လဂုၚ် – ဂျောန် (၂၉)
မဝေါတ်ယျဳအောၚ် မဒှ်ညးရေၚ်တၠုၚ်ကေၚ်ကာဗဟဵု သမဂ္ဂကွးဘာတက္ကသိုလ်ဒဂုၚ်ဂှ် ပ္ဍဲဂိတုဂျောန် စၟတ်တ္ၚဲ (၂၇)တုဲကၠုၚ်တေံ ဟိုတ်နူဒးဒုၚ်ထပ်ဖျေံလဝ် ဒဏ်ထံၚ်နကဵုၝောံပိုဒ် ၅၂ (က) ပွိုၚ်(၄)သၞာံပၠန်ဂှ်ရ အပံၚ်လၟိဟ်ဒဏ်ထံၚ် (၇)သၞာံ ဒးဒုၚ်ဖျေံလဝ်ရ။
မဝေါတ်ယျဳအောၚ်ဂှ် စဵုကဵုလၟုဟ်ဏံ ရပ်ဒက်လဝ် ပ္ဍဲထံၚ်အၚ်စိၚ်တုဲ ဟိုတ်နူဒးဒုၚ်ဍဵုဍိုက်ဟွံဗဗွဲဓဝ်၊ ဒးဒုၚ်ပျဲပျာံဒၟံၚ် ဗွဲအဓမ္မ၊ ဟွံဂွံအခေါၚ်မၚ်မွဲရံၚ်စံၚ် ပရေၚ်ထတ်ယိုတ်တုဲ ပ္ဍဲပရေၚ်စၟဳစၟတ်ဂှ် ဟိုတ်နူဒးဒုၚ် ပျဲပျာံလဝ်ဂှ်ရ ဒးဆေၚ်ဒၟံၚ်မုက်ကဵု အကာဲအရာ ဒးဒှ်ဓဝိၚ်ရ။
ကွးဘာတက္ကသိုလ်ဒဂုၚ် တြုံဗြဴ (၆) တၠတအ်ဂှ် ပ္ဍဲသၞာံ ၂၀၂၁ ဂိတုသေပ်တေမ်ဗာ စၟတ်တ္ၚဲ (၁၄)ဂှ် လ္ပာ်ကံၚ်ဇြဳပၞာန် ရပ်ကေတ်လဝ် ပ္ဍဲပွိုၚ်ဍုၚ်ကျောက်တတာ၊ ဍုၚ်လဂုၚ်တုဲဂှ် စောဲလဝ်ဂဗုတ် နကဵုၝောံ ပိုဒ်ရာဇသာတ်ဇၞော် ၅၀၅ (က) ၝောံပိုဒ် ၅၂ (က)တအ်ရ။
“ညးဂှ် ဒးလဝ်ယဲကျာ ပ္ဍဲထံၚ်ရ။ ဒးဒုၚ်ၜုၚ်တက်လဝ် ပ္ဍဲပရေၚ်စၟဳစၟတ်ဂှ်လေဝ် ဒဵုကဵုဒှ်အာကလောံ ပ္ဍဲက္ဍဟ်ရ။ ဟိုတ်နူအကာဲအရာ ဝိုတ်မံၚ်သတိ (၁၅) မိနေတ်မွဲဝါတုဲ ဒးကဵုဒၟံ၎်အံက်ဇြဳဂျေန် နွံဒၟံၚ်ရ” ဂှ် သ္ဂံၚ်သမဂ္ဂကွးဘာတက္ကသိုလ်ဒဂုၚ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂဗုတ်ကံၚ်ဇြဳပၞာန်စောဲလဝ်တအ်ဂှ် မဝေါတ်ယျဳအောၚ် ဒးဒုၚ်ဖျေံလဝ်ဒဏ်ထံၚ် နကဵုၝောံပိုဒ် ၅၀၅ (က) ပ္ဍဲဂိတုမာတ်ချ် သၞာံ ၂၀၂၂ ဂှ် ဒဏ်ထံၚ်ပွိုၚ် (၃)သၞာံရ။
လၟုဟ်ဏံမ္ဂး ကွးဘာတြုံဗြဴတက္ကသိုလ်လဂုၚ်တအ်ဂှ် ကံၚ်ဇြဳပၞာန် သုၚ်စောဲနဲကဲစုၚ်လေၚ်တုဲ ရပ်ဒက် လဝ် ဟွံဗဗွဲဓဝ်ကီု ပ္ဍဲကဵုဂှ် ကိုဝ်ဒဳဟဇြဝ်၊ ကိုဒူရမောၚ်မောၚ်၊ ကိုဝ်ဟုၚ်ထေတ်၊ ကိုဝ်ခဇြေန်ဝေန်၊ ကိုဝ်ဇြဝ်လေန်နိုၚ်၊ ကိုဝ်တေတ်ပိုၚ်ဥူကဵု ကိုဝ်ခလေန်မောၚ်မောၚ်တအ်ဂှ် ကံၚ်ဇြဳပၞာန် ဖျေံလဝ်ဒဏ် ဂစိုတ်ရဂှ် ဂကောံသမဂ္ဂကွးဘာတက္ကသိုလ်ဒဂုၚ် လလောၚ်တြးလဝ်ရ။
လကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲ သ္ကုတ်လကြဴဏံ ညးဍုၚ်ကွာန် ၜါဠက်ပြၚ်ဒးဒုၚ်ရပ်လဝ်တုဲ ပ္ဍဲကဵုဂှ်ကွးဘာတြုံဗြဴ ဂၠိုၚ်ကဵုလ္ၚီပါလုပ်ဒၟံၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – သမဂ္ဂကွးဘာတက္ကသိုလ်ဒဂုၚ်
sanlontai