ဗဒိုပ်ကံၚ်ဇြဳပၞာန် ပွိုၚ်ဍုၚ်မေဝ်သေအ် ဒပ်ပံၚ်ကောံကရေၚ်ဍာဲ ထပ်သီကေတ်လဝ်

မေဝ်သေဝ် – ဂျောန်(၂၅)

ဗဒိုပ်ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်မေဝ်သေအ် မဒှ်ဍုၚ်ပယျဵုဒၞက် ကၟိန်ဍုၚ်သေံကဵု တွဵုရးကရေၚ်ဍာဲ မွဲဗဒိုပ်ဂှ် ဒပ်ပံၚ်ကောံကရေၚ်ဍာဲတအ် ထပ်သီကေတ်မာန်လဝ်ရဂှ် ဇြေန်တာတၚ်ဂၞၚ်ပရိုၚ် ဟီုသ္ဂးလဝ်ရ။

ပ္ဍဲဂိတုဂျောန် စၟတ်တ္ၚဲ (၂၃) အခိၚ်နူဂယးပြဟ် တုဲကၠုၚ်တေံ ဒပ်ပံၚ်ကောံကရေၚ်ဍာဲတအ် သီကေတ် လဝ် ကုန်ဗျူဟာကံၚ်ဇြဳပၞာန် မေဝ်သေအ် မာန်ကၠုၚ်လဝ်ရ။

ဗဒိုပ်ကုန်ဂကောံဇြဟတ်ပၠန်ဂတးကရေၚ်ဍာဲတအ် သီကေတ်မာန်လဝ်ဂှ် ဒှ်ဒၞာဲပၟိက်ဇၞော် သွက်ကံၚ် ဇြဳပၞာန်ရဂှ် ဝန်ဇၞော် KNPP ပရေၚ်အပ္ဍဲဍုၚ် ညေယျေဝ် ဟီုသ္ဂးလဝ်ရ။

“တၚ်မွဲ ယဝ်ရဒးဟီုတှ်ေ အခိၚ်ဒးတတ်ကၠောံပယျဵုဏောၚ်တှ်ေ ဒးတတ်အာ နူကဵုဂၠံၚ်ဂှ်ရလေဝ်။ ၁၃ တအ် ၁၄ တအ်ဏံ ကုန်ဗျူဟာတအ်ဏံဂှ် ဒှ်ဒၞာဲဖျေံ ဗီုလဵုဂွံကၠောန် တၚ်လလောၚ်တြးပၞာန်ရော။ ဒၞာဲဖျေံဗျူဟာ ဗီုလဵုဂွံအာရောရ။ ကုန်ဗျူဟာဂှ် ဒှ်ဒၞာဲသၞာဲဒါမံၚ်ဒၟံၚ်ဂၠိုၚ်ရ။ ဒှ်ဒၞာဲအုပ်ဓလီုလဝ် ဍုၚ်ပယျဵု။ ဍုၚ်ကုန်ဒဵု အကာဲအရာတိဍာ်အုပ်ဓလီုလဝ် ဍုၚ်ပျယျဵုုရ” ဂှ် ညးဟီုသ္ဂးလဝ်ရ။

ကြဴနူဒပ်ပၠန်ဂတးပံၚ်ကောံကရေၚ်ဍာဲ သီကေတ်လဝ် ကုန်ဗျူဟာ သ္ကုတ်ဗၟံက်ဍုၚ်မေဝ်သေအ်တုဲဂှ် ကံၚ်ဇြဳပၞာန် ကၠုၚ်ပန်ပှ်ောလဝ်ကဵုက္ၜၚ်ကျာ (၄)ဖ္ဍိုက်ရဂှ် ဂွံတီကေတ်ရ။

သ္ပတံနူ ဂိတုဂျောန် စၟတ်တ္ၚဲ (၁၃)တုဲ ဂကောံဒပ်ပံၚ်ကောံပၠန်ဂတးတအ် သီကေတ်ဒၟံၚ် တောၚ်လှ၊ မေဝ်တနွဲ၊ BP-14 ကေုာံ ဗဒိုပ်မေဝ် ဗဒိုပ်ကံၚ်ဇြဳပၞာန်တအ်ရဂှ်ရ။

ပ္ဍဲပယျဵုဒၞက် ဍုၚ်သေံ-ကရေၚ်ဍာဲဂှ် ပါလုပ်သီုဗဒိုပ်ဗၠာဲသၟိၚ်ကံၚ်ဇြဳပၞာန် ဗဒိုပ်ပၞာန်ပယျဵု နွံ (၆)ဗဒိုပ်တုဲ ပ္ဍဲကဵုဂှ် ဒပ်ပံၚ်ကောံပၠန်ဂတးတအ် သီဂွံလဝ် (၅)ဗဒိုပ်တုဲ ဗဒိုကုန်ပ် BP-13 လေဝ် ဖျေံလွဟ် ဒုၚ်ကျလဝ်ရဂှ် ၜိုန်ရပရိုၚ်တိတ်ဒၟံၚ်ကီုလေဝ် နကဵုသြၚ်လောန်တိုၚ်(မ်) သ္ပဒ္တန်တၞဟ်ခြာ ဟွံမာန်ဏီရ။

ပေါဲဗတိုက်ဗဒိုပ်ကုန်ကံၚ်ဇြဳပၞာန်ဂှ် နူကဵုဒဒှ် BGF ဒပ်ပၠတရဴဗၠးၜး ညးဍုၚ်ကွာန်ကောန်ဂကူ ကရေၚ်ဍာဲပံၚ်နှဴ မဒှ်တံဒပ်တံမူလဂှ် ပံၚ်တောဲကဵု ဂကောံဇြဟတ်ပၠန်ဂတးတအ်တုဲ ကၠောန်သ္ပကၠုၚ် ပရေၚ်ပံၚ်တောဲဗတိုက်ရ။

ဟိုတ်နူပရေၚ်ပန်ဗတိုက်ကၠုၚ်ဗီုဏံတုဲ ပ္ဍဲအကံက်တေဝ်လဳဂရာမ် တြးဝါဒကံၚ်ဇြဳပၞာန်ဂှ် ပရေၚ်ဟီုဂး စောတ်စောဲ နွံကၠုၚ်တုဲ ကၠောန်သ္ပဒၟံၚ် ပွပါ်ဒကးဆီလေဝ် ဂွံဆဵုကေတ်ရ။

လ္ပာ်ကံၚ်ဇြဳပၞာန် ဒးဒုၚ်သီကေတ်လဝ်ဗဒိုပ်ကုန် ပၟိက်ကိစ္စဇၞော်ဂှ် သွက်ဂွံကလေၚ်သီကေတ်ဒၞာဲဂှ်မာန်ပၠန် ဗပေၚ်ဒၟံၚ်ဇြဟတ်တုဲ လ္ပာ်ဒပ်ပံၚ်ကောံတအ်ဂှ်မ္ဂး ပေါဲဗတိုက် သာသ္ကာတ်မြဟ်ကၠုၚ်မာန်ရောၚ်ဂှ် ဟီုလဝ်ကဵု ဌာန်ပရိုၚ်သြန်လောန်တိုၚ်(မ်)ရ။

ပရိုၚ်- သြၚ်လောန်တိုၚ်(မ်)

ဗီုရုပ် – CJ(ဗီုဗဒိုပ်ပယျဵု သေံ-ကရေၚ်ဍာဲ ကံၚ်ဇြဳပၞာန်ဒးဒုၚ်ဗတိုက်လဝ်)