ၜဳကလေၚ် – ဂျောန်(၂၉)
တွဵုရးဍုၚ်မန် ပ္ဍဲအကြာပွိုၚ်ဍုၚ်သဓီုကဵု ပွိုၚ်ဍုၚ်ၜဳကလေၚ် ပရေၚ်ပရောဒဒန်ကြုၚ်အုက် ဗ္ဒာဲကွာန် ယှိုဲယောၚ်ပျ ဒးဒုၚ်ဖံက်ခတိုဟ်ပလီုလဝ်ဂှ် မၞိဟ်ဟွံအောန်နူ (၃)တၠ ပါလုပ် သီုသၞာဲဒဴဌာန မဆေၚ် စပ်ကံၚ်ဇြဳပၞာန် ဒးချိုတ်လဝ်လဝ်တုဲ ဒးလဝ်ဘဲဝပ် (၂၆)တၠရဂှ် သြၚ်လောန်တိုၚ်(မ်) ဂၠိုက်ဂၠာဲ ဂွံတီကေတ်လဝ်ရ။
ဒဒန်ကြုၚ်အုက် ပ္ဍဲဂၠံၚ်ကွဳစက် လဂုၚ်-မတ်မလီုဂှ် တ္ၚဲဏံ ဂိတုဂျောန် စၟတ်တ္ၚဲ (၂၉) အခိၚ်နူဂယး ၜိုတ် (၄)နာဍဳဂှ် ဟိုတ်နူဒးဒုၚ်ဖံက်ခတိုဟ်လဝ်မာၚ်တုဲ ဒဒန်ဂှ် ဒးခရိုဟ်ပိုတ်စှ်ေအာ မွဲဒကရေက်ရ။
ဒပ်ကံၚ်ဇြဳပၞာန်ကဵု သၞာဲဒဴဌာနမဆေၚ်စပ်တအ် ကၠုၚ်စၟဳစၟတ်ဒဒန်လီုလာ်ခရိုဟ်အာလဝ်ဂှ် ဂကောံဇြဟတ် ပၠန်ဂတးတအ် ထောံဖျေံဗုမ် နကဵုဒရုမ် ၁၀ မတုဲ ဟိုတ်နူထပ်ဗတိုက်လဝ်ပၠန်ဂှ်ရ ပရေၚ်ဇီုကပိုက် ဒးချိုတ်လဝ် နွံဂၠိုၚ်ဒၟံၚ်ရ။
ပ္ဍဲပရေၚ်ပရောဒးဒုၚ်ဗတိုက်လဝ်ကဵုဒရုမ်ဂှ် လစှ်ေသ္ကိုပ်စၞောန်ပ္ညုၚ် ဌာနက္ဍိုက်က္ဍိုပ်ဂၠံၚ်ဍာန်ခရိုၚ်သဓီုမွဲတၠ၊ ညးယိုက်ဝန် ဌာက္ဍိုက်က္ဍိုပ်ပရေၚ်အုပ်ဓုပ်နာနာမွဲတၠ ဒးချိုတ်လဝ်တုဲ ပ္ဍဲပရေၚ်ပရောဒဒန် ဒးဒုၚ်ဖံက် ခတိုဟ်လဝ်ဂှ်မ္ဂး သၞာဲဒဴနာဲဗ္စာမွဲတၠ ဒးချိုတ်လဝ်ရ။
ပ္ဍဲပရေၚ်ပရောဂှ် သ္ကိုပ်ဒပ်ဍုၚ်ကံၚ်ဇြဳပၞာန် သ္ကိုပ်ဗိုလ်ဇၞော်အောၚ်အောၚ်ဟုၚ်ကီု ဒပ်ကံၚ်ဇြဳ၊ သၞာဲဒဴဗၠာဲသၟိၚ် သ္အာၚ်နူဂှ် ညးတာလျိုၚ်ဌာနမဆေၚ်စပ်တအ် (၂၆) တၠ ဒးလဝ်ဘဲဝပ်တုဲ ညးဒးဒှ်ဓဝိၚ်ကဵု အန္တရာယ်လမျီု ဟွံအောန်နူ (၄) တၠ နွံရဂှ် ဂွံတီကေတ်ရ။
ပရေၚ်ဖံက်ခတိုဟ်ပလီုလဝ် ဒဒန်ကြုၚ်အုက်ဂှ် အတိုၚ်ပရေၚ်ပၞာန် ကုတ်ထပိုတ်လဝ်ဂၠံၚ်ဍာန်ထံၚ်ပလံၚ် ဒပ်ကံၚ်ဇြဳပၞာန်ရဂှ် ဥက္ကဋ္ဌကဝ်မတဳကောပ်ကာဲကေၚ်ကာမိတ်ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဒဒန်ကြုၚ်အုက်ဂှ် ဒှ်ဂၠံၚ်ဍာန် အာကၠုၚ်ဒၟံၚ် လဂုၚ်၊ ဘာအၚ်၊ မတ်မလီု ကေုာံဗြဝတဳ ဒှ်အဓိကမွဲတၞုၚ်တုဲ ဟိုတ်နူပရေၚ်ပရောဏံတုဲ ၜိုတ်ကွဳစက်သ္ၚိဟေၚ် အာကၠုၚ်ဂွံတုဲ ဟိုတ်နူကွဳစက်ပ္ဍိုပ် ဗၞိက်အာကၠုၚ် ဟွံဂွံဂှ်ရ လၟိဟ်ကွဳစက် ဂၠိုၚ်ကဵုကၠံ ဒးဒုၚ်ဆိုအ်ဗ ကၟာတ်ဒၞာဒၟံၚ်ရ။
ကြဴနူဒဒန်ကြုၚ်အုက် ဒးဒုၚ်ဖံက်ခတိုဟ်လဝ်တုဲ လ္ပာ်ကံၚ်ဇြဳပၞာန် ပတေၚ်ဂြတ်လဝ် ပရေၚ်ဂီုကၠီုတုဲ သွက်ဂွံပလေဝ်ပလေတ်ဒဒန် ကၠောန်သ္ပဒၟံၚ်ရ။
ညးခါတ်အကာဲပရေၚ်ပၞာန်တအ်ဂှ် ဟိုတ်ပရေၚ်ဒဒှ်လၟုဟ်တုဲ ပ္ဍဲခရိုၚ်သဓီု တွဵုရးဍုၚ်မန်ဂှ် ပေါဲဗတိုက် ဆက်သ္ကာတ်မြဟ်ကၠုၚ်မာန်ရောၚ်ဂှ် သ္ၚဳဂၠိပ်ဒၟံၚ်အိုတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ
sanlontai