ကွာန်ယျၚေဝ် ပွိုၚ်ဍုၚ်တယျေတ်ချောၚ် ကံၚ်ဇြဳပၞာန်ထပ်စံၚ်ပလီုဒၟံၚ်ပၠန်

တယျေတ်ချောၚ်၊ ဂျောန်(၂၇)

သ္ၚိဒၟံၚ်ညးဍုၚ်ကွာန် မၞုံကွာန်ယျၚေဝ် ပွိုၚ်ဍုၚ်တယျေတ်ချောၚ် ရးဒေသဇၞော်တၞၚ်သြဳ ဒးဒုၚ်စံၚ်ပလီုလဝ် ၜါဝါပေၚ်ၚ်ဂှ် တ္ၚဲဏံ ဂိတုဂျောန် စၟတ်တ္ၚဲ (၂၆) ဏံလေဝ် ထပ်စံၚ်ပလီုဒၟံၚ်ပၠန်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဒပ်ကံၚ်ဇြဳပၞာန် ဖျေံလဝ်ဗဒိုပ် ပ္ဍဲဒဵုမွေ ဗ္ဒာဲကွာန်ယျၚေဝ်ဂှ် တ္ၚဲဏံ အခိၚ်နူဂယး ၜိုတ် (၈) နာဍဳဂှ် လုပ်စိုပ် ကၠုၚ် ကွာန်ယျၚေဝ်တုဲ စံၚ်ပလီုဏာ သ္ၚိဒၟံၚ်ညးဍုၚ်ကွာန်တအ်ရ။

ဟိုတ်နူဒပ်ကံၚ်ဇြဳပၞာန် စံၚ်ပလီုဏာတုဲ ပြဟ်ပြဟ်ဏံ သ္ၚိဒၟံၚ် ဟွံအောန်နူ (၃) မ တူပၟတ်ဒးလီုလာ်လဝ်တုဲ ဒးဂ္ဇအ်ဗဵုဒၟံၚ် ဒမၠုယက် နူဒၞာဲဌာန်သ္ၚောဲရဂှ် ညးဒေသမွဲတၠ ဟီုသ္ဂးလဝ်ရ။

ကွာန်ယျၚေဝ် ဒးဂြိပ်ပါဲဒဴဒၟံၚ် သီုအလုံမွဲကွာန်ဂှ် ပ္ဍဲဂိတုဂျောန် စၟတ်တ္ၚဲ (၁၁) ကဵု စၟတ်တ္ၚဲ (၁၆) တုဲကၠုၚ် တေံဂှ် ဟိုတ်နူဒပ်ကံၚ်ဇြဳဳပၞာန် စံၚ်ပလီုလဝ်တုဲ သ္ၚိဒၟံၚ် ဟွံအောန်နူ (၅) မ တူပၟတ် ဒးလီုလာ်လဝ်ရ။

သ္ပတံနူ ဂိတုဂျောန် ပဌမသတ္တာဟတုဲ ဟိုတ်နူ ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲပွိုၚ်ဍုၚ် တယျေတ်ချောၚ် သီုဇြဟတ်ပေၚ်ၚ်တုဲ ပေါဲဗတိုက်က္တဵုဒှ်လဝ်ကဵု ဒပ်စဵုဒၞာဒေသတအ်ရ။

ဟိုတ်နူပေါဲဗတိုက်ဏံတုဲ ညးဒေသနူကွာန် ယျၚေဝ်၊ ကနေတ်သဳရိ၊ ကမျာၚ် ကေုာံ ဝါရက်တအ် (၅၀၀၀) ပြၚ်တအ်ဂှ် ဒးဂြိပ်ဒဴပါဲဓလေတ်ဒၟံၚ်တုဲ စဵုကဵုအခိၚ်လၟုဟ် ဟွံဂံၚ်ကလေၚ်စဴ ဌာန်ဒၟံၚ်ဏီရ။

အလုံမွဲကၟိန်ဍုၚ် ပ္ဍဲမွဲကာလဒပ်ပၞာန်သီအဝဵုဏံ ဟိုတ်နူဒပ်ကံၚ်ဇြဳပၞာန်ကဵု ဂကောံသၟဝ်တဲ ကံၚ်ဇြဳပၞာန် တအ် စံၚ်ပလီုလဝ်တုဲ သ္ၚိဒၟံၚ်ညးဍုၚ်ကွာန် ၆၀,၀၀၀ ပြၚ် ဒးဒုၚ်စံၚ်ပလီုလဝ်ရဂှ် Data for Myanmar မဒှ်ဂကောံသုတေသနမွဲဂကောံဂှ် လလောၚ်တြးလဝ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-CJ