ရေဝ်၊ ဂျောန်(၂၇)
တွဵုရးဍုၚ်မန် ရုၚ်ဌာနမဆေၚ်စပ်ဗွဲမဂၠိုၚ် မၞုံပ္ဍဲဍုၚ်လၟိုၚ် ပွိုၚ်ဍုၚ်ရေဝ် မလလောၚ်တြးလဝ်ပရေၚ်အုပ်ဓုပ်ပၞာန်ဂှ် ကံၚ်ဇြဳပၞာန် ကၟာတ်ကၠုၚ်တုဲ ညးယိုက်ဝန်တအ်ဂှ် ပြံၚ်စၠောံလဝ် ပ္ဍဲရုၚ်ဌာနမဆေၚ်စပ်ဍုၚ်ရေဝ်ရဂှ် ဒေသတအ် ဟီုကဵု ဌာန်ပရိုၚ်သြန်လောန်တိုၚ်(မ်)ရ။
ဟိုတ်နူအကာဲအရာ ဒးဒှ်ဓဝိၚ်ကဵု ပရေၚ်ဂီုကၠီုတိဍာ်တုဲ သ္ပတံနူဂိတုဨဗြဴ တုဲကၠုၚ်တေံတုဲ ကံၚ်ဇြဳပၞာန် ကၟာတ်ကၠုၚ်ဒၟံၚ် ရုၚ်ဌာနမဆေၚ်စပ်တအ် သိုက်က်တုဲ အခိၚ်လၟုဟ်ဏံမ္ဂး ရုၚ်ဌာနက္ဍိုက်က္ဍိုပ်ပရေၚ်ထတ်ယိုတ် မွဲရုၚ်ဟေၚ် ပံက်စွံလဝ်ရ။
ဟိုတ်နူကံၚ်ဇြဳပၞာန် ကၟာတ်လဝ် ရုၚ်ဌာနမဆေၚ်တအ်တုဲ သွက်ကောန်ဍုၚ်လၟိုၚ်တအ် ဂွံကၠောန်ရေၚ်တၠုၚ်လၟေၚ်ကမၠောန်ရုၚ်ဂှ် ဒးအာဒၟံၚ် စဵုကဵုဍုၚ်ရေဝ်တုဲ မ္ၚးနူသြန်ဒးအိုတ်ဂှ် ဟိုတ်နူပရေၚ်ပန်ပှ်ော နွံဒၟံၚ်တုဲ ဒးဒှ်ဒၟံၚ်ဓဝိၚ်ကဵု ပရေၚ်ဂီုကၠီုရဂှ် ကောန်ဍုၚ်လၟိုၚ်မွဲတၠ ဟီုသ္ဂးလဝ်ရ။
ကောန်ဒပ်ဗၠာဲသၟိၚ်ၝောံဍုၚ်လၟိုၚ်တအ်လေဝ် ဟိုတ်နူဂွိၚ်ဖေက် ဒးဒုၚ်ဗတိုက်ကဵု ဂကောံဇြဟတ်ပၠန်ဂတးတအ်တုဲ ပြံၚ်ကၠောံအာ ပ္ဍဲဒပ်ပၞာန်ရဂှ် ဂွံတီကေတ် နူညးဒေသတအ်ရ။
ဟိုတ်နူကံၚ်ဇြဳပၞာန် ကၟာတ်လဝ်ရုၚ်ဌာနမဆေၚ်စပ်တုဲ ညးယိုက်ဝန် ကောန်ဍုၚ်လၟိုၚ်တအ်ဂှ် ဒးအာတိုန်ဒၟံၚ်ရုၚ် စဵုကဵုဍုၚ်ရေဝ်တုဲ ဒးဒှ်ဒၟံၚ်ဓဝိၚ် ဂွိၚ်ဒၟံၚ်ကဵု ပရေၚ်ဂီုကၠီုရဂှ် ညးယိုက်ဝန် Non CDM ဟွံမိက်ဓမံက်ယၟုမွဲတၠ ဟီုသ္ဂးလဝ်ရ။
မွဲလ္ပာ်ပၠန် ကံၚ်ဇြဳပၞာန်ဂှ် နကဵုညးယိုက်ဝန်ဂမၠိုၚ် ယဝ်ရအာကၠုၚ် တရဴလောန်ၜက်တိဍာ်မ္ဂး ဒးပလံၚ်ကဵုပရိုၚ် ဇရေၚ် ဌာန်ဂအုပ် စကစ (၁၉) ဌာနဂအုပ်ကောပ်ကာဲပရေၚ်ပၞာန် ကံၚ်ဇြဳပၞာန် ဖျေံသ္ဇိုၚ်ဍုၚ်ရေဝ်ကီု ဂွံအခေါၚ်ဟေၚ်မှ ဒးအာကၠုၚ်ရောၚ်ဂှ် ကဵုလဝ်တၚ်စၞောန် ပ္ဍဲဂိတုဂျောန် စၟတ်တ္ၚဲ (၁၃)ရ။
တွဵုရးဍုၚ်မန် ပွိုၚ်ဍုၚ်ရေဝ်ဂှ် ပ္ဍဲမွဲကာလဒပ်ပၞာန်သီအဝဵုဏံ တံဒပ်ကံၚ်ဇြဳဳပၞာန်၊ ဗဒိုပ်ပၞာန် ကေုာံ ရုၚ်ဌာနမဆေၚ်စပ်တအ် ဒးဒုၚ်ဗတိုက်ဒၟံၚ် ခြာဟွံလအ်ဟွံလအ်တုဲ ဒှ်ပွိုၚ်ဍုၚ် ဂကောံဇြဟတ်ပၠန်ဂတးတအ် ထိၚ်ဒဝ် တိဍာ်လ္ၚဵုတအ်မာန်ကၠုၚ် မွဲပွိုၚ်ဍုၚ်ရ။
ပရိုၚ် – သြၚ်လောန်တိုၚ်(မ်)
ဗီုရုပ်-CJ
sanlontai