ရေဝ် -ဂျောန် (၂၇)
တွဵုရးဍုၚ်မန်၊ ပ္ဍဲကွာန်သၞေဟ်ခြေၚ် ပွိုၚ်ဍုၚ်ရေဝ်ဂှ် ဟိုတ်နူဒပ်ကံၚ်ဇြဳပၞာန် ဂြာတ်ထောံဖျေံလဝ်ဗုမ် ကဵုက္ၜၚ်ကျာတုဲ ပြဟ်ပြဟ်ဏံ ကောန်အရာပ်(၁)တၠ ဒးချိုတ်လဝ်တုဲ ဒးလဝ်ဘဲဝပ် (၄) တၠရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုဂျောန် စၟတ်တ္ၚဲ (၂၅) အခိၚ်နူဂယး အကြာၜိုတ်(၁၁)နာဍဳဂှ် ဟိုတ်နူဒပ်စဵုဒၞာဒေသ လုပ်ဗတိုက်လဝ် ဗဒိုပ်ဗၠာဲသၟိၚ် ကွာန်သၞေဟ်ခြေၚ် မ္ၚးနူက္ၜၚ်ကျာတုဲ လ္ပာ်ကံၚ်ဇြဳပၞာန် သုၚ်စောဲလဝ်အမၠံက် ပန်ဗတိုက်လဝ်ရ။
ဟိုတ်နူပရေၚ်ကံၚ်ဇြဳပၞာန် ပန်ဗတိုက်လဝ်တုဲ အကာဲအရာဇီုကပိုက် ဒးချိုတ်လဝ် သာဂၠိုၚ်ကၠုၚ်မာန်ဒၟံၚ်ရဂှ် ဂွံတီကေတ် အတိုၚ်လဟီုညးဒေသတအ်ရ။
“အကာဲအရာ ပရေံဒၟံၚ်ကွေံကွေံရ၊ ဒဵုကဵုလၟုဟ် ကၠောန် ကမၠောန်ရီုဗၚ်ဟံၚ်ပြာ် ဟွံမာန်ဏီပုဟ်။ ပ္ဍဲကဵုဒၞာဲကမၠောန်တၞဟ်တအ်ဂှ် ဇီုကပိုက် ဒးချိုတ်လဝ်နွံဒၟံၚ် ဂွံမိၚ်လဝ်ရ”ဂှ် ညးဒေသမွဲတၠ ဟီုသ္ဂးလဝ်ရ။
ပ္ဍဲပေါဲဗတိုက်ၜါလ္ပ်ာဂှ် နူလ္ပာ်ကံၚ်ဇြဳပၞာန် ၜိုန်ရကၠုၚ်ပန်ပှော်လဝ် ကဵုက္ၜၚ်ကျာသၞေၚ်ဝဲ (၂) ဖ္ဍိုက် ပ္ဍဲမ္ၚးကွာန်ကီုလေဝ် အခိၚ်ဇိုၚ်သဝ်တ္ၚဲ ၜိုတ် (၃)နာဍဳဂှ် ရမျှာၚ်ပန်ပှော်သ္ၚိတ်အာရဂှ် ဟီုလဝ်ဏီရ။
နကဵုသြၚ်လောန်တိုၚ်(မ်) ဂၠိုက်ဂၠာဲအာ အကာဲအရာဗလးမုက်တိ ကွာန်သၞေဟ်ခြေၚ်သောဲသောဲဗြောဲဗြောဲတုဲ သွက်ဂွံထပ်ပတိုန်ထ္ၜးကဵု အကာဲအရာပရေၚ်ဇီုကပိုက်ဒးလဝ်ဂှ် ပ္တိတ်ဒၟံၚ်ဇြဟတ်ရ။
ပ္ဍဲဂိတုဂျောန် စၟတ်တ္ၚဲ (၂၄) တုဲကၠုၚ်တေံ အခိၚ်ဇိုၚ်သဝ်တ္ၚဲဂှ်လေဝ် နကဵုတၚ်စောတ်စောဲ ကောန်ဒပ် KNU လုပ်စိုပ်ဒၟံၚ် ကွာန်လဂေါဝ်ဇၞော်(စခန်ကြီး) ပွိုၚ်ဍုၚ်ဇြပ်ဗုတုဲ ဟိုတ်နူ လွဟ်ဇၞော် ဒပ်ကံၚ်ဇြဳပၞာန် မၞုံဂၠံၚ်ပါ်သက္ကအ်-ကျာ်ပိ ပန်ဖျေံလဝ်ဂှ် ပါ်ခတိုဟ်လဝ်တုဲ ညးဗြဴ အာယုက်ဗွိုၚ် (၆၀)မွဲတၠ ဇီုကပိုက် ဒးချိုတ်လဝ်ဏီရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ
sanlontai