မတ်မလီု-ဂျောန်(၂၆)
ပၞာန်မိစ္ဆာ ဟွံမာန် ဇြဟတ်ညးဍုၚ်ကွာန်တအ်ပုဟ်ဂှ် ဒးထ္ၜးသက်သဳတုဲ ဒဵုကဵုဂွံပေါဲအံၚ်ဇၞး ဒးပၠန်ဂတး အာတုဲ ဒးယဵုဒုၚ် သစ္စာညးဍုၚ်ကွာန်တအ်ရောၚ်ဂှ် ဒုတိယဝန်ဇၞော် နာဲကောရတ် ဌာနဝန်ဇၞော်ပရေၚ် စဵုဒၞာ NUG ဟီုသ္ဂးလဝ်ရ။
ပ္ဍဲဂလာန်ဗ္ကန်ပလံၚ်ဗစိုပ်လဝ် တ္ၚဲစၟတ်သမ္တီ တ္ၚဲဒက်ပ္တန်ဂကောံစဵုဒၞာညးဍုၚ်ကွာန် (ပ.က.ဖ) သၟဝ်တဲဌာန ဝန်ဇၞော်ပရေၚ်စဵုဒၞာ အလဵုအသဳပရေၚ်ညဳသၟဟ်ကောန်ဂကူ ပေၚ်(၂)သၞာံဂှ် ဟီုသ္ဂးလဝ်သာ်ဏံရ။
လ္အိတ်ပရေၚ်ပၠန်ဂတးဂှ် ဟိုတ်နူဒှ်တိုၚ်ပ္ကဴညးဍုၚ်ကွာန်တအ်ဂှ်ရ ပ္တိတ်လဝ်တံရိုဟ် လမျီု၊ ဆီ၊ ပဠက်တုဲ ဒးဗတိုက်သရိုဟ်အာ ပၞာန်မိစ္ဆာတအ်ကီု ပ္တိတ်လဝ်တံရိုဟ်လမျီု၊ ဆီ၊ပဠက်တုဲ ဒက်ပ္တန်အာ ကၟိန်ဍုၚ် ဖေတ်ဒရေဝ်ပံၚ်ကောံအနာဂတ်ရောၚ်ဂှ် ကဵုလဝ်သမ္တီရ။
မွဲကရောံကဵု ပၠန်ဂတးက္ညၚ်ဂှ် သွက်ဂွံဗတိုက်သရိုဟ်အာ ပၞာန်မိစ္ဆာတုဲ ပၠန်ဂတးလဝ်ဂှ်ရ ကလေၚ်အာ သၟဝ်ဂတာဒၞပ်ပၞာန်ဟွံသေၚ်ရောၚ်ကီု ကလေၚ်ဂတးကွာ်ပ္တဝ်အာ ဒၞာဲတဝ်မုက်ဟွံသေၚ်တုဲ ဆက်ဂါံကွာ် အာရောၚ် ဒဵုစိုပ်လအိတ်ဂှ် ဟီုသ္ဂးလဝ်ရ။
ပ္ဍဲလ္တူတိကၟိန်ဍုၚ်ဗၟာဂှ် မွဲကရောံကဵုပရေၚ်ပၠန်ဂတးက္ညၚ်မွဲစွံဏံ သၞောတ်တၠအဝဵုပၞာန်ဒးအုပ်နိဂီုကီု ကဵုအဆက်ဆေန်ညးဍုၚ်ကွာန်တအ် ဒုၚ်တၞီဗၠိုက်အာ ပ္ဍဲသၟဝ်တၠအဝဵုပၞာန် ဟွံမာန်ရဂှ် ဒုဝန်ဇၞော်နာဲကောရတ် ဟီုသ္ဂးလဝ်ရ။
ပၠန်ဂတးလုပ်ဒၟံၚ်ပေါဲဗတိုက်လၟုဟ်ဏံဂှ် ဒှ်ပၠန်ဂတးညးဍုၚ်ကွာန်တုဲ ဇြဟတ်ညးဍုၚ်ကွာန်ဂှ်လေဝ် ဟိုတ်နူဒှ်ဇြဟတ်ပၠန်ဂတးဂှ်ရ ညံၚ်ဂွံက္လိဂွံ ပေါဲအံၚ်ဇၞး ဒးပ္တိတ်အာဇြဟတ်ရောၚ်ဂှ် ဗတိုက်ဖ္အောဝ်လဝ် သ္ဂံၚ် ပ.က.ဖတအ်ရ။
နကဵုသ္ဂံၚ်ပၠန်ဂတးတအ်ဂှ် ဟိုတ်နူဒှ်ညးပၠန်ဂတးဗတိုက်ဒၟံၚ်ကံၚ်ဇြဳပၞာန် မၞိဟ်လ္ပာ်ညးဍုၚ်ကွာန်၊ ဒှ်ညးက္လိဂွံလဝ် ပရေၚ်ထံက်ဂလာန် နူညးဍုၚ်ကွာန်တအ်ဂှ်ရ အခိၚ်စုက်လုက် ဒးဆက်ဆောံကဵု ညးဍုၚ်ကွာန်တအ်ဂှ် သွက်ဂွံဆက်ဆောံဂီုကၠီု၊ သွက်ဂွံရီုဗၚ်ထ္ၜလဘာ်ကီု၊ အကြာသ္ဂံၚ်မွဲတၠကဵုမွဲတၠကီု အကြာမဟာမိတ်ကဵုဒှ် ညဳသာသၟဟ်သၟန်တုဲ နကဵုပရေၚ်သ္ပရှ်ေသှ်ေနွံနွံ ကွာ်ဂါံအာ တရဴပၠန်ဂတး ညိဂှ်လေဝ် ကဵုလဝ်သမ္တီရ။
အခိၚ်လၟုဟ်ဏံ ပ္ဍဲမွဲကာလပၠန်ဂတးက္ညၚ် ပွိုၚ်(၂)သၞာံဏံ တိဍာ်ကံၚ်ဇြဳပၞာန်ထိၚ်ဒဝ်လဝ်တအ်ဂှ် ဒပ်စဵုဒၞာညးဍုၚ်ကွာန်တအ် သီကေတ်လဝ်မာန် နွံဒၟံၚ်ကီု စ္ဍးတိတ်နူဒပ်ကံၚ်ဇြဳပၞာန်တုဲ ညးလုပ်စိုပ်ကၠုၚ် လ္ပာ်ညးဍုကွာန်တအ်လေဝ် နွံဒၟံၚ်ကီုရ။
ပရိုၚ်-သြၚ်လောန်တိုၚ်(မ်)
ဗီုရုပ် – MOD
sanlontai