၚ်ဇြဳပၞာန် ဗဒိုပ်ပၞာန် ကေုာံ ရုၚ်ဌာနမဆေၚ်စပ်တအ် ဟိုတ်နူဒးဒုၚ်ဗတိုက်ဒၟံၚ် ခြာဟွံလအ်ဟွံလအ်တုဲ ပ္ဍဲဂိတုဖေဖဝ်ဝါရဳ စၟတ်တ္ၚဲ (၂)ဂှ် ကံၚ်ဇြဳပၞာန် လလောၚ်တြးလဝ် နဒဒှ်ပရေၚ်အုပ်ဓုပ်ပၞာန်ရ။

ပရိုၚ်သြၚ်လောန်တိုၚ်(မ်)

ဗီုရုပ်-MOI