မနဳလာ၊ ဂျောန် (၂၈)
ဂကောံဒပ်ဗၠာဲသၟိၚ်ဖဳလေတ်ဖေန်တံ ဟံၚ်ပြာ်ဂွံလဝ် လၟိဟ်မၞိဟ်ဒးဒုၚ်ကူသာန်သွံရာန် ၁၀၀၀ ပြၚ် သွက်ဂွံကၠောန်ကမၠောန် အောန်လာၚ်ကာဇြဳနိုဝ် ပ္ဍဲဍုၚ်မနဳလာ၊ ဍုၚ်ဖဳလေတ်ဖေန်ဂှ် ညးတာလျိုၚ်တံ ဟီုဂးလဝ်ရ။
အခိၚ်ဂကောံဒပ်ဗၠာဲသၟိၚ်တံ လုပ်စိုဍိုက်ဗ္တိုက်ဂွံ ပွဳဗွိုၚ်စမြိုၚ် မၞုံဍုၚ်မနဳလာမွဲဂှ် ပ္ဍဲဂိတုဂျောန် (၂၆) တ္ၚဲစန် အခိၚ်ဗ္တံဂှ် ဂၠါဲဆဵုလဝ် ကောန်ဍုၚ်ကြုက်၊ ဝေဒ်နာမ်၊ သေန်ကာပေါဝ် ကေုာံ ကောန်ဍုၚ်မလေဝ်ယှာတံရ။
အတိုၚ်ဂလာန်ဂကောံဒပ်ဗၠာဲသၟိၚ်တံဂှ်မ္ဂး မၞိဟ်ဒးဒုၚ်ကူသာန်သွံရာန်သာ်ဏံဂှ်ဝွံ သွက်ဂွံကၠောန်ကမၠောန် ပ္ဍဲဍုၚ်ဖဳလေတ်ဖေန် နဒဒှ်သၞာဲဒဴအထံက် ကမၠောန်အောန်လာၚ်ဂိမ်တံဂှ်တုဲ ဂွံဒုၚ်လဝ်တဲ လိက်ကော်ကမၠောန် လလောၚ် Facebook ဂှ် ဂွံတီကေတ်ရ။
ဟိုတ်နူပရေၚ်လီဠာန် လ္တူအေန်တာနိတ် မၞုံဒေသ အာယှ−ပသိဖေတ်ခ်တံဂှ်တုဲ နကဵုဍုၚ်သ္အာၚ်တံလေဝ် ပရေၚ်ဒှ်ဓဝိၚ်ဂွိၚ်ဂွါဲတံ သၠုၚ်တိုန်ဒၟံၚ်ရ။ ညံၚ်ဂွံဓလိုက်ကၠုၚ်တမ်ရိုဟ် ပ္ဍဲကဵု Crypto ပ္တောံ သီုကဵုအလီ ညးကူသာန်သွံရာန်မၞိဟ်တံ ဂွံဂၠိုၚ်ကၠုၚ် သွက်ဂွံကၠောန်ကၠုၚ်ဂှ် စကာဒၟံၚ်အနိၚ်အပိုၚ်အိုတ်ရ။
ကွဳစက်ဖ္ဍိုက်ညးအာတရဴ ဂကောံဒပ်ဗၠာဲသၟိၚ် ၜါဖ္ဍိုက်ကဵု ဂကောံဒပ်ဗၠာဲသၟိၚ် ၜါဖ္ဍိုက်တံဝွံ ဒေါအ်ဇူလဝ် မ္ၚးဒၞါဲဒှ်ပရူဂှ်တုဲ အခေါၚ်လုပ်စိုပ် ပ္ဍဲစမြိုၚ်တံဂှ်လေဝ် တာဒၞါလဝ်ရောၚ် အ္စာပရိုၚ်အေအေဖ်ပဳတံ ဟီုလဝ်ရ။
“ညအ်ဂှ် ပြဟ်ဟ်ဏံ ဒးဟီုမ္ဂး ဒှ်လၟေၚ်ဒဒှ်ပရေၚ်ကူသာန်သွံရာန်မၞိဟ်ရဏောၚ်။ အကာဲအရာ ပါလုပ်ဆက်စပ်ဒၟံၚ်သီုဖအိုတ်ဂှ် ဂၠိုက်ဂၠါဲစၟဳစၟတ်အာဏောၚ်” သာ်ဝွံ ညးမၞုံအခေါၚ်ဟီုဂး ဂကောံဗ္တိုက်ပလီု အမှုရာဇဝတ်သာ်ပါ ဂကောံဒပ်ဗၠာဲသၟိၚ်ကောန်ဂကူ ဖဳလေတ်ဖေန် မေဿ Michelle Sabino ကြဴနူပရေၚ်လုပ်ဍိုက်ဗ္တိုက်ဂှ်တုဲဂှ် ဟီုလဝ်ကဵု အ္စာပရိုၚ်တံရ။
တုဲကၠုၚ်ပ္ဍဲဂိတုမေတေံ မၞိဟ်ဒးဒုၚ်ကူသာန်သွံရာန် ပ္ဍဲဍုၚ်ဖဳလေတ်ဖေန် လ္ၚီပြၚ် နူကဵုဍုၚ်အာယှဗွဲမဂၠိုၚ်ဂၠေၚ်ဂှ် သၟိၚ်တၠအဝဵုတံ ဟံၚ်ပြာ်မာန်လဝ်တုဲ မၞိဟ်တံဏံသီုဖအိုတ်ဂှ်လေဝ် သွက်ဂွံကၠောန်သ္ပ လီဠာန်လ္တူအောန်လာၚ်တံဂှ် ဒးဒုၚ်ကဵုလဝ်ဇြဟတ်ဂရိုဟ်ရောၚ် ဂွံတီကေတ်ရ။
Ref: AFP
sanlontai