ထဝါဲ၊ ဂျောန်(၃၀)
ရးဒေသဇၞော်တၞၚ်သြဳ၊ ပွိုၚ်ဍုၚ်ထဝါဲ၊ ရေၚ်ယာဉ်ကွဳစက်သၞာဲဒဴဥူပိုၚ်တအ် က္ဍိုက်ပါဗက်ကၠုၚ်ဂှ် ဟိုတ်နူဒးလဝ်မာၚ်ဗတိုက် အကြာကွာန်ဝကုမ်ကဵု ကွာန်ဘဝပေန်တုဲ ဇီုကပိုက်ဒးလဝ်ဘဲဝပ် ဟွံအောန်နူ(၅)တၠရဂှ် ညးတာလျိုၚ်ဂကောံဒပ်ပၠန်ဂတးတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ရေၚ်ယာဉ်ကွဳစက်ကံၚ်ဇြဳပၞာန် ကွဳစက် ၁၇ ဖ္ဍိုက် ပါလုပ်ဒၟံၚ်ဂှ် အခိၚ်ကလေၚ်စဴကၠုၚ် နူစၟဳစၟတ်ကတိုၚ် သတ္တု ဟိန္နာတုဲ ပ္ဍဲဂိတုဂျောန် စၟတ်တ္ၚဲ (၂၈) အခိၚ်ဒေါဝ်တ္ၚဲဂှ် နူကျောက်မေဝ် ဃောတိတ်ကၠုၚ် လ္ပာ်ထဝါဲဂှ် ဇီုကပိုက်ဒးမာၚ်ဗတိုက် ဗၞတ် (၂)ဝါရ။
ကြဴနူဒးလဝ်ကဵုမာၚ်ဗတိုက် ဗၞတ် (၂)ဝါတုဲဂှ် သၞာဲဒဴဥူပိုၚ်ကဵု ကောန်ဒပ်ကံၚ်ဇြဳပၞာန် ကၠုၚ်စၟဳစၟတ်ကတိုၚ်သတ္တု ဟိန္နာတအ်ဂှ် ဟိုတ်နူဂွိၚ် ဖေက်ထပ်ဒးမာၚ်ပၠန်တုဲ ဖျေံလဝ်ဗဒိုပ် ပ္ဍဲဝကုမ်ရဂှ် ဂွံတီကေတ်ရ။
ပ္ဍဲတ္ၚဲဂှ် ဂိတုဂျောန် စၟတ်တ္ၚဲ (၂၉)အခိၚ်နူဂယးဂှ်မ္ဂး သၞာဲဒဴဥူပိုၚ်တအ်ကဵု ကောန်ဒပ်ကံၚ်ဇြဳပၞာန်တအ်ဂှ် ပ္တိတ်ဒၟံၚ်ဇြဟတ် သွက်ဂွံဆက်တိတ်အာ လ္ပာ်ထဝါဲတုဲ အခိၚ်ဒေါဝ်တ္ၚဲဂှ် စိုပ်ကၠုၚ် ပ္ဍဲလ္ပာ်ကွာန်ပခါပ်ရဂှ် ဟီုသ္ဂးလဝ်ရ။
ဟိုတ်နူဒပ်ကံၚ်ဇြဳပၞာန်စိုပ်ကၠုၚ်တုဲ ညးဒေသ နူကွာန်ဇိုၚ်ကရပ်ဂှ် (၅)ကွာန်ပါလုပ်သီုကွာန်ဝကုမ်၊ ဘဝပေန်တအ် ဂြိပ်ဒဴပါဲဓလေတ်ဒၟံၚ် သီုအလုံမွဲကွာန် နွံရ။
ကောန်ဒပ်ကံၚ်ဇြဳပၞာန် ကၠုၚ်စၟဳစၟတ်ကတိုၚ်သတ္တုဟိန္နာတအ်ဂှ် သွက်ပရေၚ်ဂီုကၠီု သုၚ်စောဲလဝ်ဇြဟတ် ဗ္ဒာဲ (၂၀၀)တုဲ အခိၚ်လၟုဟ်ဏံ နူဒေသဂြိုပ် ဗၟံက်ထဝါဲဂှ် ကွာ်လုပ်တိုန်ကၠုၚ် ပ္ဍဲဍုၚ်ထဝါဲ နတရဴတိုက်ရဂှ် ဂွံတီကေတ် အတိုၚ်တၚ်လဟီု ဂကောံဇြဟတ်ပၠန်ဂတးတအ်ရ။
ဒေသဂြိုပ်ဗၟံက်ထဝါဲဂှ် ဒှ်ဒေသဂကောံဇြဟတ်ပၠန်ဂတးတအ် ဇြဟတ်ခိုဟ်ဒၟံၚ် မွဲဒေသတုဲ လ္ပာ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန် ခြာဟွံလအ်ဟွံလအ် နွံရ။
ပရိုၚ်-သြၚ်လောန်တိုၚ်(မ်)
ဗီုရုပ် -TNI PDF
sanlontai