က္ၜၚ်ကျာသၞေၚ်ဝဲပၞာန်ရုယှာ ဂကောံဝဂ်နာ ပန်ဖျေံလဝ် က္ဍိုပ်သ္ကိုပ်ဂကောံ သ္ပလဝ်ဒ္တန်

မဝ်သဂိုဝ် – ဂျောန်(၂၅)

ဒဒှ်ရဂကောံဝဂ်နာ ပန်ဖျေံလဝ်လဝ် က္ၜၚ်ကျာသၞေၚ်ဝဲပၞာန်ရုယှာမွဲဖ္ဍိုက်ဂှ် ယဳဗ်ဂျဳနဳ ဖရေစ်ဂအ်ဇြေန် က္ဍိုပ်သ္ကိုပ်ဂကောံဂှ် သ္ပဒ္တန် ဟီုသ္ဂးလဝ်ရ။

ညးဒပ်ပ္တန်လဝ် ဂကောံဝဂ်နာဂှ် ဒဒှ်ရကောန်ဒပ်ပၞာန်ညး တတ်ကၠောံကၠုၚ်ဒၟံၚ် တိဍာ်ယူကရုၚ်တုဲ သွက်ဂွံဒစဵုဒစးဗတိုက်ကဵု ဒပ်ပၞာန်ရုယှာ ဒှ်ဒၟံၚ်ဒတုဲယျဂှ်ဟီုသ္ဂးလဝ်ရ။

“ကရောၚ်ပၞာန်ကောန်အရာပ် နူဂယးဏံရ ပန်ဖျေံလဝ်က္ၜၚ်ကျာသၞေၚ်ဝဲ မွဲဖ္ဍိုက်။ ယူနေတ် PMC ဝဂ်နာ ပန်ဖျေံလဝ်ရ”ဂှ် ဖရေစ်ဂအ်ဇြေန်ဟီုလဝ်ကဵု AFP နကဵုမေတ်ဇြုက်ရမျှာၚ်ရ။

ဒဒှ်ရလုပ်စိုပ်ထိၚ်ဒဝ်ကၠုၚ် ဍုၚ်ရိုစ်သတောဗ် သ္ကုတ်သၠုၚ်ကျာဍုၚ်ရုယှာတုဲ လုပ်စိုပ်ကၠုၚ်ဂှ် က္ဍိုပ်သ္ကိုပ်ဂကောံ ဝဂ်နာဟီုသ္ဂးလဝ်တုဲ ဇၟာပ်ညးစဵုဒၞာ မၞိဟ်ညး အကြာဂၠံၚ်တအ်ဂှ် ပလီုပလာ်အာရောၚ် ဟီုသ္ဂးလဝ်ရ။

ပ္ဍဲပရေၚ်ပန်ဗတိုက်ပၞာန်ကျာမွဲဂှ် စောတ်စောဲလဝ် ဒဒှ်က္ဍိုပ်သ္ကိုပ်ပၞာန်ရုယှာတအ် ပြိုက်ဂစိုတ်လဝ် ကောန်သ္ဂံၚ်ညးတအ်တုဲဂှ် ကဵုအာဒုဟ်ဒဏ်ထေက်ကြိုက် ကုရုယှာရောၚ်ဂးတုဲ ဖရေတ်ဂအ်ဇြေန် သွက်ဂွံပၠန်ဂတးရပ်လွဟ် စကၠောန်ကၠုၚ်လဝ်ရ။

စပ်ကဵုဂကောံ Wagner ပ္တိတ်ဒၟံၚ်ဇြဟ် သွက်ဂွံကၠောန်သ္ပ ပရေၚ်ရပ်လွဟ်ဒစဵုဒစးဂှ်တုဲ ဒဒှ်ရဗလာဒဳမာ ပူတေန် ကဵုလဝ်ပရိုၚ် ကုနာဲဗ္စာအလဵုအသဳရဂှ် သ္ၚိနန်ကရေန်မလေန် လလောၚ်တြးလဝ်ရ။

“ဂအုပ်နာဲဗ္စာဖေတ်ဒရေဝ်ရေယှေန်ရုယှာဂှ် စပ်ကဵုပရေၚ်ပ္တိတ်ဇြဟတ် သွက်ဂွံရပ်လွဟ်ပၠန်ဂတးတုဲ ဆေၚ်စပ်ကဵု ပွမစ က္တဵုဗဒှ်ဂဗုတ်ရာဇဝတ်တုဲ ဒုၚ်လဝ်စဳရေၚ် ဇရေၚ်ပူတေန်ရ” ဂှ် ညးမၞုံအခေါၚ်ဟီုဂး ကရေန်မလေန် ဒဳမဳထရဳပေတ်သကောဗ် ဟီုသ္ဂးလဝ်ရ။

ကြဴနူက္ဍိုပ်သ္ကိုပ်ဝဂ်နာ အာတ်မိက်လဝ် သွက်ဂွံပလှ်ဖျေံ က္ဍိုပ်သ္ကိုပ်ပၞာန်ရုယှာတုဲဂှ် ညးပိုၚ်ပြဳအာဏာ တအ် ပတေၚ်ဂြတ်လဝ် အစဳမာန်ပရေၚ်ဂီုရဂှ် အေဂျေန်ပရိုၚ် ဍုၚ်ရုယှာပိုၚ် ဓမံက်ထ္ၜးလဝ်ရ။

“ပ္ဍဲမဝ်သဂိုဝ်ဂှ် ပတေၚ်ဂရတ်လဝ်ပရေၚ်ဂီုကၠီုရ။ စမြိုၚ်ပၟိက်ကိစ္စဇၞော်တအ်၊ စမြိုၚ်အလဵုအသဳကဵု စမြိုၚ်သ္ဇိုၚ်ပရေၚ်ပလံၚ်ဗစိုပ် ကပေါတ်ကညောတ်သီုဖအိုတ်တအ်ဂှ် စွံလဝ် သၟဝ်ပရေၚ်ဗပေၚ်ဇြဟတ် စဵုဒၞာလဝ်ရ” ဂှ် နိဿဲကဵု တမ်ရိုဟ်တၚ်ဂၞၚ်ပရိုၚ် ပရေၚ်အုပ်ဓုပ်သၞောဝ်ဓဝ်တုဲ ဌာန်ပရိုၚ်အလဵုအသဳပိုၚ် TASS ဓမံက်ထ္ၜးလဝ်ရ။

ညးဒက်ပ္တန်လဝ်ဝဂ်နာဂှ် ဟီုဂးစောတ်စောဲလဝ် ရုယှာ ပန်ပှော်လဝ် ကောန်ဒပ်ညး နကဵုကမ်လှောဝ် လေပ်ကဵုအိုတ်လမျီုမာန်တုဲ ကလေၚ်ပၠန်အာတဲရောၚ် ကြဴနူကဵုကတိပါၚ်တုဲ က္တဵုဒှ်ကၠုၚ် ဗီုလၟုဟ်ရဂှ် ဂွံတီကေတ်ရ။

Ref;News Arab